[مستجدة]

السلام عليكم
فى البداية بشكر كل من اهتم و دخل الموضوع .
فيه عندى مشكلة و مش عارفة ايه بصراحة لأن العربية مش بترضى تدور و بعد معافرة عشوائية بتدور .
اسال اللى دورها هى ايه كانت مشكلتها يقولى " فعلا مش عارف "
او يخمن تخمين منطقى بس بيختلف كل مرة عن الثانية .

باختصار العربية ماروتى 2011 عاملة حوالى 11 الف كيلو .
بتدور عادى جدا و بمنتهى السهولة بس ممكن مرة واحدة مترضاش تدور نهائى و كل مرة السيناريو بيختلف .

عشان متوهكوش هبدأ بالموقفين المتشابهين
مرة دارت و بطلت و جيت ادورها تانى مرضيتش ابدا و الناس اتلمت و زقوها للبنزينه اللى عطلت جنبها .
الراجل فى البنزينه جرب لقاها فاصلة كهرباء جرب يشيل السلك اللى بيربط بين البوبينه و الاسبراتير رجعت الكهرباء و دارت
قالى " البوبينه بتهرب كهرباء " روحى لكهربائى

مرة تانية مرضيتش تدور جبت لها مكانيكى
اول ما جه يدورها قالى انا عرفت مشكلتها
قعد يلعب برضه فى قصة الكهرباء
و دورها قالى " المقاومة بتاعتها ضعيفة عايزه كهربائى يغير لها المقاومة او يخلى البوبينه الكترونية تقريبا ( طبعا و لا فاهمة اى حاجة من الكلام ده )"
فى المرتين دول فيه حاجات مشتركة
أولا : و انا ببطلها قبل ما انزل من العربية بتترج رجه كده .
ثانيا : بروح مشوار صغير خمس دقائق و ارجع احاول ادورها
تفضل متدورش و تعمل صوت زى ما تكون العربية دايرة و انت بتحاول تدورها
ثالثا : أنها مش بتدور الا لما حد يقعد يلعب فى سلوك الكهرباء و يفك و يركب .


ده سيناريو كده متشابه عشان حتى لو مش هو ده السبب حد يفهمنى
فيه علاقة بين رجت العربية و انها مش بتدور ؟
و برضه المشكلة ديه حصلت لما اتلخبطت و دورت العربية بدل ما ابطلها .
ايه الضرر اللى ممكن يحصل لما يحصل كده ؟
و ايه معنى الرجه ديه
و يا ترى " انها بتهرب كهرباء " هى نفس " مشكلة المقاومة ضعيفة " ؟
و الصوت اللى بسمعه و انا بحاول ادور و اللى بيشبه صوت لما تدور العربية و هى دايرة ده معناه ايه
و لو فضلت احاول ادور بعد الصوت ده من غير ما ارجع المفتاح ايه اللى ممكن يحصل
و لو مشكلة كهرباء كده تبقى مشكلة مش ديما بتظهر .

و دلوقتى هوضح لكم كل السيناريوهات اللى حصلت فى مرات انها متدورش
اول ما جت كنت بدورها عادى
افتح الشفاط و ادور تدور عالطول
بعد ال 10 الالاف ركنتها كذا يوم و جيت ادورها معرفتش
واحد قعد يلعب فى سلوك الكهرباء دارت
** المرة اللى بعدها مرضيتش تدور وقفت سواق تاكسى
دورها و قالى اصلها كانت شرقانه
رحت مشوار و دارت عادى
نزلت اشترى حاجة و رجعت بعد ساعة
مش رضيت تدور نهائى و اتصلت بزوجى قعد يعافر فيها و فكها حته حته تقريبا
( بحكم انه غاوى فك و تركيب ) و قالى انا فعلا مش عارف هى مش راضية تدور ليه

( ده بعد ما شيك على الكهرباء و القصص ديه كلها )
بعد كده قالى هو الابلاتين لادع لما تروحى تعملى صيانى ال 10 الالاف غيريه بس انا هعلى لك الكهرباء .

و مشيت العربية كويس جدا
مرة بس مرضيتش جه برضه واحد قعد يفك السلوك من الاسبراتير و يركبها تانى فوصلت كهرباء و دارت .

بس بعد ما ودتها التوكيل و غيروا طقم الكهرباء و ظبطوا الكهرباء و هى مغلبانى .

بس اول مرة كان بقالى يومين مش دورتها و اتصلت بسواق ابنى اللى بيوصله المدرسة

قعد يعافر فيها
و يضغط بنزين و يسيب و يجيب غيار لغاية اما دارت من غير ما يفتح الكابوت .
( يعنى صعب تكون كانت قاطعة كهرباء و رجعت تانى )

يوم تانى رحت بيها كذا مشوار
و ركنتها قدام البيت رجعت
جيت اركبها بعد ساعتين مش دارت
قعدت احاول و اعافر زى ما السواق عمل
دارات
بطلتها و جيت ادورها تانى دارت
جيت ادورها بعد شوية
دارت و بطلت و مرضيتش نهائى تدور
فى جيت السواق برضه دورها بالمعافرة من غير ما يفتح الكابوت و لا يجى جنب الكهرباء .
دلوقتى بقيت عشان ادورها دوسة بنزين و لما تلقط اديها دوسة جامدة لأنها لما بتبطل مش بتدور تانى بعد ما كنت بدورها بالشفاط .


مش عارفة هى فيها كذا مشكلة عشان كده مش بتدور كل مرة بنفس الطريقة و لا ايه .
و ممكن تكون المشكلة فيا مش بعرف ادورها .
بس اقصى معلوماتى انها ممكن تشرق .
انما اعمل غلطة تخليها تقطع كهرباء .

الرجاء الافادة .