السلام عليكم
اولا طبعا ربنا يستر على البلد ويعدى الايام دى على خير
انا كان معايا جولف 5 2008 ماشية 45000 كيلومتر وبعتها شهر 1 سنه 2011
بص ياباشا عربية جميلة جدا وثبات فوق الخيا (كنت بلعب بيها بلاى استيشن)
فخامة من جوا وجودة وشكل جميل من بره
احساس حلو انك راكب عربية قليلة وقطع غيارها متوفرة جدا
بالنسبة لقطع الغيار عادية مش غالية يعنى جبت فانوس خلفى اصلى استيراد ب 350 بس بتبقى فى حاجات استهبال شوية يعنى جبت مساحة خلفية ب250 طاسات الواحدة 200
من الاخر عربية حلوة معاك فى كل حاجة جرى فرامل غرز شياكة
مميزاتها اكتر من عيوبها لان عيوبها حاجة واحدة بس كبيرة اوى اوى وهى
الجيربوكس (الفتيس)
حرام حرام حرام
تبقى عربية بالجمال و القوة دى وتبقى فيها عيب كدة ومنتشر جدا
النصيحة
لو غاويها هاتها بس بشروط
اولا لازم تكون عربية كويسة جدا (عداد قليل / فابريقة / نظيفة من جوا / مش مخبطة كتير )
والاهم انك تكشف عليها فى التوكيل لازم
او تكشف عليها عند حد متخصص بس على كمبيوتر اعطال (بس نصيحة اكشف فى التوكيل علشان مش دايما عطل الفتيس بيبان )
متجبهاش خليجى وهاتها وكيل علشان لو لقدر الله حصل حاجة تقدر تروح التوكيل
عربيتى باظ فيها عقل الفتيس وسمعت اسعار كتير (برة التوكيل) 14000 و9000 و6000 وفى الاخر صلحتها ب 4000 ودة طبعا سعر التصليح مش سعر الفتيس
والاهم صلاه الاستخارة
انا تعبت اوى فى تصليحها وصلحتها وباظت ورجعت تانى للراجل وباظت واتخنقت معاه وخدت فلوسى وروحت لواحد تانى صلحها ب 4000 وقعدت معايا بعديها شهرين (علشان اتأكد انها اتصلحت )وبعدين بعتها
وبعد كل البهدلة دى ان شاء الله ممكن جدا افكر انى اجيب واحده تانية بس خايف
البدائل
هوندا سيفيك 2009 - مازدا الشكل الجديد 2010 - فيات برافو 2009 -
بالنسبة لفئات الجولف
بيزلاين وهاى لاين
الفرق
فتحة سقف - مثبت سرعة - مالتى فنكشن - زينون - جنوط مش فاكر اية تانى
سامحنى لو كنت نسيت حاجة والقرار يرجعلك انتا بعد الاستخارة
