أحبائى الكرام
سلام الله عليكم ورحمته وبركاته ،،،
كنت قد قرأت موضوع لأخونا عبد الرحمن عن كيفيه إنارة الرينج اللى حوالين مفتاح الكونتاكت فى الجين 2 وأخذت الفكره منه وقلت أعملها عندى فى الساجا خصوصا انى بعانى جدا جدا انى ادخل المفتاح فى الكونتاكت خصوصا بليل لان الدنيا ضلمه ونظرى ضعيف......
تكلفه الموضوع كله أقل من عشره جنيه يادوب اللمبه ومتر سلك واحد مل
الخطوات :-
1- يتم فك البلاستيك حول الدريكسيون وهو مربوط بأربعه مسامير وفكهم سهل جدا جدا ولازم الدريكسيون يكون نازل لتحت خالص.
2- يتم نزع البلاستيك المحيط بالدريكسيون بعد تنزيل الدريكسيون لأسفل بأقصى درجه.
3- لوحظ ان الفتحه التى تم فيها تركيب اللمبه بالجين 2 أكبر بكثير من المكان المخصص للمبه بالساجا وبالتالى أصبح من المستحيل تركيب لمبه عاديه واللمبه الصغيره جدا ضؤها لن يؤثر ومش هتبان خالص.
4- تم شراء لمبات من النوع اللى هو عبارة عن 6 لمبات صغيره جدا ضؤها ازرق زى اللى بتركب فى سقف السيارة من جوه.
5- تم تركيب هذه اللمبات على ظهرها ولزقها بأمير على الرينج البلاستيك وهو راكب مكانه من غير فك اى شىء.
مشكله مصدر الكهرباء
كان اكبر هم عندى هو انى ماجيش ناحيه ضفيرة الكهربا عشان ما أخرجش الضفيرة من الضمان خصوصا ان العربية جديدة معايا ومابقالهاش شهرين.
فكرت انى اوصل على علبه الفيوزات مباشرة لكن فشلت لسبب ان كل الوصلات اللى على علبه الفيوز هتخلى اللمبه شغالة على طول ليل نهار وحتى لو العربية واقفه وده هيأثر على البطاريه.
فكرت اوصلها على كابل حزام الامان اللى تحت الكرسة وبرضه مانفعش لانها مش هتنور الا لما حزام الامان يكون مربوط.
أخيرا وبعد بحث شاق لمدة أربع ساعات وبأستخدام نظريه التباديل والتوافيق وصلت لحل ممتاز موجود فى علبه الدريكسيون نفسها.
دورت على الكابلات الموصله لذراع النور الصغير بحيث ان اللمبه فى الكونتاكت تشتغل مع النور الصغير وفضلت ماشى مع الاسلاك لحد مالاقيت الطرفين بتوع ذراع النور ملحومين بقصدير فى علبه فوق الدركسيون مباشرة.
تم توصيل طرفى اللمبات فى الطرفين بتوع النور الصغير واستخدمت القصدير والكاويه ولحمت فوق اللحام الاصلى يعنى لافكيت سلك او لحام ولا قشرت اسلاك من الضفيرة.
تم تركيب كل شىء كما كان من قبل والنتيجه فى الصور المرفقة.
لإنارة الكونتاكت لابد من فتح النور الصغير بالسيارة من خلال لف واحدة لطرف الذراع الايسر
لاتنسونا بخالص الدعاء
__________________
مع خالص الدعاء من الفؤاد بدوام النعمه والفضل من الله تعالى.
وأن يهديكم لما فيه خير لكم ولسيارتكم
وأن يحفظكم ويحفظ ما وهبكم من كل شر وسوء ومن كل نفس أثمه ومن كل عين حاسدة.
وأن يكتب لكم حسنه فى كل خطوة تخطوها بسيارتكم ويحط بها من ذنوبكم.
وقدر الله لكم وكتب عليكم فعل الخير وراحة البال والغنى عن السؤال.
محمد عبد المجيد
المشتريات الخارجية
شركة الاسكندرية للإضافات البترولية ( اكبــــا)
0116007025