[تامر ديزل]

عملية زرع مهندس جديد او ملاحظ جوه الورشة عمليه صعبه جدا وانا بشبهها بالعملية الجراحية لان العمل بيكون محتاج المهندسين الجدد او الملاحظين ولكن بيحصل عملية رفض مكتومه للقادم الجديد من السكان الاصليين اللي هما فريق العمل الاصلي بمهندسينه وعماله
زي جسم المريض اللي محتاج زرع كلية مثلا بيحصل انه الجسم بيرفض الكلية المزروعة مع انه محتاجها
المهم لما الفريق القديم بيفشل في انه يزهق المهندس الجديد بيغير خطته ويبتدي يدبح له القطه ازاي ؟
يقولوله احنا هانعمل صفقه احنا موافقين ان انت تشغلنا رغم عدم خبرتك بالعمل وزي ما بتشغلنا تجيب لنا حقنا
ايه هوا حقهم ؟ اي حاجه وكل حاجه واي طلب عاوزين اجازات بالكوم وزيادة مرتبات وعده (ادوات ) وهدوم شغل وغيره .....
غالبية المهندسين الجداد بيبلعوا الطعم ده وبدل ما انت جايبهم علشان يدوا روح جديده للمكان ونشاط اضافي بيتحولوا الى اداه للصداع
الاسبوع اللي فات صنايعي سرق عده من عربية (كوريك ) وحطه في عربية سواق تاني المهم الموضوع اتكشف وبقى امر واقع اني اجازي الصنايعي بدون مناقشه
لقيت المهندس الجديد شغال تليفونات عليا اصل حقه اصل ده صنايعي شغال دا هوا الوحيد اللي بيسمع كلامي
في الحالات دي دايما بيكون ردي ان احنا ننسى اللي فات (الجزاءامر واقع يرضى بيه المخطئ وينسى انه يتلغى ) انس اللي فات وفكر في اللي جاي