سلام الله عليكم
- العربية دي أول ما نزلت وهي لافتة نظري بشدة لكن لم يتسنى لي رؤيتها عن قرب
فضلا عن ركوبها
- النهاردة كنت في مول العرب وفي معرض السيارات هناك شفت الداستر وقولت يا واد دي فرصتك
- المهم ذهبت وشفتها وكانت دي ملاحظاتي
- أول حاجة شوفتها وهي الأساس اللي كنت رايحله هو صاج العربية
العربية مش ورق زي ما الكثير معتقد وصاجها ناشف صحيح ليست بالقوة التي
تتخيلها ولكن ليست بذلك الضعف المشين
- منظر العربية جميييييييييييل جدا وأعتقد ده هو اللي فارقها كثيييير عن سيارات
أخرى كالكارينز والتيجو
- السيارة عالية عن الأرض علو حسيت أنه فيه تناسب جميل لحجم السيارة لأنها مش
عالية أوي زي اللاندكروزر ولا هي عربية سيدان عادية علوها مناسب جدا لسيارة
دفع رباعي من الحجم الصغير حتى علشان ثبات السيارة
- سميت الله ودخلت وهنا تذكرت أيام السعودية واللاندكروزر داخل وإنت واقف
وكمان بتنزل من العربية وإنت واقف ومفيش داعي توطي لدرجة إنك تبوس الأرض
قبل ما تدخل
- المهم الدواخل خامتها جيدة إلى حد كبير وليس كما يصور على أنها بلاستيك ردئ
- الجلسة في السيارة مريحة وكاشفة الطريق كويس جدا وتحس فعلا إنك بداخل سيارة
دفع رباعي
- لكن وسع السيارة من الداخل إختلط علي الأمر فيه
فياريت الناس ملاك السيارة واللي عايشين فيها يوميا يفيدونا في المسألة دي لأني بصراحة بقيت محتار هل هي واسعة ولا مش أوي ربما لأني كنت بقارنها بحاجات أوسع
- وهنا عايز أسئل سؤال هي المسافة بين الكرسيين الأماميين مكان الكونصول
وعصاية الفتيس مريحة وواسعة ولا ضيقة لأني حسيتها إنها عادية ولم تختلف كثيرا
عن سيارتي الداتشيا97 ؟
- العدادت شكلها جميل لكن التابوه يا ريت ينزلوا التعديل اللي نازل جديد للعربية دي
لأن شكله مش ولا بد كما أن الدركسيون تصميمه إلى حد ما سئ وكان ممكن يتعمل
شكل أحسن من ده بكثير
- جلست في المقعد الخلفي فوجدت المسافة كبيرة ومريحة
- هذه كانت تفاصيل زيارة صغيرة للداستر ولأني كنت في عجلة من أمري فلم أركز
في كثير من الأشياء
المهم الأن أني أصبحت في حال يرثى لها من الحيرة
فنحن ننوي بإذن الله شراء سيارة خلال عام إن شاء الله
وكنت ناوي على حاجة من إثنين
أوكتافيا فانتازيا مانيوال(لأني غاوي مانيوال)150.000
رينو داستر أعلى فئة 136.000
أنا من سكان الأقاليم والطرق معروفة كحال طرق بلدنا الجميلة
ونحن في حاجة لسيارة ذات عفشة قوية وهنا أكرر ذات عفشة قوية
لأننا متبهدلين بسبب العفشة
وتكون سيارة عملية لأن معظم مشاويرنا قصيرة من 1إلى 20 كيلو كحد أقصى في اليوم وأحيانا قليلة نحتاجها للسفر لمسافات طويلة
وأنا هنا بين نارين
الأوكتافيا الألمانية ذات الوقار والكماليات الكثيرة والعفشة القوية
والثبات اللامتناهي وسيارة مجربة وقطع غيارها متوفرة
وبين الداستر رباعية الدفع والعفشة القوية والأداء القوي يعني من الأخر هبهدلها في أي طرق مش هتزعل لكن مع غمار تجربة سيارة جديدة من حيث توافر قطع الغيار
والصيانات
فماذا تقولون فيما أنا فيه؟