اهلا بيك
اولا انا مش خبير قوى ، لكن بقالى 3 شهور بدور على عربية وتقريبا سألت فى كل حاجة
ثانيا : متاخدش برأى واحد بيقولك هات العربية دى ، فى الغالب عنده نفس العربية وبيسوقها
واللى ينفعله مش بالضرورة ينفعلك
بإختصار شديد اظن انسب حاجة ليك اليابانى ، عربية محترمة وتستحمل السفر والذى منه ، متنساش ان عندك اربع اولاد ربنا يخليهوملك
قطع غيارها معقولة وبتعيش . يفضل وبشدة 1600 سيدان لزوم السفر ، عندك اربع اولاد وهتحتاج موتور عفى وعربية تشيل
بالنسبة للمبلغ اللى معاك يفضل انك تزوده شوية ، لأن معظم العربيات فى فئة 70 الف مش هتسد معاك
من رأيى الشخصى افضل حاجة هى الصنى ، لو عرفت تجيبها زيرو وتقسط الباقى خير وبركة ، او ممكن تجيبها كسر زيرو بالمبلغ اللى معاك
وابعد كل البعد عن المستعمل ، حوار موتور وبورسعيد ده موضوع كبير ، وانت فى غنى عنه
وعشان تبقى عارف ليه رشحتلك اليابانى
الألمانى غالى وقطع غياره غالية ، فنبعد عنه
الكورى شغال ، لكن مش هيسد معاك زى اليابانى ، فى الغالب 3 او 5 سنين وهتلاقى العربية ودعت منك :-s
الصينى طبعا لا يعتمد عليه على الاطلاق
الماليزى (بروتون) تقريبا نفس فئة اليابانى او اقل سنة ، وال (بيرسونا) فيها كل حاجة موجوده فى الصنى وفى نفس السعر ، ممكن تبص عليها برضه
اخر نقطة بعيدا عن العربية ، لو هتقسط يفضل تدور على تقسيط اسلامى ، خصوصا انك هتدفع حوالى 70% من ثمنها ، عشان ربنا يباركلك فى العربية