رد: نظره على الأحداث
نقول تانى
المجلس العسكرى بعد ماتسلم السلطة وقال انه متفهم مطالب الثوار ومؤمن بمبادىء الثورة حصلت حاجات خلت الناس تتشكك فيه نواياه
منها على سبيل المثال
تأخر محاكمة مبارك وقتلة الثوار
محاكمة عسكرية لناشطين سياسين و محاكمة مدنية لمبارك وأعوانه
تيه الفترة الانتقالية فلا تعرف أخرها امتى ولا الانتخابات هتم فى اى شهر وتأجيل علطول
بطىء شديد فى اتخاذ القرارات وترك ديل لكل مشكلة وتعليق المواضيع دون البت فيها
طيب وايه اللى حصل ؟؟؟
اللى حصل ان القوى السياسية متمثلة فى اسلامين ولبراليين وسلفيين ضغطوا على المجلس وقالوا لازم الموضوع يتحط له حد ونعرف السلطة هتسلم امتى والاتنخابات هتم امتى واقترح بعض من يحتمل ترشحهم للإنتخابات بجدول زمنى لتسليم السلطة .
طيب ايه اللى حصل تانى ؟؟؟
محصلش حاجة والمجلس مردش بحلو او وحش وساب الموضوع معلق
قوووم ايه اللى حصل كمان؟؟
الدكتور على السلمى طلع لينا بإيه ؟؟ طلع بوثيقة سماها وثيقة المبادىء الدستورية او فوق الدستورية
طيب فيها ايه الوثيقة دى ؟؟
الوثيقة فيها شوية مبادىء لا يجوز تغييرها ولا الاستفتاء عليها وحط فيها شوية صلاحيات للمجلس العسكرى تجعله لا يسأل عما يفعل
طيب وعلى السلمى ده بيشتغل ايه ؟؟
على السلمى بيشتغل موظف انتقالى فى حكومة مؤقته غير منتخبة شغلتها الأسالسية تصريف الاعمال يعنى مش وضع دستور ولا تشريعات ولا قوانبن
يعنى على السلمى ده ملوش شرعية ؟؟
ايوه ملوش شرعية
طيب والقوى السياسية كان ردها ايه ؟؟
كل القوى بلا استثتاء رفضت الوثيقة منهم من رفضها شكلا وموضوعا زى السلفيين ومنهم من اراد تعديل مواد فيها زى اللبراليين ومنهم من اراد تعديلها بشكل كامل وجعلها استرشادية وتضمينها وثيقة الأزهر زى الأخوان
طيب والمجلس العسكرى لما لقى الدنيا مولعة كده عمل ايه ؟؟
معملش حاجة عادى طنش ولا كانه يعرف ان فيه وثيقة من أصله
قوم ايه اللى حصل ؟؟
التحالف الديموقراطى والسلفيين حذروا ان لم يتم سحب الوثيقة هيخرجوا بمليونية يوم 18/11
طيب المجلس عمل ايه بعد كده ؟؟
معملش حاجة برضه وساب الناس تتخبط فى على السلمى وعلى السلمى اصر على موقفه من عدم تعديل الوثيقة
يعنى كده ؟؟؟ ايوه كده
طيب قوم الاسلاميين خرجوا بمظاهرة منظمة لسحب الوثيقة والمطلبة بجدول لتسليم السلطة و ابرزت قوتهم وكانت اكبر مليونية بعد مليونة التوافق الوطنى وخلصت المليونية
لكن فيه ناس فضلت معتصمة
جت الشرطة
وتعدت عليهم بعنف وبطريقة غبية وكأن الشرطة كان ليها تار عند الثوار
فحصلت المواجهات
والدنيا ساحت
واختلط الحابل بالنابل
والمجلس العسكرى لسه محلك سر
وأخيرا وبعد اجتماع 5 ساعات مع رموز القوى السياسية
طلع المشير بالبيان
وتوته توته لسه مخلصتش الحدوته
__________________
د / محمد
إن الله لا يصلح عمل المفسدين
|