[حسام البورسعيدى]

بص يا باشا الموضوع بسيط مش كبير ومش مكلف اوى كمان وخصوصا ان العربية لادا ...

نص العمره هتكلفك حوالى من 500 الى 800 جنية شامله المصنعية اللى هتكون ما بين 200 - 250 جنية ...

بس اتمنى ان الموضوع يخلص على طقم شنبر فقط من غير ما تحتاج خرط اى جزء من الموتور فى المخرطه وخصوصا الشمايز (ودى جدران غرفه الاحتراق اللى بتتحرك جواها البساتم) لانها لو متآكله حتحتاج خرط فهتوسع فتضطر تغير البساتم او تجيب طقم شميز (وده مش حاجة حلوه لان كده يبقى الموتور اتلعب فيه) ...

فنصيحتى ليك لو لقيت الوضع هيفتح وهتحتاج تودى الموتور للمخرطه يبقى هاتلك نص موتور استيراد افضل ويمكن اوفر كمان ...

على فكره تقدر تعرف ان موتورك محتاج عمره لما يكون بياكل زيت .. يعنى الزيت بينقص باستمرار وبتلاقى دخنه لونها سماوى من الشكمان او فتحه الفايظ فى وش الموتور ...

والنص عمره ممكن تاخد يوم كامل من اوله وتستلم بالليل لو الميكانيكى نشيط شويه ومحصلش عطله فى قطع غيار وخلافه .. وممكن تستلم تانى يوم وغالبا ده اللى هيحصل .. وخلى بالك انك هتحتاج تلين فتره بعد العمره قبل ما تتحرك بالعربية .. يعنى تبقى دايره وهى واقفه والميكانيكى يراقب الحراره وحاله الموتور وكده كل شويه لغاية لما تحرقلها 20 لتر بنزين ولا حاجة ..

طبعا فى الموضوع ده هتحتاج غيارين للزيت واحد للتلين فقط يعنى مش هيقعد اكتر من اسبوع فقط وتنزله وهتلاقيه اسود لانه كمان بيعمل عمليه تنضيف للموتور من الداخل من اثار الشغل وكده .. وبعدين تحط غيار زيت عادى تمشى بيه بقى وتغير فلتر كمان ...

وعموما ربنا معاك وتعمل العمره على خير باذن الله ..


اما بقى لو عاوز تصبر شويه على الوضع ده فانصحك انك تحط زيت تقيل (لزوجه عاليه) وتحط معاه علبه زيت شنبر (ابرو) بـ 15 جنية وده هيخفف الوضع شويه .. كمان بالنسبة للبوجيهات اسأل الميكانيكى بتاعك عن امكانية تركيب بوجيهات سن قصير او تركين كرسى ليها لمنع الزيت عنها شويه ... وده وضع مؤقت بس لغاية لما تستعد للعمره ..