[adrift]

السلام عليكم....
دى أول مشاركة ليا فى المنتدى وبصراحة لو ما كنتش حسيت ان الناس هنا بتتفاعل كويس مع الأسئلة ما كنتش هأفكر أعمل الموضوع ده....

أنا طبيب امتياز (خريج جديد يعنى) وبأفكر أشترى عربية فى حدود 90 - 100 الف جنيه ... بعد لما سألت وشوفت لقيت انى هأختار حاجة من الحاجات دى:

هيونداى - النترا
بروتون - برسونا
شيفورليه - اوبترا

مع العلم انى بأتكلم عن الفول اوبشن أوتوماتيك فى كل الموديلات دى...
استخدامى هيكون عادى جوه البلد فى القاهرة وسفرة مرة كل اسبوع لاسكندرية وبس...
انا لما سألت كتير عن الاوبترا الصراحة سمعت انها فيها عيوب تصنيع بتظهر كتير (انا اقصد عيوب فردية) لكن العربية فى حد ذاتها كويسة...
اما الالنترا انا مش باحب هيونداى أصلاً..
فى البروتون عجبتنى جدا البرسونا حتى بعد ما سمعت ان فيها عيوب ف التقفيل الداخلى من ناحية الخامات يعنى وكمان صوت الموتور العالى ... لكن اللى خلانى اعيد التفكير فى اختيار للبرسونا لما لقيت واحد صاحبى هو كمان بيفكر يشترى عربية وبنفس حدود السعر ونفس المتطلبات تقريباً...
لما قعدنا نتكلم كنت بأقنعه بالبرسونا لقيته بيخوفنى من التوكيل ( عز العرب ) من ناحية ان قطع الغيار غالية ومش متوفرة...



ودلوقتى ياريت لو حد يقدر يتكلم عن تجربته مع البرسونا أو البروتون عامة والتوكيل ياريت... انا مش عاوز اخسر البرسونا أنا بجد نفسى اشتريها بس خايف من خدمة بعد البيع لأنى جربت الحاجات دى كتير مش مع العربيات بس جربت التوكيلات من اللابتوبات كتير وعارف يعنى ايه التوكيل سئ...