[د.هبه77]

بص حضرتك يا استاذ ماندو
الرد علي حضرتك يقتضي شقين
الشق الاول اثبات انه امه مش امريكية بالادلة
ومعلش سامحني لو حضرتك شفت اخر صور انا حاطاها للوثائق هتعرف انا لية بقول علية امه مش امريكية
نبتدي من الاول كسرد للحقائق اما الادلة فهي موجودة في المشاركات السابقة
حضرتك قلت ان هي قعدت في بلاد الكفار
انا معاك ان في حكم بيقولك ان السفر لبلاد الكفار حرام
بس فعلا الحقيقة للسفر ليلاد الكفار لها احكام عدة من الحرام حتي المباح
واعتقد ان حضرتك عارف ان من سماحة هذا الدين ان تتعدد فيه الاحكام
ولينا في تعدد الاراء رخصة
وبصراحة انت عارف ان العلاج بالخارج له مميزات عديدة جدا وتقدم هائل عن هنا
وفعلا انا حاولت اسال لنفسي عن الموضوع دة المعادلة الامريكية او كدة لكن للاسف متنفعش بالنقاب
هل تعتقد ان التعلم بامريكا مفيهوش فتن بالعكس انا اكره جدا وسامحني السفر للدول الاجنبية لكن في المقابل لو اتعلمت احدث الطرق في العلاج وبطريقة تفيد الناس هنا يبقي لية لأ
لكن المهم حاجة معينة
انت رايح لية؟
ولازم تحمي نفسك كويس جدا من الفتن او يكون لديك القدرة انك تقف ادام الفتن دي
وبالتالي هي لما اتعالجت مش غلط بالعكس وطبيعي انها تتعالج في اخر عمرها بحكم السن

انا معاك انها قدمت الجرين كارد وقدمت علي طلب وثيقة سفر او باسبور ابيض لللي هو للناس اللي مش امريكان

اما كون السعودية بتقول انها امريكية
هو حضرتك مش عارف ان الحكم السعودي اصلا من انصار مبارك
مش السعودية هي اللي ساومت مصر عشان تاخد مبارك عندها
مش السعودية اللي رفضت تطلع شاحنة البترول من عندها لمصر الا لما مصر تدفع المبلغ كاملا بعد خلع المخلوع نكاية في المصريين
حضرتك متعرفش ان الحكم السعودي بيدعم عمر سليمان
مقرتش عن خبر اكتشاف تيشرتات دعائية جاية من السعودية لعمر سليمان
السعودية قالت
بنفس كلام حضرتك هقولك
فين الدليل

حضرتك سمعت عن ايران وانها بتدعم الحرب ضد سوريا وفي اخر حوار له الاخ الخميني بيهدد السعودية انها لو سلحت او امدت الجيش الحر باي امدادات هتنتقم من السعودية


http://www.youtube.com/watch?feature...&v=b2RogUSSeN0


حضرتك متعرفش ان الكويت الي الان بيشتمو المصريين عشان ازاي يخلعو مبارك
يعني حضرتك شايف ان الدول العربية والاسلامية قلبها علي بعض اوي


اما بقي كلامك في حقي
انا هقول لحضرتك انا بدافع عن حازم لية
ورغم ان حضرتك بتقول ان انا من اعضاء اللجنة الالكترونية بتاعته
اقول لحضرتك يا ريتيني كنت فعلا منهم
اقولك لحضرتك كلام يمكن كتير من اللي بيهاجمو حازم مش هيتقبلوه
لكن هكلم حضرتك بصراحة شديدة وبكل صدق رغم ان ذلك سيبتعد عن الموضوع الاصلي
هي دي الحقيقة
انا لا ادعي الالتزام او الاسلام الحق بالعكس يمكن انا اشد المقصرين فيكم
ولكن انا قرات فيما قرات وصف الرسول صلي الله عليه وسلم
وفعلا تمنيت كثيرا ان اراه ربنا يوعدني بذلك يا رب
اصبحت في حياتي احب هذا المنظر الملتزم واحب سنته ومن يطبقها وان كنت لا افعل ذلك كثيرا فليغفر الله لي تقصيري
احب الشيوخ جميعا
ومش هكذب عليك
في الاول كان في شيوخ كنت لا افقه حديثهم
ولكن سبحان الله رويدا رويدا احببت حديثهم بصدق
وكإن ربنا بيقولي انتي كنتي غلطانة في انطباعك الاول عنهم
اكيد كلام الله وكلام رسوله ينفذ الي القلب نفاذا مباشرا
وابتلاني الله بابتلاءات كنت افكر كثيرا كيف ساخرج وكنت اظن ان التدبير ياتي من عندي وعقلي المحدود هيأ لي انني يمكنني ان اصل الي الخلاص بامكاناتي
وفي كل مرة كانت تتجلي لي قدرة الخالق وما كان ذلك الا للطف الله ورحمته الشديدة بي وبامثالي من العصاة واجزم بعدها بقدرة الله الحق التي تظهر لي امامي عيانا بيانا
كان الواحد فاكر انه بقوته وبعقله هيتحكم في مصير الكون وسبحان الله كل ما دبرته في ثانية ينقلب راسا علي عقب لاري بعيني ان تدبير الله وتمكينه اعظم بكثير - جل تعالي - من تدبير البشر
حضرتك بتقول ان انا لجنة وغيرك قال ان انا اخدت فلوس
ربنا الاعلم بالنفوس وبما عملت وبما تعمل
كل نفس بما كسبت رهينة
وهقول لحضرتك لا
وانا غير كاذبة
ويقيني بصدقي وبان للاسلام اعداء كثيرون زي امريكاوغيرها لا يريدون ان يمكن لشرع الله في ارضة
يمكن الناس في مصر خايفة من الدين زي ما انا مثلا زمان كنت بسمع اغاني والحمد لله ربنا عافاني
مكنتش اتخيل ان هييجي يوم مسمعش فيه اغاني رغم علمي بانها غلط ربنا يعافينا من الاصرار علي الذنوب وانا متاكدة ان رغم خوف الناس لكن هم فيهم الخير الكثير فقال صلي الله عليه وسلم الخير في وفي امتي الي يوم الدين )
لكن بصراحة عمري في حياتي ما كرهت او هاجمت حد ملتزم
مش هانكر ان التدرج مطلوب انا نفسي تدرجت مع نفسي في امور كثيرة
ولان الرسول صلي الله عليه وسلم قال
ان هذا الدين متين فأولجو فيه برفق
وده اللي قاله برضة الشيخ حازم لما سئل عن فرض الحجاب
قال يستحيل ان انا اجي اقول يا جماعة بكرة البسو الحجاب كل النساء
لكن هاجي علي اخر الفترة الحكم هخلي السيدات يعرفو حكم الحجاب ويلبسوه من نفسهم
مشكلتنا واللي بشوفها بحكم عملي
للاسف بسبب المناهج الناقصة
ان ناس كتير مدرستش ومتعرفش احكام كتير في الدين
وان الناس خايفة وفاكرة ان هيحط رقاب الرجال كلها ويقطعها بالسيف
سبحان الله الدين دة لكل وقت ولكل عصر وفيه مرونة شديدة وهو نفسه قال يا جماعة مش انا اللي هحط الاحكام هتحطها الاوقاف والازهر بس يكون شيخ تاني طبعا غير اللي راح اسرائيل
ووالله ما دافعت عنه الا لايماني بالقضية ومدافعتش عنه عشان انا باتسلي واتكلم شوية وخلاص
وكان علية باية ان اللي رايح واللي جاي معلش يعني يتكلم بطريقة غير لائقة في اكثر من مرة؟
مش القضية حازم القضية ان نفسي انا نفسي اشوف كل حاجه حوالية تفكرني بالدين لان انا فعلا مقصرة(وبسبب هجوم شديد علي الشيخ هنا في المنتدي انا عملت الموضوع دة ومنه بصراحة ابتديت اشوف الفيديوهات بتاعته واتتبع اخباره)
نفسي اشوف مدارس غير مختلطة
وجامعات غير مختلطة
هل تنكر حضرتك ان دي اكتر فترة حرجه للشباب ان يبقي البنات والولاد مع بعض
ومش دي وبس حاجات تانية كتير بس انا مش هطول (هو انتي كمان كنتي هتطولي عن كدة اية الرغي دة يا شيخة )

تقدر حضرتك تقولي احنا الفتن اللي احنا فيها دلوقتي تختلف اية عن الفتن اللي موجودة برة

ناس كتير علي فكرة بعتتلي وقالتلي انتي اللي هتصلحي الكون
خفي شوية
وكلمة سمعتها من استاذ علي منير الله يمسيه بالخير كان رد فيها علي حد هنا في المنتدي كان بيهاجم الدين

قاله لو انا عندي حماسة للدفاع عن ديني زي اللي عندك كان حالي احسن من كدة بكتير

انا بعامل الناس هنا كلها اخواتي فعلا واحب الخير لكل الناس حقيقة
ومش هانكر عليك ان انا اللي بستغرب منه حقيقة وبجد
ان ييجي واحد مسلم ويقول انا مش عايز رئيس دولة يمسكني يبقي ملتحي ويتريق علي اللحية ويقول مركب دقن
سبحان الله
بيتريق من سنة الرسول صلي الله عليه وسلم
مش هتصدق قلبي بيوجعني اد اية
طب طالما اللي بيتريق دة مبسوط اوي بكلامه ده وتريقته
معلش سامحني اني اقوله
متزعلش لما تيجي يوم القيامة وتقول انا مش شايفه
عارف مش شايف مين
اللي انت اتريقت عليه
اللهم ارزقنا رؤية نبيك الكريم ولا تحرمنا رؤيته اللهم لا تحرمنا شربة هنيئة مريئة لا نظمأ بعدها ابداوارزقنا حلاوة النظر الي وجهك الكريم يا ارحم الراحمين
وقال عز وجل: ( للذين أحسنوا الحسنى وزيادة ) فالحسنى: هي الجنة، والزيادة: هي النظر إلى وجه الله الكريم، كما قال النبي صلى الله عليه وسلم: " إذا دخل أهل الجنة الجنة يقول الله تبارك وتعالى: تريدون شيئاً أزيدكم ؟ فيقولون: ألم تبيض وجوهنا؟ ألم تدخلنا الجنة؟ وتنجنا من النار؟. قال: فيكشف الحجاب، فما أعطوا شيئاً أحب إليهم من النظر إلى ربهم عز وجل" ثم تلا رسول الله صلى الله عليه وسلم هذه الآية: ( للذين أحسنوا الحسنى وزيادة. )
اشهدك يا رب وانت علي كل شئ شهيد اني ما تكلمت الا لك يا رحمن اللهم اخلص لنا نياتنا
ارجو يا استاذ ماندو انك متزعلش اني محطتش اللنكات لضيق الوقت بس اوعدك هاقولك ارقام المشاركات تاني وادلتي قوية بس لو حضرتك سمعتها بقلب غير متحيز ولسة ادلة اخري ان شاء الله يوم الاثنين
وارجو ان حضرتك تكون مصدقني
حقيقة سعدت بالحوار مع حضرتك ويمكن اول مرة اتكلم واعبر عن نفسي بهذا الوضوح الشديد

رغم ان دة مش من طبعي خالص

اللهم اجعلنا ممن يستمعون القول فيتبعون احسنه ورزقنا الله واياكم التقوي والبصيرة امين
تحياتي: