رد: مابل اسباير و الانجلون و عجز ابو غالي عن اصلاحها
السادة الأفاضل
السلام عليكم ورحمة الله وبركاته
شفت ردود كتير وكلام أكتر عن السيارات الصينية الصنع الحقيرة والتى ترد إلينا من أفقر دولة فى العالم وأكثرها ضحكاً على ذقون المستهلكين .. وده حسب كلام بعض الناس
ولى رد فى كام كلمة ولو سمحتم لى .. مش حاقول ان السيارات الصينى مكسرة الدنيا فى مصر أو خارجها أو أنها راس براس زى الالمانى ولا أى حاجة .. ولكن .. هى قلة قطع الغيار وعدم انتشار العربية حكر على السيارت الصينية وحدها؟ وهل عجز التوكيل عن صيانتها برضه حكر عليها لوحدها؟
يا جماعة الخير .. من كان يؤمن بالله واليوم الآخر فليقل خيراً أو ليصمت
وبعدين ... شوفوا الأول مصداقية التوكيل وبعدين اتكلموا عن العربيات سواء صينى أو غيرها
وبعدين شوفوا برضه ان فيه ناس كتير عندها عربيات صينى من سنة 2005 وربنا مبارك فيها ..مش برضه كنتم بتقولوا مش حاركب صينى الا بعد 3 ولا 5 سنين؟ فيه عربيات صينى دلوقت عملت ما يقرب من 200 الف كم ولسه ماشية
وحاجة كمان نفسى ابوح بيها لكل من يتحدث هنا .. احنا فى منتدى عام وكل من يتحدث سواء بيطرح سؤال او بيناقش شكوى بيكون بيلتمس العون من أخوان له .. لكن عاوزه يسأل نفسه .. وبصراحة .. بيعمل ايه بعربيته؟ فلوسها حلال؟ بيصونها عشان تصونه؟ ويشوف بالمرة ما يمكن يكون محسود للأسف .. لأن فعلا الكحكة اصبحت فى يد اليتيم عجبة ومنهم لله من يحسدون غيرهم ويتمنون زوال النعمة من أيديهم
وولله الأمر من قبل ومن بعد فى وكلاء وتجار جشعين وفاسدين ونظام لا يراعى ابسط حقوق مواطنيه .. وشعب يمد يد الشماتة والاستهجان ولا يمد يد العون والنصح
وفعلا .. حمارتك العارجة تغنيك عن سؤال اللئيم
ولإدارة المنتدى كلمة أيضاً ... أنا عمرى 38 سنة وبادخل يومياً لأقراً الجديد هنا ... فإن كان للإدارة سلطة فى حذف الكلمات التى تسىء لنا نحن ملاك الصينى من نوعية كلمات زبالة .. أو غيرها أو اننا انضحك علينا .. فرجاء إلغاء المشاركة تماماً لأننا مش أطفال حتى نسمع من الصغار كلمات مثل هذه، لأن عيب كده بجد، وكمان حتى لا نفقد ثقتنا فى إدارة منتدى أعتقد أنه حتى هذه اللحظة محترم وصمم لخدمة أهل مصر كلها وليس ملاك فئة سيارات بعينها رغم ما نراه أيضاً فيها من عيوب
ولكم جزيل الشكر والتقدير
|