[خالدخليفة]

أين مبارك

لو تم تحليل بيان عمر سليمان المكون من حوالى 35 كلمة تقريبا فـقـط فنجد انه قال ان مبارك تخلى عن مهام منصبه كرئيس للجمهورية وانه فوض المجلس الاعلى للقوات المسلحة لقيادة البلاد
ياسلام
حتى الرمـق الأخير عايزين يقولو انه خايف على الشعب وشايل هم الشعب وانه ياعينى ماشى رغم انه بـيحب البلد دى بس اهلها مش عايزينه وعلشان كده هو تخلى مش تنحى (تفرق طبعا لان التخلى ده بمزاجه لكن التنحى غصب عنه )
ويظهران أهل مصر ناس حسودة وحقـودة وخسارة فيهم الطيب ولذلك هيـسيبهم ويمشى
لكن لحد دلوقت وبعد 3 ساعات الا ثلت من اعلان رحيل سيادته محدش قال راح فين او رايح على فين ؟؟؟؟
و مش معقول طبعا سيادته فى شرم الشيخ لحد دلوقت هو والعيال
لـكـن
المشاغبـيـن أمثالى والباحثين عن المشاكل مثلى
ليهم سؤال
حسنى راح فين ....راح فين
وممكن واحد يقول / ايه الرخامة الغلسة دى ؟؟؟؟ وانت مالك يا أخى ..... المهم أنه غار من على قلبنا
وواحد تانى يقول / ايه الغلاسة الرخمة دى ؟؟؟؟ وانت عايز منه أيه ؟؟؟ مش كنتم عايزينه يمشى ؟؟؟ .... أهو مشى وسابها لكم خضراء ....ورونا هتعملو انتم أيه ؟؟؟؟
الى أخر هذا الهرش مخ
لكن هذا الرجل (مبارك ) كون ثروة تزيد عن 70 مليار جنيه هو وعائلته وقيل 70 مليار دولار
ياترى ....ياهل ترى ....
حوشهم من
مرتبه كرئيس جمهورية؟؟؟
والا....من
مرتبه كنائب رئيس جمهورية ؟؟؟؟؟
والا ....من
مرتبه كقائد للقوات الجوية فى حرب اكتوبر او ظابط فى الجيش؟؟؟؟
والا كل دول مع بعض ؟؟؟
والله ياعم خالد شكلك غلس ورخم ومش مقدر
مش مقدر أيه ؟؟
مش مقدر المحنة اللى فيها الراجل دلوقت
ولا مقدرالفرحة اللى فيها الشعب دلوقت
وشكلك كده من عواجيز الفرح وعايز ترمى كرسى فى الكلوب.....
ياأخى سيب الناس تفرح
فعلا معاكم حق
لكن يجب الا ننسى هذا الرجل اللص
الخائن حتى أخر يوم من ولايته
خائن ازاى؟؟؟
هل تعلمون ان هناك قطع بحرية من الاسطول الخامس الأمريكى تقف الأن (مش جاية فى السكة) داخل قناة السويس بمدينة الأسماعيلية وعلى متنها 850 جندى من المارينز
(حسب جريدة المصرى اليوم بتاريخ اليوم الجمعة 11 فبراير)
ولمن لايعرفون الخريطة
فالاسماعيلية تقع بين مدينة السويس ومدينة بورسعيد
ومعنى ذلك ان هذه المدمرة دخلت المياه الأقليمية اولا ثم عبرت مدينة السويس متخفية طبعا والا لو كان قد اكتشفها اهل السويس لكانو قد افترسوها لانهم عصبـيـين ومبيعرفوش غير لغة واحدة بس
هى لغة الحرب
من أعطى لهذه المدمرة الأذن بالدخول للمياه الأقليمية
ومن قادها فى غـفـلة من كل الناس حتى مرت من السويس ووقـفـت داخل الاسماعيلية
وقد قيل فى هذا الصدد انها جا ئت تحمى مصالح أمريكا فى قناة السويس حيث أن 40 % من تجارة أمريكا للشرق الأوسط وأوروبا يمر من قناة السويس
(هذه المعلومات بناء على جريدة المصرى اليوم عدد اليوم الجمعة 11 فبراير)
ثم نبحث له عن الخروج المشرف و الكريم الى اخر هذا الكلام المزعج والمقزز والممل

أى خروج مشرف ....وهو قد ترك لنا مسمار جحا فى الأسماعيلية ولن تمشى هذه المدمرة الا بعد ان تعرف ظروف الراجل الجديد ايه ؟؟؟ والدنيا هتمشى ازاى ؟؟؟
وبالطبع هيحشرو مناخيرهم فى كل صغيرة وكبـيـرة عندنا ....لحد م يـيجى حد على هواهم
طبعا امريكا بتحسبها غلط (على ما أعتقد )
مصر اليوم غير مصر من 30 سنة
ولذلك يجب محاسبة هذا الرجل وأعوانه وافراد عصابته والبحث عنه
وان لم يجدوه فانا اعرف شخصا من مباحث قسم الزيتون سيأتى به ولو كان مختبىء بداخل خرم أبرة
لكن هذا الرجل كان يراوغ حتى اخر لحظة لانه كان لايجد من يستقبله
وكان ان تم اعداد السيناريو فهو يملك 70 مليار دولار ومطلوبين برضه لتشغيل شوية عواطلية فى اوروبا
وتم اعداد خطة للسفر الى المانيا للعلاج وبعدها يعلن الطبيب المعالج انه (أى مبارك) قد أصيب بمرض غريب اسمه مثلا اسفكسيا العصبى اللانهائى الحمبـوزى الناتج عن صدمة عصبية ويحتاج الى راحة فى المستشفى لاتقل عن سنتين فيعلن الرئيس تنحيه عن السلطة لانه صحيا لايستطيع ان يباشر سلطاته
ولكن حدث مالا يتوقعه المخططون لهذه الخطة فقد رفضه الشعب الالمانى ....وليست الحكومة الالمانية وقام الشعب هناك بمظاهرات أمام البرلمان رافضين لهذا الرجل وعائلته وقام احد اعضاء البرلمان الألمانى قائلا فى البرلمان / لو دخل هذا الرجل الى المانيا سأقوم بمقاضاة الحكومة الألمانية وتعريض كل من ساهم فى ادخاله الى المانيا للسجن
وطبعا تم تغيير السيناريو وتم الاتصال بأسياده فى أمريكا وبدورها اتصلت بدولة الامارات والتى وافقت اولا وارسلو وزير خارجيتهم الى مصر لتوصيل ذلك لمبارك اومال يعنى وزير خارجية الامارات جه مصر فجأة ليه ؟؟؟ ومشى فجأة ليه ؟؟؟
ثم رفضت الأمارات فيما بعد
ولم يتبقى الا دولة واحدة وافـقت على استقباله
وهى للاسف كما فهمت وعرفت..... انها اسرائيل
ولحد دلوقت بعد اعلان تنحيه عن الحكم ب 3 ساعات لم يقل لنا احد هو راح فين ؟؟؟
بما فيهم قناة الجزيرة وهى ألد اعداؤه
ومعنى كده ان التعمية على مكان رحيله مقصود
وربنا يستر
لان ترحيب اسرائيل به مش لله طبعا
ولكن بسبب المعلومات الرهيبة التى لن يحلم بها رئيس جهاز الموساد لمدة 70 سنة أتية يعنى حتى عام 2081 وطبعا لو صاحبنا راح اسرائيل وعمل فيها وطنى هيطردوه تانى يوم وهيجرسوه وهيفضحوه وهتبقى على عينك ياتاجر
انا ارجو من الله ان لايذهب هذا الرجل الى اسرائيل وان قرر فليأخذه أخذ عزيز مقتدر قبل وصوله اليها
اللهم أمين