رد: توهان فى دنيا النسيان
-7-
شعر توهان انه لديه رغبة أكيده فى تعلم القيادة وقيادة هذه السيارة الجديدة المميزة وألحت عليه الرغبة بقوة والعم توفيق يسوف ويؤجل الموضوع حتى رضخ لالحاح توهان
وبعد انتهاء توصيلة اليوم
استقل توهان القيادة00
ومع اول طلعة زمجرت السيارة وترجرجت فى عنف
قال توفيق بانفعال:
-بالراحة يا بنى
دوس بنزين بشويش واسحب دبرياج سنه سنه
على مهلك
وفعل توهان وأصبحت الطلعة اكثرا هدوءا ونعومة
سار قليلا بالسيارة وكان فى منتهى الغبطة والسعادة !!
ولم يمر كثيرا حتى قال توفيق:
-كفاية كده النهارده نكمل بكره
انت غشيم ورجلك تقيله وربنا يسترها على العربية
أخذ توهان يحلم بانه اصبح سائقا يستقل بسيارة ويجمع الجنيهات للاستعداد للسفر الى الخارج
لابد وان يتقدم فى القيادة بسرعة حتى يتخلص من رزالة توفيق
وفى المساء وبعد يوم عمل شاق00
ارتدى ملابسه وسار فى المنزل كالديك الرومى المنتشى أمام والده فقد مرّ أسبوع وهو يعمر فى العمل الجديد 00نظر اليه والده بقرف وقال:
-على فين يافالح
-ح أفك شويه
-يابنى عندك شغل الصبح
-كلها ساعة وارجع
-أكيد رايح تقابل المقاطيع الصيع صحابك
ولم يعلق وانما خرج ليقابل صديقيه سمعان ونبهان على القهوة
جلس منتشيا وهو يضع ساقا على ساق
قال كالفاتح المغوار:
-تعرفوا يا زبالة انا النهاردة سوقت العربية وطلعت بيها المشوار كله
-ياراجل معقول
-طبعا مسألة نباهة وشطارة
مش زيكم آخركم عجلة
قال سمعان:
-ايوة يا سيدى اللى على على
-بس كلها كام يوم واسيب الراجل توفيق واشوف عربية أسوقها لحسابى
قال نبهان:
-لعبت يا معلم
-انا مبحبش قر المقاطيع والعواطليه ده
قال نبهان:
-خلاص يا أسطى00اتغريت من أولها
-مش مسأله غرور ولكن احساس بالعبقرية
قال سمعان:
-أمال لو سقت تيريلا حتكلمنا ازاى
-يابنى دى فترة مؤقته أجمع القرشين وأخلع
واستمر السمر حتى قبيل الفجر حتى قام توهان من على القهوة ودخل البيت على أطراف أصابعه وألقى بنفسه على الفراش ونام كالجثة فكلها ساعتين وتبدأ رحلة شقاء جديدة
تتبع
__________________
|