[خالدخليفة]

عـمـر سليمان

الشعب المصرى شعب طيب وغلبان وعاطفى وحين تم تعيين عمر سليمان نائبا لرئيس الجمهورية
استبشر الشعب خيرا
طيب ليه ياجماعة الخير مستبشرين خير فى الراجل ده
وسمعت ردودا تـفـطس من الضحك
فهناك من قال / اصله صعيدى والصعايدة جدعان
وأخر قال / ده ظابط مخابرات ومخه شغال
وثالث قال / اصل الراجل ده مبيعرفش هزار وايده نضيفة
وطبعا كلها ردود تدل على الفذلكة فلا أى منهم يعرفه شخصيا ولا أى منهم درس طبيعة شخصية هذا الرجل أو قرأ عنه
ولذلك نقول ورزقنا على الله
من قرائاتى المتعددة ومعلوماتى البسيطة
اعلم أن هناك دائما صراعات بين اجهزة المخابرات المختلفة ودائما رئيس جهاز المخابرات هو شخص يلعب لعبة الشطرنج مع شخص أخر يقف امامه على الجانب الأخر من الحدود سواء الحدود الدولية او اى دولتين معاديتين لبعضهما
وغالبا مايكون رئيس جهاز المخابرات شخصية خفية او لاتظهر كثيرا او شخصية لايعرفها الا المتابعون لاخبار هذا الجهاز فقط
ولكن المحروس عمر سليمان كان معروفا للقاصى والدانى ولاى طفل فى العالم العربى وكنا نتعجب
كيف يكون رئيس جهاز المخابرات شخصية معروفة بهذا الشكل الفج
ثم زال العجب حين قرأت تصريحا لرئيس جهاز الموساد وهو اكبر جهاز مخابرات منافس لنا ان لم يكن الوحيد المنتهية مدة خدمته وهو يسلم الراية للرئيس الجديد للموساد
فقد قال حرفيا (الكلاام منشور فى جريدة المصرى اليوم )/ لقد قمت بعمل عظيم فى الشرق الأوسط وخصوصا فى مصر
فقد تسببنا لها فى كثير من المشاكل
واهمها زيادة وتعميق الاحتقان الطائفى بين المسلمين والاقباط
وتسببنا لمصر بمشاكل فى منابع النيل فى اثيوبيا
وعملنا على تجنيد الكثير من المصريين للعمل معنا (بسبب الفـقـر طبعا مش محتاجة شطارة واخر جاسوس ممسوك عندنا كان واخد 40 الف دولار اى مايوازى 225 الف جنيه مصرى وهو مبلغ تافه بالنسبة لهم )
وقمنا بعمل نوع من الفرقة والتناحر بين كافة طوائف المجتمع (ولو انى مش فاهم دى انما تفتكرو يقصد انه خلى الناس تكره بعض ؟؟؟ ممكن )
الى هنا انتهى حديث رئيس الموساد السابق
لكن ده معناه ان السيد عمر سليمان ورجالته كانو نايمين فى العسل
او قاعدين على قهوة كتكوت ليس لهم الا لعب الطاولة وربما الدومينو
وبحثت عن عمل عمر سليمان بعد الظهر لانه من الواضح ان مرتبه كان لايكفيه وبالتالى كان لابد ان يخرج من مبنى المخابرات العامة بكوبرى القبة ليركب تاكسى ويعمل له بنديرتين يأكلو العيال برضه
اومال يعنى وقته كان ضايع فى ايه طالما مش عارف يلاحق على صاحبنا بتاع الموساد
ثم بعد بحث وتمحيص وفرك وتفعيص
علمت ان السيد عمر سليمان
كان يركب الطيارة ......يروح غزة
ويركب الطيارة .......ويرجع من غزة
رايح جاى.......رايح جااااااى
وحماس وفتح مختلفين
وبسلامته يروح يهدد حماس شووية ......ويراضى أبو مازن ويبوس على راسه شوية تانيـيـن
ومن هنا لهنا ياقلبى لاتحزن
طيب واحنا ياعم الحاج ؟؟؟؟
مفيش
والناتج ضاعت مصر سياسيا واقتصاديا وعسكريا واجتماعيا (لن تضيع ان شاء الله )
وبالتالى اختيار هذا الرجل كنائب رئيس جمهورية لا اعتقد انه من اختيار مبارك
بل هو من اختيار اسياده فى امريكا واسرائيل
لان اسرائيل بعد الثورة شكلت حكومة حرب سموها حكومة حفظ السلام (شوف القرع ياأخى)
ولما تولى عمر سليمان مهام منصبه كنائب للرئيس ......الاسرائيليين فضوها سيرة
اذن هذا العمر سليمان مثل سلفه ولايزيد كثيرا عن حسنى مبارك الا انه صعيدى من قنا وأطول منه شوية (طويل جدا ) وأصلع
هذه هى الفروق الجوهرية بين عمر سليمان وحسنى مبارك وفيما عدا ذلك
فالاثنان عملاء لليهود والامريكان
طبعا هذا الكلام من واقع تحليلى لعمل الرجل فى المخابرات وعمل من يلاعبه الشطرنج على الجانب الأخر من الحدود
ربما أكون مخطئا .....واتمنى ذلك
ولكن يجب الا نتسرع فى الحكم على اى شخص قبل ان نراه
ونفسى ومنى عينى اشوف رئيس مصرى جاى منتخب بجد