المشاركة الأصلية كتبت بواسطة AboNoRa
اهلا بيك فى مصر موتورز وفى التوبيك واحييك على مشاركتك القيمة
وحابب اسمع رايك فى صناعات الجيل الرابع ( كوريا - الصين - الهند - ماليزيا - ايران )
وبالاخص الاربعة الصين - الهند - ماليزيا - ايران - باعتبارهم ركزو اكتر فى التصنيع حسب المتطلبات المحلية ونجحوا فيها وبدائو التصدير بكثافة
|
أشكرك يا أبو نورا، وأرجو إني اقدر أضيف حاجة للمنتدى إن شاء الله
بالنسبة للجيل الرابع، فأنا حتكلم من منطلق علمي شوية.... وبارجع في معلوماتي لصفحة الويكيبيديا عن صناعة السيارات
http://en.wikipedia.org/wiki/Automotive_industry
وزي ما قلت قبل كده الموضوع معتمد على المصنعين والسوق مش مجرد البلد اللي بتنتج
أنا شخصيا شايف إن كوريا حاليا وبالذات مجموعة هيونداي-كيا تعتبر دلوقتي الحصان الإسود اللي عمال بيكسب ومحدش عارف يوقفه، وقريب قوي ممكن نشوفهم مكان تويوتا من ناحية الجودة وحجم الإنتاج والمبيعات
الصين دي حاجة فريدة قوي، الصين حاليا أكبر بلد بينتج سيارات في العالم (18 مليون سيارة في 2010) بعد ما كانت حوالي مليون واحد بس في 1992، بالإضافة إلى وجود أكتر من 35 شركة وماركة للسيارات بينتجوا الـ18 مليون سيارة.... الصين أكبر سوق للسيارات في العلم بعد ما كانوا بيركبوا العجل من 30 سنة، الصين لما فتحت باب الاستثمار للشركات العالمية كل شركات السيارات جريت عشان تلحقلها مكان هناك، لإنهم عارفين إن الصين هي المستقبل
أنا حاليا مقردرش أقوللك إن العربيات الصيني كويسة لإني ما جربتهاش أو معرفش حد مجربها، بس زي ما الناس بتتكلم على العربيات الصيني دلوقتي، الأمريكان كانوا بيتكلموا على العربيات الياباني بنفس الطريقة من 50 سنة.
بس أنا أتوقع إن الصين حتوصل لمستوى الجودة الياباني قريب قوي (يمكن أقل من 20 سنة) خصوصا إنهم عندهم تصميمات وتكنولوجيا من جوا البلد، مش كلهم معتمدين على شركات تانية، بس أكيد مش كل الشركات الـ 35 دول حيفضلوا موجودين.
الصين هي المستقبل
الهند برضو مستقبلها كويس، بس لازم يلعبوا على مستوى تاني، وانا شايف إنهم ماشيين في سكة العربيات الرخيصة للفقرا، وممكن دي تبقى هي السكة اللي حتخليهم ينتشروا في دول العالم التالت، خصوصا إنهم بدأوا يبقى فيه ماركات معروفة بتكسب كويس وتشتري ماركات عريقة
ماليزيا لسه فاضلها شوية، حجم الإنتاج هناك ضعيف (بروتون بتنتج حوالي 150 ألف عربية في السنة) وده مش كفاية عشان تنتشر، ولسه معتمدين على غيرهم في التكنولوجيا... بروتون=متسوبيشي، بيرودوا=دايهاتسو
إيران، حجم الإنتاج فيها كبير نسبيا (1.5 مليون تقريبا في 2010)، بس مش هو ده المهم، لسه معتمدين على بيجو، واللي يعتمد عالفرنساويين..... بلاش أكمل احسن
تركيا مش أحسن من إيران، برضو حجم الإنتاج كبير نسبيا (حوالي مليون عربية في 2010)، بس مفيش فيهم ماركة تركية خالصة (توفاش عربياتها مرتبطة بفيات) والباقي تجميع لماركات عالمية
على فكرة... البرازيل إنتاجها أكتر من 3.5 مليون عربية في 2010، بس مفيش فيهم أي ماركة برازيلي.... زي عندنا في مصر، والحاجات دي مش بتعمل مدارس.
المدارس في صناعة السيارات بتتكون لما يكون فيه مدارس تخرج مبدعين في البلد اللي بتنتج