[فادي مكرم]

احلى سلام لأحلى منتدى فى المحروسة

ميين فينا قال الجملة دي بحرقة مرة ؟؟؟
كلنا, صح !

الموضوع عبارة عن تفريغ هم مكبوت جوايا
وهتكلم على اصابات العربية وهي واقفة "حتى لو تحت بيتك"

كما عودتنا ثقافة اسمنت اسيوط واعلاناتها "سيـــــــــــــــــــــــ ـــــب بصمتـــــــــــــــــك"
وبصمتك دي بقى كبيرة قوي فى مخ الابطال الصغار "عيال الشارع" ومعللقة معاهم

الواد بيجرب كل حاجة فى عربيتك
من فك وتركيب , رسومات تجريدية , و خرابيش مؤذية
وكمان نقر فى الصاج لما بيكون مضايق حبة

انا هحكيلكم اللي شفته.......وعارف ان اللي يشوف بلاوي الناس تهون عليه بلوته

اول يوم جبت العربية فيه كنا لسه ساكنين فى غبريال "منطقة شعبية" و كنت ببص عليها كتير والعربية كانت جديدة على العيال ف الشارع ومش بيجو جنبها عشان لسه ميعرفوش صاحبها

اول صدمة كانت بعد 3 اسابيع تقريبا لاقيت بتاع 8 عيال مقسمين نفسهم على الكبوت 3 والشنطة 3 و اتنين بيغنوا على السقف ,,, وسيد يا سيد

انزل يا كابتن , انزل يا كابتن
واعدل السقف من جوة وعدي يومك على كدة
غير الناس اللي بتحط عيش سخن
ولو معاها كيس ولا حاجة تقيلة , تريحها ع العربية اوووووووووف

نيجي لجوفاني .....جوفاني دة ابن الراجل اللي ساكن فى الارضي وعنده 4 سنين
الواد دة علم عليا كتييييير
مرة فك المساحات و الدراعات و غسل العربية بالجيير وخلع النمر اللي قدام وخباها تحت سريره
وبعد مناقشات اخدنا النمرة منه بكيس شيبس "دى عملية تبادل او مقايضة"

المهم اخدنا شقة الحمد لله فى ميامي فى منطقة هادية وشارع سد يعنى مفيش صوت ولا حسسسسس هدوووووووووء

وجات فترة الصيف والكارثة............. ميامي برضه فيها عيال ف الشاااارع
بس دول من ميامي يعنى مش عربجية
العيال هنا مش هتقول سيد يا سيد , هنا بيلعبوا مصارعة والواد بيطلع ع السقف و يعمل لصاحبه فينيش

قلت بسسسسسسس انا اجيب غطا و يومين هيتملا تراب و محدش هيقربله
بقوا بيكتبولي اغسله يا معفن
النهاردة بقى لاقيتهم
مقطعين الغطا بمفتاح شقة مربعات X , O ع الكبوت و بيجيبو ظلط ويلعبواا

قلت لا انا لازم احكيلكوا عشان انتم كمان تحكولي واعرف انى مش لوحدي اللي بيتعمل فيه كداااا


اهى دي مثلا بنطة وهتخسرك دهان فبريقة

لوحة فنية

هههههه تعطير ببلاش

الله الله هي وصلت لكدة ؟ ايوة دول جبابرة ويعملوها

حتى شوف لسه هيوطي ويبص ع النص جنيه اللي وقع منه !!