بفضل الله تعالى .. واخيرا وبعد طول انتظار , رزقنى الله تعالى بعربية كيا برايد هاتش باك .. وى ى ى ى ى ى ى ى ى ى ى ى ى ى ى ى ى ى ى
مواصفاتها كالآتى :
موديل 97 , موتور 1300 cc استيراد , فبريكة دواخل فقط , من برة رشة نظافة , بس فيها خبطة بسيطة فى الباب الامامى معمولة سمكرة ومتظبطة , ومجهزة للتكييف لكن مافيهاش, العربية من جوة الكابينة محتاجة شوية تظبيطات بسيطة , لكن الاساسيات سليمة , اللون احمر ..بالمناسبة انا سميتها طماطم
, سعرها 26500 .
المهم بقى فى شوية حاجات عايزة اعرفها :
1- هل سعر العربية كدا غالى ولا كويس , يعنى انضحك عليا فيها ولا ايه الحوار
2-روحت امبارح اسأل على الانذار والفصل اللى بيخلى العربية تفصل بعد عشر ثوانى من تشغيلها وماتشتغلش الا لما ادوس على اللوك بتاعها المهم بعد كلام كتير مع البائع قالى ب250 الجهاز بتركيبه بحاجة اسمها كتاوت , الراجل بصراحة عفرتنى جدا لانه خدنى فى السعر وحدة وحدة , وعمال يتكلم على الامانة والثقة وبعد كده يروح مزود عليا , لما لاقانى وافقت على سعر الجهاز راح مزود حكاية الكتاوت دى (معرفش اسمها صح ولا لا) المهم حبيت اعرف سعر الانذار بالفصل بالتركيب كام بالظبط , وواحد امين قريب من المطرية .
3- المراية اللى فى الوسط من الداخل ,الحجم الكبير سعرها كام واركبها عند مين ؟ والمرايات الجانبية عايزة اصلحها , بردو عند مين ؟
4-الفرشة الغريبة اللى بانضف بيها العربية , بصراحة البياعين استكردونى فيها قوى , خامة زى ال.... وواحد يقولى 25 والتانى يقولى 35 و 45 , من خنقتى منهم ماشتريتش حاجة ومشيت .
5- الكاسيت اللى عندى قديم وبايظ , اصلحه احسن ولا اجيب جديد , مع العلم ان الجديد اللى سألت عنه سعره يبدأ من 135 الى 600 , بيقولولى انجليزى تجميع مصرى , بصراحة مش مقتنعة باللى بيقولوه ده (الصنع والتجميع) , مصرى اه انما انجليزى تجميع مصرى
الله اعلم , المهم ايه افضل نوع تسجيل اجيبه (فى حالة شراء جديد) واركبه عند مين ؟ مع العلم انى محتاجة فيه استخدام الشريط والفلاشة فقط , وطبعا الراديو , انما كارت الميمورى لا احتاجه , والسعر المناسب ليه كام ؟
6- غطا العربية بردو سألت فيه ولقيت ب75 و 130 و 135 , اللى ب75 ماعجبنيش , لان خامته وحشة جدا وحرام فيه الفلوس , اللى ب130 كان قماش على مشمع وده اللى عجبنى بس سميك شوية , اللى ب135 من برة مشمع خالص ومن جوة عليه طبقة المفروض انها قطن وفيه استك من الطرف , وده بردو عجبنى , بس سمعت ان المشمع بيطقطق فى الصيف , فكرت اجيب قماش وافصله لقيت ان التكلفة شبه متساوية الى حد ما , اقترحت عليا والدتى انى اجمع كل القماش القديم اللى عندنا واعمل منه الغطا , وطبعا شكله مش هايكون حلو , الغرض من كده انه مايتسرقش وبالتأكيد التكلفة هاتكون صفر لان القماش كله هايكون من البيت , الصح اللى المفروض اعمله فى الموضوع ده ايه .
لو فى اى نصيحة انا مستعدة لسماعها , معلش طولت عليكم .
كفاية كده عشان اكيد وجعت دماغكوا ....
سلامووووووووووووووووووووو ووووووووو عليكووووووووووووووووووووو وووو