انا اقولك القول الفصل ان شاء الله
لان انا كان معايا لانوس 99 زيرو كوري
و بعتها و اشتريت الافيو 2006 زيرو كوري
اولا : من حيث السواقة فهي هي..تاني هي هي...نفس الاحساس ونفس التقل على الارض و نفس السحب مفيش اي فرق
ثانيا : من حيث العفشة فاللانوس انعم بس في مقابل ده واطية على الارض ...يعني كنت بنزل اصحابي قبل مطبات بلدنا العظيمة ... الافيو بقه عالية متخافش عليها في المطبات بس في مقابل ده ناشفة بغباء..المطبات تحس انها بتخبط في عمودك الفقري
في الست سنين بتوع اللانوس مسمعتش صوت من العفشة
الافيو من بعد 20 الف و هاتك يا سيمفونيات
...خبط ورزع و تكة هنا و تزييقة هنا و مالهاش حل الناس كلها غلبت فيها
ثالثا من جوه : الافيو بدون شك اشيك و افخم في التقفيل بدون منازع و ان كان برده كراسيها مرفوعة كده زي اللوجان ...يعني اللانوس قعدتها اريح لو بتسوق مشاوير طويلة
رابعا : التوكيل هوه هواه ..كان زمان ابو الفتوح و كان احسن من منصور بكتير..و اقولك كلام في سرك لسه بيشتغل في اللانوس بس من تحت لتحت...اللانوس هتلاقي قطع غيارها عند السباك
انما الافيو الله اعلم ..و انا عامة لا اسأل في هذا لاني شاب توكيلاتي مبعملش حاجة برة التوكيل
خامسا : التكييف ...ست سنين في اللانوس مقربتش منه ...انما في الافيو مليته مرة في التوكيل بعد 3 سنين و كنت عايز املاه قبل ما ابيعها...و هو هواه...تاني هو هواه في الاتنين
سادسا: اعادة البيع اللانوس اتباعت في 3 ساعات ... وكسبت فيها على فكرة
...يعني ايه؟ كنت شاريها ب 41 الف سنة 99 و بعتها ب49 الف سنة 2006 و ده لانه حصل طفرة جامدة في اسعار العربيات في مصر في الوقت ده
اما الاخت الافيو فاتباعت في 3 ايام و خسرت فيها طبعا ..يعني كنت شاريها 2006 ب 69 الف و بعتها 2011 ب49 الف ... وده لانه كله كان بيقول الشكل القديم طب ما ازود الفين تلاتة و اجيب الشكل الجديد
علما بان العربيتين كانوا في حالة ممتازة و الاتنين راشين بره نضافة و ولا واحدة كانت محتاجة مليم احمر لاني بعمل صيانتي حسب الجدول و زي الكتاب ما بيقول
وانا زعلت على اللانوس لما مشيت...بس موش حاسس بذرة ندم على الافيو
النتيجة : من غير تفكير اللانوس احسن مييت مرة
اللي يقوللك العربيتين هما هما غلطان...اللانوس برقبتها
على الاقل هتوفر على نفسك 9 الاف فرق انت اولى بيهم
و اللانوس شكلها موش هيتغير (128 القرن الواحد و العشرين) فتهبيعها بمنتهى السهولة لو فكرت في اعادة البيع .. و بيسموها في السوق طابع البوستة
بس لو عايز رأيي
زود 10 لاف لو تقدر و هات الريو او النيو اكسنت او حتى الصني
و انت الكسبان
و يارب اكون افدتك ... و عايز اسمع رأيك
و تقبل سلامي
