[أحمد السويسى]

أرجو من كل اللى يدخل الموضوع إنه يكمله لأخره علشان يستفاد ويتعلم :-

التوقيتات اللى هتكلم بيها كلها فعلية وبإذن الله لو دخلت الأستاذة داليا المسؤلة عن الحجز

واللى كانت بصراحة متابعة معايا المشكلة من ساعت مدخلت هتأكد كلامى والتوقيتات اللى أنا كاتبها

العربية ليها معايا 10 شهور وعملت بيها 22 ألف كيلوا ومرحتش صيانة غير عالألف فقط

من فترة حسين بصوت عالى فى الكابينة كأنه جى من الموتور من عند سرعة 50 كيلوا وكل مزود السرعة الصوت يزيد

الكلام المهم يبتدى من هنا تحديدا

رحت التوكيل الساعة 8.45 بعد 5 دقايق كان الصنايعية بينزلوا من المينيباص بتاعهم وداخلين الورشة

جه المهندس يسأنى بشتكى من إيه _ قلتله الشكوى بتاعة الصوت العالى اللى فى الكابينة وكمان العربية بتحدف شمال

قاللى عاوز الضمان إديتهوله قاللى إنت خرجت من الضمان لأنك مجيتش فى مواعيد الصيانات المقررة

قلتله انا عندى فكرة بكده ومتحمل ثمن أى حاجة هتتغير فى العربية قاللى كده تمام وأخد منى العربية

المهندس مصطفى اللى إستلم منى العربية هو العامل الأساسى فى ضياع وقتى وحقى

التوكيل غلط غلطة شنيعة مش فى صالحه وهو غنك هتشوف عربيتك واللى بيتعمل فيها وكل حاجة من شباك الكافيتيريا

العربية دخلت الساعة 9 بالظبط وكان ترتيبها رقم 2 لاحظت إن فيه حوالى 9 تاكسى بايت فى التوكيل لأنهم هياخدوا وقط للتصليح

لقيت الصنايعية إبتدوا شغل فى التاكسى حوالى 9.30 وعربيتى زى ماهى مركونة

الساعة عدت 11 ومحدش جه جنبها ودخل عربيتين ملاكى وابتدى فيهم شغل

طبعا دمى اتحرق نزلت للمهندس مصطفى 3 مرات من 11.10 لحد الساعة 12.30

وكل شوية يقوللى حاضر هنشوفها حاضر هنظبطها ومخدش أى رد فعل

لما زهقت رحت للأنسة داليا المسؤلة عن الحجز وقلتلها على المشكلة وإن التأخير 3 ساعات من غير أى شغل فى العربية

إتصلت بالمهندس مصطفى وقالتله يهتم بالعربية قاللها أصل العربية هيركبلها قطعة غيار وهنبتدى الشغل فيها

الساعة 1.15 العربية اتحركت ودخلت تظبط زوايا وبعد 20 دقيقة رجعت مكانها تانى من 1.15 لغاية 2.45 والعربية ثابتة متحركتش

نزلت تانى للمهندس مصطفى قلتله محدش شاف موضوع الصوت قاللى هشوف الصنايعى وابقى ابلغك

غاب حوالى ساعة وطلع بالعربية الساعة 3.25 وقاللى العربية تمام الزوايا إتظبطت

لكن الصوت ده طبيعى _ قلتله طبيعى إزاى ده العربية معايا ليها سنة مفيهاش حاجة لكن صوتها بقى عامل زى موتور اللنش بالظبط

قاللى طب ثوانى هطلع اجربها _ خدها جربها قاللى فعلا فيه مشكلة الصوت ده غريب

قلتله إنت ملاحظتش إن صوتها غريب إلا 3.30 وانا معاك من 9.00 يعنى 6ساعات ونص

قلتله يبقى انتو مجربتوش العربية سكت وحط وشه فى الأرض وقاللى معلش سيب العربية نعملها ونشوف المشكلة وتعالى خدها بكرة

قلتله لأ ومين يتحاسب على العطلة والتقصير والتعب لازم حد يكشف عالعربية ويقوللى فيه إيه

وطلعت إشتكيت للعقيد محمد رمضان والعربية فعلا دخلت تانى وبعدين قالولى البلى هيتغير الأمامى ولازم العربية تبات

والمهندس سيف قال كده من الصبح وعلى فكرة سيف ده هو المسؤل عن العربية من ساعة مدخلت هنا

إشتريت البلى منهم ورجعت عالسويس أركبه هناك وإتحسبنت على كل اللى إتسبب فى كده وفى وش المهندس مصطفى

لأنى كان معايا أولادى الصغيرين وزوجتى وقلت نخلص التوكيل فى ساعتين ونكمل اليوم فى القاهرة ورجعنا كلنا من التوكيل عالسويس

وكلنا تعب وحرقة دم من توكيل ربنا ينتقم منه ومن عماله اللى مبيراعوش ضميرهم