تمام تمام ،، واضح انك دماغ بردو
بس خلي بالك من حاجة انه عادة الصب مش بيطلع صوت التريبل واضح يعني عشان كده طبعا محتاج سماعات عادية معاه عشان تطلع ده وده ،، وعموما مش مستحب صوت البيز قدام بيفضل انه يكون صوت خلفي ،،، عشان طبعا التوزيع مهم
سماعات ( الميد رينج ) مع التويترات
قدام عشان التريبل وصوت المغنى فقط ، لان طبعا التويتر مش بيحس من ترددات الاغنية غير التريبل وبيكون معاه زي فلتر بيقوم بالقصة دي ، بس عشان طبعا لو مش حيفلتر وحيشتغل زيه زي السماعه العاديه ، اول ما تعلي الصوت حيعمل بوووووووف
نفس الحكايه الميد رينج ( ودي سماعه عاديه بس نوعها او اسمها كده ) مش بتحس غير بالترددات بتاعة المغني مع تريبل بسيط
خلفي يبقا فيه سماعات عادية تظهر كل التونات مع طبعا البيز لو هم سماعات الباور بتاعهم عالي ولو فيه صب يبقا كملت الموضوع تمام التمام.
المقصود من ده كله ايه ؟ انك تسمع لحن كل حاجه من مكان شكل ومنفصلة ،
تريبل من التويترات
صوت المغني من الميد رينج
البيز من الصب او السماعات الخلفية
يعني هو عملية توزيع في الاول ومن الاخر يعني ، ولو الكاسيت بيطلع 4 مخارج لكل ركن في العربية طالعله سلك سماعه منفصل ، يعني لو الاغنيه اصلية وتوزيعها حلو حتلاقي الكاسيت بيقسملك كل حاجه لوحدها وتلاقي الاغنية في فقرات معينه بتلف على السماعات كلها ، ناحية تشتغل وناحيه لا او قدام مثلا واللي ورا يفصل والعكس، او سماعه سماعه وبعد كده الاغنيه تكمل عادي كانك بالظبط قاعد في سينما
لو تلاحظ مثلا في فيلم معين والشاشه عريضه قدامك وانت قاعد في الوسط ( وده أحسسسسن مكان تقعد فيه طبعا من ناحية الرؤية وتوزيع الصوت ) المهم بتلاقي مثلا الكاميرا متوجهه في وسط الغرفة اللي في الفيلم وواحد قاعد بيتكلم من ناحية اليمين وواحد على الشمال ، المفروض لو الفيلم متوزع صح تلاقي السماعات في السينما اللي في الجنب اليمين والشمال بتشتغل وبتتفاعل مع حسب الحدث اللي في الفيلم زي مثلا الاتنين اللي بيتكلمو او مثلا حصل انفجار من الجهه اليمين بتلاقي صوتهم طالع ومركز اكتر على السماعات في الناحية اليمين في السينما ((( توزيع جيد ))) وده بيخليك تعيش مع الفيلم اكتر وبتفاعل افضل طبعاً
عشان كده كنت بقولك
اهتم بالكاسيت اهم شيئ ،، ويفضل طبعا الكاسيت اللي تجيبه ليه اربع مخارج للسماعات وبيبقا مكتوب على كل فرده خارجه ، مكان السماعه اللي المفروض تتوصل بيه ، وفي انواع كاسيت بيكون ليها مخرج منفصل للصب ووفر وده حيفيد التوزيع اكتر بردو ، عشان الصب يشتغل مع توزيع الاغنية بطريقه احسن.
بتلاقي في الكاسيت وانت بتظبط البيز والتريبل ، كمان حتلاقي Front , Rear , Right , Left
بعد ما الراجل يركبلك الكاسيت ابقى شغل سماعه سماعه وواحده بس عشان تشوف موصلك فرد الاسلاك صح والا عاكسهم.
صحيح بالنسبة للكرتونه الي حطيتها ورا النمره ، شيلها عشان حتقرفك عشان حتجمع تراب ومع الغسيل حتفضل حتنزلك طينه ،، روح عند اي محل بتاع بويات وحدايد هات من عنده وردتين كاوتش وركبهم مع المسمار اللي بتثبت بيه اللوحه ، بس طبعا بين اللوحه وبودي العربيه ،،، انضف وتعزلك الصوت كويس.
يشرفني يا باشا اني اقابلك طبعا واساعدك ما اتخرش عنك ، بس ظروف وقتي صعبه شويه ، بس معاك لاخر المشوار واي استفسارات انا هنا تحت امرك
سيبك من الكلام ده كله دلوقتي ، ركز في الامتحانات أهم حاجه والباقي بعد كده سهل ان شاء الله وبالتوفيق ليك.
تحياتي ،،،