السلام عليكم
دا أول موضوع ليا في المنتدى الجميل دا (وأول مشاركه كمان )
مبدئيا انا من عشاق الكروز
ومتابع اخبارها من اول ما نزلت مصر الى الان
وحابب اتناقش معاكو في كذا نقطه بالنسبه للعربيه
أولا :
المحرك
المحرك زي ما انتو عارفين في مصر ال 1600 ال 107 حصان الموجود في الاوبترا واعتقد انه مش فارق كتير عن الموجود معايا في النوبيرا
طبعا بالنسبه للتسارع والسحب والقصص دي بتعتمد على اسلوب سواقتك
انا شخصيا ميهمنيش ال top speed (لأن تقريبا نادر قوي لما تجيبها على الطرق المصريه )
انما الاساس عندي التسارع من 0 ل 60
ومهم اكتر من 20 ل 80 كم|س
الكروز صعب تنافس ف النقطه دي بالمحرك العويييل دا
يبقى فيه 3 حلول للمشكله دي
1- تجيب ال 1800 خليجي (مبحبذهاش عشان التوفير ف البنزين والضرايب و الخ ....)
2- تستنه لحد ما منصور بيه شيفورليه يتكرم ويعاملنا كويس وينزل المحرك الجديد 1400 تيربو دا 138 حصان
3- تركب تربو او سوبر تشارجر للمحرك (طبعا محدش بيجيب عربيه جديده عشان من اول اسبوع يقعد يعدل فيها )
ثانيا :
التحكم
انا شوفت في المنتدى ناس كاتبه ان الدركسيون بتاعها كهرباء
وناس تانيه كاتبه في تقريرها المفصل انه هيدروليك ؟؟
مش عارف ميين الصح
ثالثا :
الكماليات :
ودي فعلا حاجه تغيظ بجد
وبجد بتعبر عن وكيل من اسواء الوكلاء في مصر
احيانا بحس انه مش عايز العربيه تنجح
قصه قصيره : في التوكيل اللي في سور نادي الزمالك كنت بتفرج ع العربيه للمره ال 90 اكتشفت الاتي
1-فتحت الكبوت ملقتش الغطاء البلاستيك اللي على المحرك لمل سالت قالو الوكيل بطل يجيبو
2- الالوان الخارجيه حصرها في 5 الوان بس بعد ما كانو حوالي 9 او 10 (انا كان نفسي ف اللون الابيض وطبعا مبقاش موجود )
3- الالوان الداخليه مبقاش ينزل منها غير الرمادي كان الاول 3 الوان بالنسبه للقماش
والجلد كده كده متاح بلون واحد
ف انا شايف بصراحه ان الوكيل كل يوم من سئ الى اسواء
رابعا :
الامان
طبعا هيا واخده 5 نجوم في اختبارات السلامه الاوروبيه بالمواصفات الاوروبيه
محدش يفكر انها بنفس الامان دا في مصر مواصفات الامان اللي بتنزلنا يا دوب تجيب 3 نجوم بالعافيه
ملحوظه : العربيه بره بتنزل ب 10 اير باج اساسي غير نظام مانع تصلب دواسة الفرامل اثناء الحوادث
خامسا :
مقارنتها مع العربيات اللي في فئتها (رأي شخصي )
مبدئيا هيا تكسبهم كلهم من حيث الشكل
انما لو قارنا للموديلات اللي في نفس الفئه السعريه من حيث باقي المميزات هنلاقي
مع الالنترا هتجيب جميع الكماليات بنفس سعر الكروز الاوتوماتيك فاضيه طبعا باضافة ان غبور وكيل محترم (النترا تكسب )
مع الكيا سيراتو هتجيب جميع الكماليات بنفس سعر الكروز الاوتوماتيك فاضيه مع العلم ان المحرك اقوى في السيراتو......... مش عارف مين يكسب
مع اللانسر الشارك نفس القصه بس الكروز فاضيه تكسب لأن اللانسر محركها تعبان وعربيه مش متماسكه
مع الكورولا تقريبا هتجيب نفس الكماليات في الاتنين لنفس السعر بس الكورولا تكسب بمحرك اقوى و اعتماديه اعلى بكتييير
مع السيفيك الكروز ارخص واققل في المحرك والكماليات بس تكسب السيفيك بملائمه للطرق المصريه احسن كتيييير من السيفيك
مع الاوكتافيا فانتازيا هتجيب الكروز الكامله بنفس سعر الفانتازيا المانيوال الفاضيه بس بجد الفانتازيا تكسب باداء محرك عالي يعيبها تكلفة تشغيل اعلى
باقي ايه تاني ........
بس بعد دا كلو انا شخصيا لسه بفضل الكروز
وبتمنى الوكيل يظبطها شويه
منتظر ارائكو تعليقاتكو على الموضوع