رد: ** رأيي الشخصي -الميني فان هوجه لن يكتب لها النجاح **
موضوع رائع يا احمد باشا ... و اقدر اقول ان وجه نظرك تتفق عليها الاغلبيه ...
بس احب اضيف وجهه نظري بأعتباري احد ملاك ال MPV
مبدئيا بخصوص الماتريكس فأنا متفق معاك تماما ان سبب شراها الاساسي اول ما نزلت كان نقطتين :-
1- السعر المنافس جدا في السوق ساعتها ( كانت ارخص من النيو اكسنت مش من الالنترا بس )
2- البعض كان بيبص لها على انها 4×4 صغيره ... ويركب دفندرات و يبقى كده راكب 4×4
و الدليل ان النهارده الماتريكس الجديده بقت قليله جدا قصاد الاقبال القوي على الالنترا ( فرق 3000 جنيه ) و كمان الاكسنت ابتدت تنتشر عنها ( لأنها ارخص - 77 الف للأكسنت مقابل 90 الف للماتريكس )
انا عن نفسي لما اشتريت الماتريكس اوتو كانت ب 84 الف في 2007 ... وفكرت في الالنترا ... موتور اقوى و احدث .. تصميم احدث ... شنطه اكبر .. برسيتج اكتر .. و 15 الف جنيه زياده في السعر !!!! و تحجز و تستنى دورك ... لو كان الفرق زي دلوقتي كنت جبت الالنترا ..
لكن مش هي دي بس الاسباب اللي تخلي الناس تشتري الماتريكس ... او التفكير في عربيه MPV ...
MPV معناها Multi Purpose Vehicle ... او عربيه متعدده المهام ..
ودي حقيقه فعلا ...
انا سافرت شرم الشيخ رايح جاي بالماتريكس ... وكنت مستريح جدا بسبب طبيعه الجلوس المرتفعه ... لا ضهري و لا رجلي و جعوني زي اي عربيه سيدان .. وبالتالي فال MPV مريحه عن السيدان سواء في الجلوس او راحه القياده ...
تقدر تشيل فيها نوعيه من الكارجو متقدرش اي عربيه سيدان عاديه تشيلها ..
شلت فيها غساله اطباق من الحجم الكبير ... كأنها بقت عربيه ربع نقل ...
بتنفعني في شغلي زي ما بتنفعني في بيتي زي ما بتنفعني مع اولادي ...
يعني من الاخر عربيه عمليه جدا و فيها تنوع في امكانيات الاستخدام متقدرش عليه اي عربيه سيدان ( ده رأيي الشخصي من واقع التجربه ... )
الشكل طبعا صندوقي الابعاد .. لكن الاداء و الامكانيات متوفره ... الموتور هو موتور الفيرنا و الالنترا 2006 ..
والاوبشنز اوبشنز غبور اللي في اي عربيه هيونداي ... لكن التفوق الحقيقي في العملانيه .. وفي تصميم بينن فارينا الذكي داخليا ptmnlo123per154
مع انه خارجيا تصميم غير عاطفي بالمره ..لكن دي طبيعه اي MPV للأسف .... كشك ptmnlo123per172
طبعا مفيش متعه قياده السيدان او الهاتشباك ... مفيش الاحساس بالاقتراب من الطريق و امكانيه المناوره .. لكن المعادله بتحقق الراحه و الهدوء على حساب متعه الاداء ...
سبب تاني ان النهارده مفهوم العربيه التانيه للاسره انتشر جدا عن الاول ... فوارد جدا ان اللي يفكر في عربيه تانيه يفكر في مفهوم مختلف عن السيدان ... خصوصا لو كانت عربيه الزوجه .... بقى الاتجاه انها تكون عربيه عائليه مريحه في سواقتها و قاعدتها ...سلسه وسهله في قيادتها في المقام الاول ... مستوى رؤيه مرتفع يكشف الطريق و ابعاد مضغوطه
نقاط فوق الحروف :-
صعب جدا تلاقي شاب في العشرين راكب ماتريكس و ان كان اغلب اللي راكبين ماتيريا هما الشباب !!
اغلب ملاك الماتريكس .. الزوجه كعربه ثانيه ... كبار السن فوق الاربعين ... السياره الوحيده لعائله من زوجين و اطفال صغيره في السن ...
اغلب ملاك الافانزا .. عائلات كبيره الحجم 3 اطفال او اكثر .. مع وجود جد او جده ...
الرومستر - فين لما اشوفها ...
السوران الناس بتهرب من الوكيل و انها صيني و تقنيه قديمه .. لكنها موجوده ...
اللوجان مش mpv
الكارينز لسه نازله ... لكن اتوقع لها استلام الشعله لأنها ميني فان و ليست MPV صغيره .. و بالتالي هي اكبر من الماتريكس و الماتيريا .. و يعتبر سعرها منطقي
اعتقد ان شعله الماتريكس انطفأت بسبب التسعير الخاطئ ... ولم تشتعل للماتيريا او الافانزا نار حتى تخبو ...
أعتقد ان ال MPV مش مجرد موضه وخصوصا ال ميني فان (الحجم الاكبر ) ... لكن احنا بنقيس العربيه بشكلها و حجمها ....
وده اللي يخليني اقتنع ان الكارينز حيكون ليها حصه محترمه من السوق .. خصوصا انها مش من نمط الماتريكس و الماتيريا و لكنها اقرب للرينو سينيك و السيتروين بيكاسو .. مع فارق السعر
هي اكيد مش حتطغي على السيدان ... ابدا ... لكن حنحس بانتشارها زي ما كانت الماتريكس من 3 سنين ....
السوق بقى اكثر استيعابا لأنماط مختلفه ... و التنوع في العقليات و الثقافات اصبح سبب في تنوع فئات العربيات في مصر ...
لكن عموما العقليه المصريه مازالت تقليديه ...
وتبقى الغلبه للسيدان ...
ويبقى مفهوم السعر ... مقابل .... الحجم ptmnlo123per160
__________________
من تواضع لله رفعه The ultimate car would be designed by Italians engineered by Germans built by Japanese &
|