رد: كل واحد يقول احلي رحلة طلعها في حياته
لا والله مش اختبار للشخصية ولا حاجه
الظاهر ان الموضوع ببساطة شديدة جدا .... انا عايزة اتفسح!!!
فبشوف تجارب الناس عموما
لكن مش شرط ان يكون الرحلة خارج القاهرة او خارج مصر هو انا قصدي علي الرحلة وبس
وعشان اثبت حسن نيتي انا هاحكي عن احلي رحلة في حياتي
بصراحة انا كنت مشتركة في اتحاد الطلبة بس مشتركة بس بحسن النوايا مش اكتر
يعني صاحباتي لما كان بيبقي في حاجه الاقيهم هم مشتركين لي وانتو عارفين طبعا ... الصحاب لبعضيهم (بس متقولوش علية بقي من الحزب الوطني بقي وتطلعوني من الفلول في الاخر )
المهم وانا في سنة سادسة سنة 2002 لقيتهم بيقولولي في حاجه اسمها مشروع اعرف بلدك عامل رحلة لكل الكليات ، فين دي يا عيال ؟ الاقصر واسوان
اول ما قالو الاقصر واسوان كان لها وقع في قلبي لان والدي بيشتغل في اسوان وعلي الرغم من ذلك عمري ما رحت هناك!
المشكلة بقي ان المدة كانت اسبوع
بعد الكثير طبعا من المحايلات والقطرات المسيلة للدموع ومعلش يا جماعة وبالعكس انا هبقي جنبك يا بابا وافقو
علي فكرة هي كانت رحلة بنات بس
بالنسبة للمكان
وقعدنا في الاقصر 4 ايام
كمية معابد مهوووووووووووولة كل يوم نروح نتنقع في الشمس وواحد يفضل يقول كلام عن الاسرة ال18 والاسرة ال15 وانا كل اللي بفكر فيه حاجه واحدة بس
هم زميلاتي دول واقفين يسمعو الكلام دة كلة ازاي وابص في وشهم الاقيهم مركزين اوي ....فهمت ان اكيد العيب مني انا
ما عدا معبد واحد مش فاكرة اسمه بصراحة بس كان بيطل علي النيل كان منظر رااااااااااائع جدا جدا يمكن هو احلي حاجه في الاقصر
اما اسوان بقي مش هتكلم طبعا عن جزيرة النباتات الراااااااائعة والنيل هناك جميل جدا مفيش معابد كتير (مفيش وقفة في الشمس الحمد لله )هو الصوت والضوء بس وشكله سواء الصبح او بليل جميل جدا
وكان في جزيرة غريبة جدا اسمها جزيرة الموز
الغريب فيها اية بقي
ان علي الرغم من ان اسمها كدة الا اني ملقتش موز؟
الاحلي من الاماكن كمان بقي الصحبة
بجد اتعرفت علي ناس من الرحلة دي الي الان صاحباتي
كانت احلي الاوقات بقي بليل نطلع فوق السطح ونلعب كهربا ههههههههههه
الي الان الذكريات دي مش بنساها
عارفين الرحلة دي كانت بكم محدش هيصدق
ب 20 جنية
__________________
 بسم الله الرحمن الرحيم
وما كان ربك نسيا
صدق الله العظيم
|