[الصقر_الجارح]

بصراحة رد حضرتك صدمني بعض الشيء..أنا حسيت ان حضرتك بتهاجمني بدون سبب.

ولم يستدر عطفك أحوال المصريين فى العشوائيات اللذين يعانون من ضيق ذات اليد والأمراض وألم تزعل على مآل إليه سلوك غالبية المصريين من جهل وتخلف وإنتشار رهيب للبلطجيه والحراميه وقاطعى الطريق وغيره

حضرتك انا عايش في مصر وشايف أحوال البلد عاملة ازاي من فقر وجهل ومرض وجوع..ومش راضي بالوضع ده أبدا ونفسي مصر تكون من أحسن البلاد في العالم زي أي مواطن مصري.

وياما نزلت العشوائيات قبل كده لأسباب كتيرة وشوفت بعيني الكلام ده عالطبيعة.

وده مش معناه حضرتك ان أنا عاجبني أحوال البلد واللي احنا عايشين فيه!!


وكل بلد في العالم في الصالح والفاسد..مستحيل تلاقى دولة في العالم كل الناس اللي فيها كويسين 100% أو مفاش مرض أو مفهاش فقر..أمريكا نفسها ياراجل من أغنى الدول في العالم فيها فقراء!!

وبعدين أنا شاب مؤمن بالثورة رغم انني لم أشارك فيها(يوم 25 يناير) لأنني كنت بعمل عمرة في السعودية وقعدت فترة هناك وكنت اتمنى لو اني موجود في مصر ونزلت اشارك فيها.

ونزلت يوم 25 يناير 2012 وكنت بهتف مع الشباب يسقط حكم العسكر!!

وبعدين مين قال لحضرتك اننا مش زعلان على الشهداء وعلى دم شبابنا اللي راح؟!

يعلم الله اننا قد ايه تأثرت جدا في احداث بورسعيد اللي حصلت وكانت حالتي النفسية سيئة وكنت حزين عالي حصل!!

وبعدين يبدو ان حضرتك مفمهتش كلامي كويس..انا معاك ان حسني عمل وسوى ودمر البلد الــ 30 سنة اللي مسكهم وطبعا مش هوا لوحدو لا هو وولاده ومراته ووزراءه وحاشيته ووو..الخ..

ومعاك كمان انو يستهال الحرق مش الشنق..

انا مقولتش حاجة يتحاكم وياخد جزاءه في الدنيا غير حساب ربنا ليه في الاخرة..وزي ما قولت حتة انو دخل السجن دي لوحدها تسوى كتير اوي بالنسبة له كرئيس.

بس دا مش معناتو اننا انزل سب ولعن فيه وأدوس على صورته بالجزمة وأشتم بكلام خارج عن الأدب العام لأنو بشر مهما كان مش حيوان
وحتى من باب الأدب.

وكمان حضرتك انا مبساويش بين الدوس على صورته وبين دم الشهداء اللي راح.

دي حاجة ودي حاجة تانية.

وبعدين أعيد وأكرر أنا مش بدافع عنو ولا بأيده ولا أبرئه من جرائمه, أنا بتكلم بصفة عامة بغض النظر عن الشخص ده.

الحقيقه أخى الفاضل : الصقر_الجارح لقد جرحنى تفكيرك بهذا الشكل

بصراحة انا مش عارف أقول لحضرتك ايه اخي الفاضل..أنا اسف لو كنت جرحتك من غير قصد يعلم الله اني مقصدش حاجة..رغم ان اسمي المستعار لايعبر عني في الحقيقة.. بس اعتقد ان حضرتك مفمتش وجهة نظري كويس.

في النهاية أحب أقول لاحضرتك لا تنسى أن اختلاف الرأي لا يفسد للود قضية, وسامحني لو كنت أخطئت عليك بكلامي ولكن يعلم الله اني مقصدش اني اجرح حد او اغلط فيه..

والسلام عليكم ورحمة الله.

أخوك

خالد.