رد: سباق بين فيات 128 و مرسيدس و رولز رويس
عايز أقول لمن يسخر من الفيات 128
اهمس فى ودنه وأقوله
كل شىء فى الدنيا
له ميزات وكمان ليه عيوب
دى سنة الحياة والخلق والموجودات
يعنى مثلا لو انت فى مصر ام الدنيا
السرعة مش هى الفيصل والميزة الرئيسية فى المقارنة بين السيارات
لا فيه حاجات اهم من السرعة بكثير
ومش السرعة التى هتخلى ال128 وحشة والمرسيدس هى الحلوة
واسمحلى اقولك على مميزات 128 علما انى لما اتعلمت السواقة اتعلمت على فيرنا واتعلمت على أفيو
يبقى المفروض انى لما اركب ال 128احس انى مش طايقها
لكن العكس صحيح
ال 128 لها ميزات تفوق المرسيدس واغلى السيارات
اول شىء
لو عطلت بيا فى الطريق الصحراوى هعرف اصلحها واكمل
انما لو عربية حديثة بكنترول وعطلت ابقى قابلنى لو عرفت تروح وشوف الخوف والخطر وعيشه
ال 128 اركنها فى اى مكان وما اخافشى عليها
انما عربية حديثة يبقى تنام بعين واحدة والثانية مفتوحه
ال 128 عربية اقتصادية ورخيصة وعملية وصغيرة
تخش بيها فى اى مكان وفى اى شارع وزقاق ومدق
وتخش بيها فى اى واحد ما عندوش ذوق عايز يقطع عليك
وهو هيقف لحسن تعوره
انما لو معاك عربية حديثة هتخاف حد يحكها
لان الحكة بشكة
وفلوس ودولارات وحوارات
128 قطع غيارها عند البقال وبتراب الفلوس
روح اشترى قطع غيار الجديد وشوف وانت تصرخ
ال 128 فى الغيار الثانى والثالث اسرع من اى عربية ثانية وجرب كده
انا كنت بدوس الثالث وآكل اى عربية جمبى على الغيار الثانى والثالث فى سرعة الانطلاق والطلوع من الممرات المرورية
ال 128 عربية تناسب المكان والزمان - مصر بلد الحوارى والمطبات والحكات
فوق كل ده
عربية تقضى بيها مصالحك
وفى وسط زحمة البلد تلاقيها شايلاك وحفظاك انت واسرتك والمدام من قلة ادب السواقين وكرشهم الواسع ومن مرمطة المواصلات والتكاسى
عربية رخيصة
عمليه
وحتى فى السرعة بجيب بيها 130 على السريع
انما اللى بيدور على السرعة زيادة عن كده
يبقى بيدور على حادثة
او مش خايف على نفسه
حتى السرعة خطر
واى عربية قديمة او حديثة المفروض ما تزودش فى السرعة علشان تحافظ على حياتك
يبقى ميزة السرعة ما تتحسبشى للعربية
واحب اقولك على مثال بسيط من يومين
ماشى فى الطريق فى الحارة بتاعتى
وفجاة من ممر جانبى على الطريق خرجت عربية النترا باقصى سرعة عايز يقطع عليه ويعدى
هو
بمنتهى البرود والتلامة التى اتعودنا عليها فى مصر
تفتكر انا عملت ايه
كانى ماشى مش شايف
كملت
بنفس سرعتى ولم تهتز شعرة واحدة وكنت مصمم انى اكمل ولو على جثته
لما لقى 128 بسرعة عالية
فرمل ووقف ولم نفسه
ليه
لانه حسبها
لو كمل انا هلبس فيه
وهو هيتعور
وانا عندى استعداد بالفين جنيه ارجع العربية عروسة
انما هو يبقى يسلملى على الترماى
عرفت ايه بقى فايدة ال 128
ال 128 بتعلم قليل الادب - الادب
وتعلم ابن ماما وبابا يحترم نفسه
وتخلى الى قدامك يمشى عدل
انسب عربية لجو مصر
ولناس مصر
ولحوارت مصر
دى ثقافة سلبيه عند الناس اتراكمت عندهم لما ظهرت العربيات الجديدة
وهى نفس الثقافة الى ممكن تتعامل بيعا معاهم
وانا والله بحمد ربنا انى اشتريت فيات 128
وفى النهاية اقولك
انا عندى استعداد اشترى أفيو او هيونداى ماتريكس
انما اشتريت فيات علشان انا عارف اهل بلدى
وادرى بيهم
ويوم ما اشتريت استخرت الله
وخرجت الخيرة
انى اعتذر لصاحب المعرض بتاع الافيو
واتصل على الراجل صاحب ال 128
والحمد لله العربية عمرها ما قصرت معايا
طالما انا مراعيها ومهتم بيها
وربنا يكفينا شرها ويدينا خيرها
|