رد: محتار ما بين فيات ١٢٨ وفيات ١٢٧
انا كان معايا سوبر فيورا85 و اتنين من صحابي معاهم 128 و بيشكروا في عربياتهم اوي ,انا طلعت بالنوعين و بصراحة الفيورا جراية و شاسية انشف و موفرة في البنزين و دة من تجربتي و من كلام كذا ميكانيكي
بس ال128 واخدة شهرة اكتر في مصر لأن انتاجها كان مستمر لغاية كام سنة فاتو بعكس الفيورا ,بس في النهاية الاتنين حاجتهم من عند البقال و اي ميكانيكي يعرف يشتغل فيهم , و الاتنين مطلوبين في السوق لو فكرت تبيع بعد كدة بس ال128 مطلوبة اكتر.
يعني من الاخر كدة شوف انت مايل لشكل مين اكتر علشان فية ناس غاوية شكل الهاتشباك زي كدة و فية ناس لأ و خد بالك ان شنطة الفيورا مش صغيرة ولا حاجة زي مالناس بتقول , انا ساعات كنت بشيل الرف اللي ورا بالسماعات و احطة واقف في ضهر الكنبة اللي ورا و احط فيها عجلة ابني مايلة بالجنب و كذا شنطة معاها واحنا رايحين النادي و في الاخر الشنطة بتتقفل بعكس ال128 اللي كانت حتبقي شنطتها مفتوحة وقتها.
بالنسبة بقي لأهم نقطة و هيا السعر , اللي معاك يجيب عربية فيورا جيدة جدا لأن سعر الحالة المتوسطة 10 و سيبك من الاسعار اللي بتشوفها علي النت , دي اسعار مبالغ فيها , انزل السوق و خد معاك واحد ثقة و اهم حاجة يشيك علي عضم العربية كويس و البارومة , اي حاجة تانية امرها سهل الا البارومة لو ماسكة في عضم العربية
و متقولش اخد حاجة تعبانة و اشدها علشان في الاخر حتلاقي نفسك دفعت كتير و مش جايبه همها , بالتوفيق ان شاء الله و لو فية اي استفسار انا في الخدمة .
|