العلاقة و الفرق بين التين الشوكي و الجريفروت و العثة........1000%....... ..........أنت مين فيهم
ثواني بس قبل ما تفتكره موضوع عن الفواكه أو الطبيخ أو ألغاز ذكاء و تطالب بوضعه في قسم المطبخ و لا في حضانة الموقع
أنزل معايا خمس ست سطور و لو كلامي مش عاجبك شرفتني بمجرد مرورك يا سيدي و حتشرفني دائماً كل وقت
الإيمان ما وقر في القلب و صدقه العمل و مع الاجتهاد في توافق المظهر و الجوهر فقط علشان ما تبقاش زي التين الشوكي عسل بس براك طن شوك اي حد يقرب منك من غير ما يكون مسلح يتشوي اللهم احفظنا
و العكس بدل ما تبقى الجريفروت شكلها و ريحتها تجنن بس من جوا علقم بعيد عنك و لو إنها مفيدة
أفكرك بكلام ما في بعده كلام - كلام سيد الأنام و مسك الختام
عَنْ أَبِي مُوسَى الْأَشْعَرِيِّ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: (مَثَلُ الْمُؤْمِنِ الَّذِي يَقْرَأُ الْقُرْآنَ كَمَثَلِ الأُتْرُجَّةِ؛ رِيحُهَا طَيِّبٌ وَطَعْمُهَا طَيِّبٌ, وَمَثَلُ الْمُؤْمِنِ الَّذِي لَا يَقْرَأُ الْقُرْآنَ؛ كَمَثَلِ التَّمْرَةِ لَا رِيحَ لَهَا وَطَعْمُهَا حُلْوٌ, وَمَثَلُ الْمُنَافِقِ الَّذِي يَقْرَأُ الْقُرْآنَ مَثَلُ الرَّيْحَانَةِ؛ رِيحُهَا طَيِّبٌ وَطَعْمُهَا مُرٌّ, وَمَثَلُ الْمُنَافِقِ الَّذِي لَا يَقْرَأُ الْقُرْآنَ كَمَثَلِ الْحَنْظَلَةِ لَيْسَ لَهَا رِيحٌ وَطَعْمُهَا مُرٌّ)
هاه ناوي تبقى إيه؟؟؟
رد على نفسك بينك و بين نفسك
و أختار تكون بين الناس إزاي
زي التفاحة طعم و رائحة و فائدة
و لا التمرة طعم و فائدة بدون رائحة
و لا وردة أو ريحانة رائحة و مرارة
و لا حنظلة مرارة و لا رائحة و لا شكل و لا فائدة غير تطفيش العثة
و تقابل ربنا إزاي
و تنفع الناس نفع تام و لا ؟؟؟؟؟؟؟؟؟؟؟؟؟؟
و في رمضان خليك فاكر الآية الكريمة:(يَا أَيُّهَا الَّذِينَ آمَنُواْ لاَ تُبْطِلُواْ صَدَقَاتِكُم بِالْمَنِّ وَالأَذَى كَالَّذِي يُنفِقُ مَالَهُ رِئَاء النَّاسِ وَلاَ يُؤْمِنُ بِاللَّهِ وَالْيَوْمِ الآخِرِ فَمَثَلُهُ كَمَثَلِ صَفْوَانٍ عَلَيْهِ تُرَابٌ فَأَصَابَهُ وَابِلٌ فَتَرَكَهُ صَلْدًا لاَّ يَقْدِرُونَ عَلَى شَيْءٍ مِّمَّا كَسَبُواْ وَاللَّهُ لاَ يَهْدِي الْقَوْمَ الْكَافِرِينَ) البقرة 264
و يا سلام لو سلم الناس منك بقية السنة حتى لو من غير صدقة و لا منفعة تبقى مسلم عن حق
((المسلم من سلم المسلمون من لسانه و يده))
((ليس المؤمن بالطعان ولا باللعان ولا الفاحش ولا البذيء))
الله عليك 1000%
اسيبك لصلاة الفجر تقبل الله مقدماً صلاتك و صيامك
عقبال صلاتك في الحرم و المسجد النبوي و المسجد الأقصى
و على فكرة أنا لا بوعظ و لا داعية إسلامية - و لو إنه شرف ما بعده شرف - لكن بساعد نفسي بإني بذكرها و بذاكر لها معاكم لمحات بسيطة ممكن تفكرك بحاجة الشيطان نساهالك في زحمة الدنيا
التعديل الأخير تم بواسطة Tota El Masry ; 31-07-2012 الساعة 04:53 AM
|