[drasd]

نظام الوديعة نظام موجود في كل البنوك لكن المشكلة تكمن في وجود فايدة على تمن العربية بمعنى مش عشان الفايدة 6 في المية يبقى اسلامي ولو بقت 8 في المية يبقى مش اسلامي الموضوع في كلام كتير وعن تجربة انا قعدت محتار لمدة اكتر من سنة وفي الاخر جبت حاجة مستعملة باعلى مبلغ اقدلر ادفعه كمقدم ولما ربنا يكرمني ابقى اجيب زيرو ان شاء الله.
عن تجربة عيوب اتلتقسيط كالاتي :
1- شبهة الربا ودي ترجعو فيها للشيوخ او لفتاوى التقسيط انا مش مفتي على شان اتكلم فيها
2- ان العربية بنظام القسط ايا كان وديعة او بدون لما بتتباع بتخسر جامد جدا يعني لو العربية مثلا ب 70 الف لو جيت حسبتها قسط على خمس سنين باعلى مقدم هايوصل تمنها حوالي 85 ولما تيجي تبيعها بعد خمس سنين هاتبيعها ب 55 يبقى انت كدا خسران حوالي 30 الف في خمس سنين طبعا دا مبلغ كبير جدا وتقدر تحسب مع نفسك الموضوع دا مع اي عربية واي مقدم واي بنك هتلاقي نفسك خسران في اعادة البيع
لكن اي عربية مستعملة لما هاتيجي تبيها عمرك ما هاتخسر من تمنها المبلغ دا بالكتير بعد ماتكون استعملتها مثلا 3 سنين هاتخسر من تمنها بالكتير 5 الاف جنيه لو انت محافظ عليها ممكن ماتخسرش انا اعرف واحد كان معاه لانوس لما جه باعها كسب فيها الفين جنيه وناس تانية بتبيع بنفس سعر الشراء لان في عربيات بتحافظ على سعرها في السوق لانها واخدة سمعة كويسة ومنتشرة وقطع غيارها رخيصة
3- العربية الجديدة ليها مصاريف صيانة دورية مجبر انك تعملها في التوكيل علشان ماتخرجش برة الضمان وكلنا عارفين التوكيل واسعاره والهمال والنصب اللي شغال في معظم توكيلات السيارت في مصر لكن المستعمل انت براحتك في التوكيل او برة ماحدش له عندك حاجة
4- القسط انت مجبر تدفعه كل شهر بغض النظر العربية انت بتركبها ولا لاء عطلانة ولا لاء محتاجة قع غيار اولاء عملت حادثة ومحتاج فوانيس او قطع غيار اولاء يعني من الاخر العداد بيعد عليك حتى لو العربية مركونة بايظة لكن المستعمل لو حصل لها حاجة واتركنت انت مش خسران لما يبقى معاك فلوس صلحها مش معاك دلوقتي مافيش مشكلة ماحدش بيجري وراك زي القسط
5- اقل قسط عربية في مصر زيرو مهما كان نوعها يبتدي من 500 جنيه لغاية زي مانت عايز وعدد سنين التقسيط خمسة يعني 60 قسط لازم تدفعهم طب هل لو انت جبت حاجة مستعملة معقول هاتدفعلها في ا لشهر صيانة 500 جنية مستحيل وحتى لو صرفت في اول شهريت تلاتة مافيش مشكلة بس مش هاتصرف 500 شهريا لمدة خمس سنين

عموما اللي انا قلته وجهة نظر شخصية مبنية على تفكير دام اكتر من سنة ودراسة لاوضاع السوق في مصر
وفي النهاية دي نصيحة لوجه الله تعالى وتبقى صلاة الاستخارة قبل تنفيذ القرار وربنا يوفق الجميع لما فيه الخير