المشاركة الأصلية كتبت بواسطة moneer_marco
انا بأشكر حضرتك وسوف احكي موقفين حصلوا بالفعل واحد مع صديق لي والاخر معي
الاول:
صديقي كان معاه عربية لانسر ومركب فيها جنوط اسبور وهو ماشي علي الطريق السريع بسرعة 110كم خبط بالفردة اليمين في قالب حجري كبير وكانت النتيجة ان الجنط اتكسر والغربية طارت ناحية الشمال واتقلبت وبمعجزة لم يصاب احد بأذي والحمد لله
الثاني:
كنت ماشي بالليل في الصحراوي وفجاءة شوفت قوالب حجرية كبيرة وسط الطريق وكنت على سرعة 120كم فكان امامي اختيارين الاول اخد الحجارة وسط العربية ودة معناه تدميرها المهمم حاولت افاديها شمال على اد ما اقدر لكن خبطت العجلة اليمين في حجر كنت انا وابني 14 سنة فقط في العربية انا قات ضعنا خلاص ولكني شغلت الخطر ومسكت في الدريكسون جامد وانا وابني كنا حاطين الاحزمة وفعلا لم افعل شيئا غير ذلك ومستني قدري الي ان توقفت اليارة بسلام ومن خلفي سيارة نقل تقيل حس اني في خطر عمل عللى حمايتي من الخلف منع اي عربية تعدي الى ان توقفت انا ماسك في الدريكسون وسائق النقل جاء لي ونزلني وطمأني اني بخير المهم شوفت ايه اللي حصل في العربية لقينا ان الجنط متني ولان الفردة تيوبلس فنامت ده لان الجنط حديد مش اسبور انا حكيت هذه المواقف علشان الناس تستخدم الحاجة اللي مميزاتها اكثر
عربيتي فيرنا فيفا
واسف على الاطالة وربنا يحميكم ويحمينا من شر الطرق المصرية
|
اللي حضرتك قلته ده له تفسير علمي
أولا.. الألومنيوم عموما (أو سبيكة الألومنيوم بمعنى أصح) مادة أقل مرونة من الحديد.. وبالتالي لما تحصل صدمة في المعدن حيتكسر أو يتشقق.. إنما الحديد بينتني لإنه أكثر مرونة (وده على حسب نوع الحديد أو الصلب المستخدم)
بس حضرتك ربطت بين إن العربية اللي مركبة جنط ألومنيوم اتقلبت والعربية اللي مركبة جنط حديد متقلبتش، والحقيقة مش كده خالص
الموضوع ليه علاقة مباشرة بانتقال الوزن في لحظة الصدمة
خلينا نشرح أكتر...
عربية حضرتك ما اتقلبتش لإنك حاولت تفادي الحجر وتروح ناحية الشمال ... فالوزن كله راح ناحية اليمين... وبعدين أخدت المطب على العجلة اليمين برضو... كده مركز ثقل العربية كله على جنب العربية اليمين وبالتالي الحجر مستحيل يرفع العربية لدرجة الانقلاب
إنما العربية اللي كانت مركبة الجنوط الألومنيوم اتقلبت لإن الحجر جه تحت الجنب اليمين (الخفيف) لحظة ما كان بيفاديه... حضرتك ممكن تتأكد من صاحب العربية لإنه أكيد كان بيحاول يروح ناحية اليمين
أنا اتعرضت لنفس الموقف والحمد لله العربية ما اتقلبتش... بس طلعت على جنط استبن بتاع ميكروباص كان ماشي قدامي... وحاولت أفاديه وأروح على اليمين بس أخدته على العجلة الشمال
لو كنت أخدته على العجلة اليمين كانت العربية أكيد حتتقلب... بس الحمدلله ... لسه لينا عمر
...