[alymonir]

: shwt:
السلام عليكم و رحمة الله
نلتقي مرة أخرى و حلقة جديدة من حلقات تقارير صيانة المازدا و هي الأسوأ في تاريخي مع التوكيلات ( و مع أي حاجة في الدنيا )
اختصار الموضوع
زفت
كان هذا هو الموجز و إليكم الأنباء بالتفصيل:

طبعا زي ما انتم عارفين إني عملت صيانة ال 1000 في مركز خدمة أبو رواش ( اللي هو الوحيد في جمهورية مصر العربية حتى الان !!!! )
الهم أنا قلت أتذاكى المرة دي و أوفر مشوار القاهرة و أروح مركز خدمة هيونداي غبور في الأسكندرية لأني كنت سألتهم قبل كدة قالو إنهم بيعملوا الصيانة الدورية فقط و ليس الاصلاحات
المهم كان يو ما يعلم بيه إلا ربنا و كنت مروح من وردية ليل (12 ساعة ) و مدروخ بس قلت مش مشكلة , كله في سبيل العربية علشان الكيلومتر ما يعديش و عمو غبور يزعل مني ولا حاجة
المهم اتكلت على الله و قلت هي كلها ساعتين و لا حاجة يعدوا بالطول أو بالعرض و شديت الرحال على التوكيل
دخلت الساعة 8:45 و الحمد لله أخدت رقم 12 و استبشرت خير إني مش حاقعد كتير
المهندس جه استلمها مني بعد حوال 10 دقائق , و مش عارف ليه تحس إن المهندسين عاملين زي أم العروسة فاضية و مشغولة ... ما علينا
أول القصيدة عند تقدير التكلفة المبدئية للصيانة قالي إنها حاتتكلف 360 جنيه زيت و فلتر و مصنعيات 320 جنيه !!!!
طبعا أنا صعقت من المصنعيات دي 320 جنيه لييييييييييهههههههه؟؟؟
دة المفروض إنه حايغير زيت و فلتر و يربط عفشه و يشيك بس على العربية
قلتله طبعا دة كتير جدا بس للأسف نتيجة إن باتكلم بالذوق و الأخلاق ( و اتضح بعد كدة إن دي طريقة غير مناسبة في التوكيلات و خصوصا غبور ) قالي إنهم ممكن يعملوا خصم على المصنعية عند دفع الفاتورة
المهم قلت يا واد بلاش مشاكل و مش طالبة خناق لأني اتدبست في التوكيل و اللي حصل حصل حاعمل إيه يعني ؟؟!!
لفت نظري إن الزيت و الفلتر عاملين 360 جنيه مع إني كنت مغيرهم في أبو رواش ب 305 فقط من حوالي 5 شهور
و كان معايا الفاتورة الأولى اللي مكتوب فيه الكلام دة راح الراجل علشان يسكتني راح مغيرها في ورقة المقايسة ل 305 جنيه و قالي اتفضل ( في الصالون ) استريح و حاتستلم العربية إن شاء الله قبل الساعة 11:30
رحت زي الشاطر بصارع النوم لمدة ساعة و نص تقريبا لحد ما قالولي إن العربية خلصت و دة كان حوالي الساعة 10:30 ( أعتقد إن دة ميعاد كويس , و دي كانت الحاجة الكويسة الوحيدة في الموضوع )
طبعا دخت على المهندس علشان يعملى الخصم الموعود في المصنعيات حسسني إن الموضوع كبير أوي و دخل لمدير المركز و غاب عنده و في الاخر عملي خصم 10% على المصنعية يعني حوالي 30 جنيه , يا بلااااش
طبعا أنا كان دمي محروق أصلا و عايز أنام فقلت بلاش لبش خلاص عوضي على ربنا
المهم و أنا بادفع الفاتورة زي الشاطر لقيت المحاسب بيقولي إن الحساب 698 جنيه
يا نهار أبيض !!!!!!
هو أنا داخل توكيل مرسيدس و أنا مش واخد بالي ولا إيه ؟؟؟
زيت و فلتر ب 700 جنييييهههه ؟؟؟؟؟!!!! يالهوي
قلت له ليه ؟
قالي يافندم الزيت عامل 295 جنيه و المصنعيات عاملة 320 جنيه و بعد الخصم 298
قلت له إن الزيت أنا مغيره ب 227 جنيه من 5 شهور
قالي إنه غلي بقى ب 236 جنيه و بعدين دول حطولي 4,5 كجم يعني زودوا ربع الكمية
المهم رجعت للمهندس تاني فقالي إن العربية بتاخد أكتر من 4 كجم و لازم علشن يكمل المقاس يزود و يفتح عبوة 1 كجم
قلت له يعني بتوع أبو رواش دول مابيفهموش حطولي 4 كجم بس من 5 شهور و أنتو اللي بتفهموا أوي عملتوا الصح ؟؟
طبعا قعد يتحجج و لازم يثبتلي إن هم صح و قالي يمكن في أبو رواش زودولك من عندهم علشان هم مركز كبير و ساعات بيكون عندهم زيادات أكتر من عندنا
المهم أنا مش مقتنع أصلا لحد دلوقتي إن الموتور بياخد أكتر من 4 كجم لأن دة موتور 1600
المهم فاض بي الكيل و دفعت الفاتورة و توكلت على الله علشان ما أرتكبش جناية لأني كنت عايز أنام جدا و حاموت من التعب
بعد ما رجعت البيت دمي غلي و فار أكتر و قررت أني ما أسيبهمش خصوصا إن المصيبة إني سألت مركز خدمة أبو رواش في التليفون و أنا مروح في السكة قالولي إنها بتاخد 4 كجم زيت فعلا و إن صيانة ال 10000 كم بتتكلف كلها 570 جم فقط ( طبعا دة برضه كتييير )
حد عندة تفسير منطقي للي حصل دة؟؟؟1
أنا عايز رأيكم و مشورتكم في اللي حاعمله لأني قررت أكون إيجابي فقررت الاتي:
1- عمل شكوي لجهاز حماية المستهلك
2- إرسال e-mail لشركة مازدا في اليابان
إيه رأيكم هل لو عملت كدة حاخد حقي من الناس دول ولا لأ؟؟
بسرعة الردود يا شباب علشان دمي محرووووق