العربية ديه مرتبطة مع أذهان معظمنا بحاجتين.... القوة.... و الاستهلاك العالي للوقود....
و الواحد بياخد قرار الشراء أو التجربة لما بيغلب عنده الاحتياج لعربية قوية.... و ساعتها مش بيبص للبنزين....
و في الموضوع ده.... أحب أني ألقي الضوء على كل ما يتعلق بالعربية ديه (بقدر معرفتي بيها) عشان اللي بيفكر يشتري يكون عنده رؤية واضحة.....
في البداية هي نازل منها محركين 4 سلندر 2500 سي سي و 6 سلندر 4100 سي سي
ال4 سلندر كله مانيوال....أما ال6 ففيه منه مانيوال و لكن معظمه أوتوماتيك....
مفيش اختلاف في الوسع الداخلي بين العربيتين.... حاجات بسيطة بس اللي مختلفة في الشكل الخارجي....
الضريبة للعربيتين واحدة.... عشان كدا كدا بعد 2030 سي سي بتبقا كلها حاجة واحدة انشالله 7000 سي سي...... ( بتكون في حدود 1150 - 1200 جنيه + التأمين طبعا يعني بتقفل 1500 تقريبا في السنة)
استهلاك البنزين في ال6 سلندر يتراوح ما بين 80 كم - 140 كم في الصفيحة بحسب عوامل كتير من زحمة - تشغيل تكييف... كفاءة و صيانة موتور... الخ....
بالنسبة لل4 سلندر استهلاك البنزين فيها ممكن يوصل ل180-200 كم في الصفيحة ( وانا شخصيا كان معايا عربية كان ده استهلاكها على الطوالي) بس كانت عربية مظبوطة جدا و متصانة جدا.....
الشيروكي ميزتها ان انتشارها الواسع خلى الشغل فيها مش كيميا... يعني ميكانيكيتها كتروا اوي.... و قطع غيارها منتشرة ... الرخيص منها و الغالي.....
من عيوبها الأساسية....
أولا... العربية مبنية على شاسيه علب... مش فردتين شاسيه..... و ديه طبعا بتكون أضعف بكتير من الشاسيه الفردتين.... و اللي بيتبني عليه عربيات الخدمة الشاقة زي النص نقل و الفور باي فور المحترم.....
ثانيا.... العفشة الأمامية على سوست حلزون و مقصات..... و ديه عفشة ضعيفة نسبيا..... مقارنة بالسوست الورقية.....
و العربيات الفور باي فور الجامدة أوي اللي معمولة للصحاري و الشغل الجامد... بتكون سوست ورقية قدام وورا..... (زي الرانجلر تسعينات و زي اللاند كروزر الفوكس لحد سنة 2000)
ثالثا..... الشيروكي موتورها مليان حساسات مالهاش لزوم... غير انها كل ما تبوظ هتغيرها..... و الفتيس لوحده فيه 3 حساسات ( بتكلم عن فتيس الأوتوماتيك ال6 سلندر)
كمان من أبرز عيوبها....طرمبة البنزين .... كهربا مش طرمبة ميكانيكية (على رداخ و شغالة مع تقسيمة الموتور) و ديه طبعا مشكلتها لو فيوزها اتحرق هتقف لحد ما تغيره... لكن لو هي نفسها عطلت ... فأنت هتعطل تماما لحد ما تفك التانك و تغيرها.... و ده طبعا ممكن يحصل معاك في أي لحظة.... الكهربا مفيهاش شغال نص نص.... يا شغال يا عطلان (1 أو 0)
ديه الحاجات اللي أنا فاكرها حاليا.... و أرجو أني أكون أفدتكم بيها قدر استطاعتي....
و تحت أمركم في أي أسئلة.....
تحياتي للجميع.....
