[تامر ديزل]

اسمحولي اشارك معاكم في المناقشة بحكم عملي واحتكاكي اليومي بسواقين النقل
كل الاخطاء المذكورة صحيحة وبتحصل فعلا وسببها مش بس الاهمال ... فيه كمان المخدرات وخصوصا البانجو والترامادول اللي بيتعاطوه علشان يقدروا يسوقواساعات متواصلة بدون نوم وكمان فيه نسبة تهور وفيه ضغط شغل
وكمان الزملاء اللي بيلتمسوا العذر لسائق النقل عندهم حق لان صناعة النقل من الصناعات العملاقة في العالم كله
نيجي لاجابة السؤال : ايه الحل ؟
الحل في ايد المرور مش في ايد الافراد ... لازم المرور يعمل كماين وحملات تفتيش ورادارت في الطرق الرئيسية للنقل ويتعمل كمان اختبارات المخدرات اللي بيعملوها على مستوى العالم ويشددوا كمان على تشميع العربية .. لو المرور شاف شغله مش هتلاقي سواق نقل يخالف ابدا ... ليه ؟ لان راس مال سواق النقل حاجتين : صحته ورخصته يعني لو رخصته اتسحبت لاي مخالفه ده معناه انه هيقعد خالي شغل يبقى اكيد هيحافظ ومش هيخالف
بالنسبة للمواقف اللي بتقابل بعض الزملاء مع سواقين النقل لازم نلاحظ ان فيه منطقة كبيرة محيطة بالعربية النقل مش بيبقى السواق شايفها خالص في المرايات واسمها المنطقة العامية ودي هيا المنطقة بعد الكابينة لحد نص المقطورة وبالتالي نسبة كبيرة من التزنيقات على الملاكي مابتبقاش مقصودة لانه فعلا مش بيبقى شايف العربية نهائيا وفي الحالة دي لازم تخلي بالك وتعدي من المنطقة دي بسرعة جدا يعني متمشيش جنب النقل او ملاصق ليه
فيه كمان ملفات ميقدرش النقل ياخدها على سرعته لانه اكيد هيتقلب فبيضطر الى انه ياخد الحارة التانية يمينه او شماله غصب عنه وبرده خلي بالك وماتاخدش ملف مع عربية نقل لانه هيكسر عليك وهوا مش شايفك خالص
راعي كمان ان التحكم في العربية النقل اصعب من الملاكي وانه علشان ياخد يمينه ويوسع للي جاي وراه محتاج وقت اكتر من اللي انت متوقعه واحيانا بيكون فيه مشاكل فنية بتحصل فجاه في العربية مثلا في الجانب اليمين من العربية وبيضطر السواق يمشي شمال على طول علشان لو راح في اليمين النقلة ممكن تميل او العكس
الخلاصة ان النقل عصب الاقتصاد في مصر وبيخدم كل قطاعات الانتاج مافيش قطاع انتاج مش بيعتمد على النقل في مرحلة من مراحلة .. هوا محتاج رقابه صارمة من الحكومه وشوية تقدير ومراعاة لظروفهم من الناس