المشاركة الأصلية كتبت بواسطة mostafayation
السلام عليكم ورحمة الله وبركاته يا رجالة الستروين والله دى اول مشاركة ليا فى المنتدى الجامد اوى دا وكنت حابب انضم معاكم فى الموضوع الجميل اللى عامله الاستاذ ايمن وخاصة بعد الموضوع اللى شوفته عمل ايه فى العربية بتاعته ....
طبعا يا استاذ ايمن انت عارف ان الناس كلها تقولك بلاش الستروين بس انا مش عارف ليه او انه زى ما حضرتك قلت مش فاهم او مش عاز يشتغل فى الحوض بس مع انها العربية الاولى فى فرنسا .... بس انا كنت عاوز اخد رأيكم فى موضوع مهم جدا وهو مقارنة العربيات ... انا كان معايا فيات 125 وكانت عربية من الاخر وكنت برده مدلعها زيك كده بالظبط بس فى الاخر اسمها 125 ومهما عملت مفيش سحب مع انى غيرت فيها الموتور بالفتيس والكارونة الى 131 1600 cc بس انا كنت عاوز اركب عربية ناعمة ومصرفيها تحت الايد وعايا فى حدود 16 /17000 ودول ميجبوش حاجة بالكماليات اللى شفتها غير الستروين بس انا محتار بينها وبين المازدا 323 وانا شفت عربيات منها فى حدود السعر ده وبالنسبة لقطع الغيار انا اساسا فى عين شمس وخاصة فى جسر السويس جنب الاسطى فرج وجنبى برده الناس بتوع اليابانى كلهم يعنى متوفره ومتهيألى ان قطع الغيار فى الاثنين بعد المقارنه بالاسعار اللى انت حاططها وبين المازدا تقريبا واحده فانا بجد محتار بين الاثنين من حيث النعومة والراحة والصالون والكماليات  معلش طولت عليكم بس حابب اخذ رأيكم يا اهل الخبره |
وعليكم السلام ورحمة الله وبركاته يا استاذ مصطفى.... اهلا بيك فى الكلوب ونورتنا
طبعا مفيش وجه مقارنة بين الفيات القديم عموما ذو قوة التحمل والاداء القوى وبين المازدا والستروين اللى فيهم نعومة وراحة وكماليات لكن مش بنفس قوة الفيات القديم وخصوصا 125 واللى بيصرف على العربيات دى بيبقى حاببها وعايز يحتفظ بيها ويطلع منها بافضل اداء لكن محدودة الكماليات
نيجى للمقارنة بين مازدا وستروين ... معلش ماعنديش معلومات كتير عن مازدا لا قطع غيار ولا كماليات بس فى ناس كتير بتشكر فيها مع ملاحظة انها ثمانينات على ما اعتقد ويميزها الحجم الاكبر من ستروين
بالنسبة لستروين طالما انك فى قريب من جسر السويس يبقى اعتقد ان مشكلة قطع الغيار والصيانة متوفرة بالنسبة لك وده اهم حاجه فى ax على وجه الخصوص +كماليات(سنتر-زجاج كهرباء-تكييف-دركسيون ناعم جدا كأنه باور) يعيبها فقط صغر حجم الصالون لكن فى المجمل انا باعتبرها افضل عربية صغيرة بكماليتها و بأقل سعر .... خد بالك برضه عند القرار من موديل الستروين اللى بيبتدى من تسعينات وموديل المازدا اللى فى التمانينات لان فرق العشر سنين دول اكيد بيأثروا على الاستهلاك العام وحالة العربية
بالنسبة لميزانية حضرتك ممكن تجيب ستروين بـ 16 او 17 لكن حالته مش هاتبقى 100% يعنى هاتبقى عادى ومحتاجه شوية تظبيط لغاية ما توصل للى فى دماغك وممكن ربنا ييوفقك برضه فى حاجه ممتازة فى حدود مقدرتك
دور كويس وعاين كتير وشوف مازدا وستروين وان شاء الله مع المعاينة والاحتكاك المباشر تكتشف حاجات اكتر وممكن تلاقى حاله زى ما بيقولوا لقطه فى اى واحده من الاتنين وتبقى كسبتها برضه
دعواتى لحضرتك بالتوفيق ان شاء الله وتحت امرك