المشاركة الأصلية كتبت بواسطة mmffor

يا اخي الاراء اجتمعت على الصني لو ممكن توفر ثمنها لانها فعلا سيارة ممتازة

الفيرنا كانت حلوة و كنت دايما برشحها ايام ما كانت ب 62 الف لكن 71 الف على فيرنا - انسى يا غبور

الام 11 اسبيرانزا عربية انا كنت معجب بيها لكن قطع غيارها مش متوفره حتى في التوكيل و عيوب صناعة و تقفيل كتيره جدا فيها! فممكن حظك انك تشتريها و تبات بيها عند التوكيل كل اسبوع يومين تلاته فده شغل تكدير مش زيرو

اللوجان عربية عملية برغم ان سعرها رفع مؤخرا اللا انها لا تزال منافسه بعض الشيء و يعيبها ارتفاع اسعار قطع غيارها لو لا قدر الله حصل تلف بسببك لكن لو انت حتجيب قسط يبقى في تأمين يعني لو حادث التأمين حيشيل لو عيب صناعة يبقى التوكيل حيشيل فمفيش مشكله لمدة 3 سنوات لكن لا يمكن ان تقارن بالصني لان فئة الصني تقارن في المحرك و الصالون بالميجان و ليس اللوجان!!

البي واي دي عيبها ان توكيلها عليه شكاوي للصبح في سوء المعاملة و الاستهتار دا غير ان التقفيل المصري عليه كلام و عيوب تافهة التوكيل مش بيعرف يظبتها - غير كده انا اسمع ان قطع غيارها تويوتا على ميتسوبيشي فاعتقد متوفرة و سعرها حاليا 67 الف للفئة الاولى و 71 الف للفل اوبشن

الانجلون سيارة محترمة لكن قطع غيارها فعلا فعلا غالية فحت و لسة التوكيل مش موفر كل قطع الغيار او بتيجي و تخلص و لازم تستنى شوية لما تيجي الطلبية الثانية دا غير ان ملهاش مسمار برة التوكيل لو حبيت تصلح برة

يبقى كده الصني اغلى واحدة - يقابلها توكيل محترم + خامات نظيفة + سيارة ياباني + عملية+ اعتمادية + خدمة شاقة + اقل شكاوي من عيوب صناعة او تقفيل + توافر قطع الغيار خارج التوكيل في كل مكان باسعار اقل من باقي السيارات محل المقارنة

انا ارشح الصني لو معايا فلوسها
لو مش معايا يبقى لوجان

لو مش مرتاح للوجان يبقى بي واي دي 3

و اخيرا اسبيرانزا 516 و ليس ال ام 11

و لو ال 516 يا ريت تجيبها كسر زيرو لان سعرها بينزل جامد فممكن تجيبها اقل ب 15 الف من الزيرو استعمال سنة