بص يا باشا انا حقولك على رأيي الشخصي لاني من هواة
الصوت النقي وده الأهم
انا في رايي انك تجيب كاسيت نضييييييف ده اهم حاجه علشان تسمع صوت نضيف ، في ناس بتشوفهم في الشارع مركبين سيستم تسمعه من من اول الشارع ولما يقرب ما تعرفش تفسر النغمة بتاعة الاغنية من صوت المغني ، كله داخل في بعضة ده غير طبعا الوش والزنة اللي طالعه من التابلوه الخلفي مع دقة البيز والتربلات اللي تخرم الودان مش من علو صوتها ولكن من النويز اللي طالعه معاها...الخ
مش مهم انك تركب سيستم عشان غيرك يسمع في الشارع ، المهم انت جوه العربية تبقى سامع كلللل تفاصيل الاغنية واللحن بوضوح وتناسق بينهم في الاداء
تجربتي الشخصيه : هاتلك عده نضيفه أوي (( انا طول عمري على السوني )) تكون بتخرج 4 مخارج عشان يبقا التوزيع على السماعات صح الصح ولو خرجة 40 أو 50 وات حلو جدا ولو 35 وات يمشيك دلوقتي لحد ما تبقى تركبلهم امبليفاير كويس يقويلك الصوت لو عاوز اكتر ، بس العدة النضيفه حتريح دماغك من حاجات كتيره وخصوصا الهوا والوش اللي بيطلع مع الاغنية.
بالنسبة للسماعات انصحك بسماعتين بيضاوي وتكون 4 واي يعني طالع منها تويترات عشان تقسم الموسيقى كويس ده وفي نفس الوقت فيما بعد تستحمل الامبليفاير الي حيركب ، طبعا ما يقلش عن 250 وات 300 وات يبقا احسن بالنسبة للسماعات ،، ده بالنسبة للخلفي .
الأمامي جيب سماعات مدوره ( طبعا عشان تصميم العربيه ) وتكون ( ميد رينج ) ودي مش غالية.
وحيبقا ابداع لو قدرت انك تجيب تويترات (( لازم يكونو نوع معروف نضيف )) ما كانوش نضاف
ما تجيبششششش وخليها لحد ما ربنا يسهل الحال ، انا مبدأي ، حاجه حاجه مش مشكله بس لما تجيب تجيب الصح عشان مش كل شويه حتفضل تغير وتشيل وتحط ، حتبقى خسارة عليك.
بالنسبة للتويترات ، عن نفسي ما بحبش انهم يكونو متركبين جمب راسي عند الشماسة ، وده عشان خاطر ما يكونوش قريبين من ودانك ساعتهم حيبقا صوتهم طاغي شويه عن باقي السماعات ، عشان اهم حاجه في الليله دي كلها ((( التوزيع )))
فأحسن مكان في رأيي من غير كلام ،، في المكان اللي في ضهر المرايات الجانبية لو تفتكر عربيات زمان بيكون فيه صباع صغير عشان تظبط منه المرايات الجانبية ، دلوقتي اغلب السيارات مافيهاش الكلام ده بتبقا كهربا ولو مش كهربا بتلاقي مثلث اسود فاضي في ضهر المرايات على طول ، ده احسن مكان يتركب فيه التويتر بس طبعا لازم يكون واحد فاهم وعنده مزاج عالي وهو بيشتغل عشان حينفد الاسلاك من جوه الباب فعشان يبقا كله متقفل كويس ومافيش اسلاك ظاهره لما تفتح باب العربية ، وفي عربيات لو ماهياش هاي لاين بيبقى جاية من المصنع في المكان ده سايبنلك مكان في ضهر المرايات وعليه زي شبكة زي بتاعة السماعات عشان اوبشن لو حبيت تركب تويتر بعد كده يبقا يركب في ضهرهم وريحو دماغك ، ولو خايف تفتحلهم في البلاستكه المثلثة دي ، في تويترات ممكن تتلزق عليها بس مش بحب يكون في حاجه ظاهره وخصوصا مع قفل وفتح الباب حتلاقيها وقعت.
الاهم والاهم والاهمين بقا : ودي بعملها في كل عربية بركبها حتى البي ام عملتها فيها ،، التابلوه الخلفي مهما كان كويس ومتين ، مع دقة البيز حتسمع صوت زنه وده بيدايق عشان زي ما قولتلك اهم حاجه في الليله دي كلها (( نقاااااء الصوت ))
فالحل ايه بقا ، تشيل التابلوه الخلفي لو نضيف شيله في البيت عندك وده ضروري ولو بايظ ومتاكل ومش نافع شيلة ارميه في الزباله مع اني مش بحب الاوبشن التاني ده عشان الفبريكه بردو فبريكه لو حبيت تزحلق العربية بعدين يبقا موجود..
المهم تروح عند واحد فاهم جداًً ودماغه رايقة في شغله وده الاهم عشان يظبط اللي حقولك عليه ظبطه كأنها جايه من المصنع كده ،،، تجيب خشب ام دي اف وسماكه كويسه ما تقلش عن 16 ملي وده في اي عربية ممكن يتركب ( أعتقد كده ) ، في عربيتي الكيا كان المكان زانق جدا والراجل قالي مش حينفع سماكه عاليا ، فكبرت دماغي منه وعملتها بنفسي في البيت ، رحت عند بتاع الخشب جبت منه لوح صغير وطبعا بعد ما فكيت التابلوه اللي عندي عشان اخد المقاس كويس وطبعت الاتنين فوق بعض واخدت رسمة التابلوه بالظبطططط على الخشبه وخليته يقصة على الرسمة
لو دماغك رايقة كمل قراية باقي الموضوع ، لو مش رايقة دوس علامة أكس اللي فوق على اليمين
حتيجي تحط التابلوه حتلاقيه طبعا لا راضي يدخل من الجناب عشان خاطر الديكور الفيبر اللي ماشي مع ظهر الكرسي الخلفي لحد القزاز ولو مشي الحال ووصل للقزاز حتلاقيه زايد من ناحيتك وضهر الكرسي مش حيقفل وده لسبب عشان طبعا القزاز الخلفي مايل ميل واضح والخشبة مقصوصة على العدل ،، حتجيب مبرد بتاع خشب وصنفرة خشنة ( منشار اركيت انجز معاك لو فيه ) حتقص الحواف الخلفية للخشبة بدرجة ميل مقاربه للقزاز وتبردلك شوية زياده بسيطه عشان سمك التنجيد يا باشا
بالنسبة لو الخشبة زايده من الجوانب ، شوف التابلوه الاصلي حتلاقي الفبره معلمه عليه ( فرق المعرض للشمس والتراب ) بينه وبين اللي داخل شويه تحت الفبره دي ، خد رسمتة بالمقاس وارسمه على الخشبة ، وابتدي كل من الخشبة الزياده دي لانها حتكون اعلى بشويه من الاصليه وفي نفس الوقت الحبه اللي حتاكلهم دول حيكون تقريبا نص سمك الخشبة والباقي حيبات تحت الفيبر اللي في الجوانب عشان تطلع العربية زي الفبريكة بالظبط وتبقى التنجيده بردو ماشيه فوق الشفه اللي عملتها دي.
بالنسبة لضهر الكرسي الخلفي بردو حتاكل من الخشبة من الوش على المايل بدرجة ميل تمشي مع الكرسي عشان تبقى الخشبة في الاخر متقفلة زي الفبريكة وما يبانش فروق لو وقفت ورا العربيه وبسيط على التابلوه .
كل الدوخة دي تستاهل طبعااااا عشان نقاء الصوت وعشان يا باشا لو السماعات محطوته على خشب ام دي اف بتفرق بنسبة كتيره جداااا في جودة السماعه وبتخلي صوتها اعلى واوضح خصووووصا البيز بتلاقية بيرج صح ، ولو على الفيبره العادية حتلقيها طبعا بتزن لو عليت الصوت اكتر.
روح عند بتوع السجاد وقولهم عاوز موكيته خفيفة لتنجيد خشب السماعات وهم عارفين حيدوك اللي ينفع كويس ونقي اللون ، وانت بقى قبل التثبيت شوية كوله ونجدها وقص الزيادات ، الشغلانه دي اضطريت اقولهالك بالتفصيل الممل علشان خاطر الموضوع ده بيكلف 200 او 250 ولو واحد معلم حياخد منك 300 ، وبكده تقدر توفر على نفسك شويه عشان الامكانيات اللي قولت عليها ، ممكن بتمن الليله دي تجيب حاجه تانية انفعلك .
نصيحه تانية ( وده لو لقيت يعني ) لما تشتري سماعات هات النوع اللي بيكون الرق بتاعهم ربل ، مطاط يعني ، عمره بيكون اطول بكتييير من اللي بيكون عامل زي الورق اي لمسه يتقطع ومع الوقت بينشف من الشمس ويبتدي يزن،
نصيحه مهمة جداًااااا ، والغلطه دي اتعملت معايا وللاسف من واحد مشهور جدا في التركيب في شارع جامعة الدول العربيه ( من غير ذكر اسماء ) مره رحت زمان اركب وخلاني احرم ، اركب سماعات تانيه عند اي حد بقيت اعملهم بنفسي زي ما شرحتلك فوق ،،، الافندي جاي يركبلي سماعات بيضاوي كنت جايبهم من بره اصليين ياباني ايام ما كان لسه فيه ياباني ، وعشان اللي راكبين اصلا كانو مدورين فطبعا محتاج يخرم في الصاج عشان مقاس المسامير اختلف ( ماكونتش مركب الخشبه) وعشان يريح دماغه حط السماعات في مكانهم وبدل ما ياخد علامه بقلم راح جايب الشنيور وخرم في الصاج والسماعه موجودة ، اللي حصل اييييييييه ؟؟ ان الرايش ده مع اهتزاز الشنيور دخل في الكون بتاع السماعه ( التويترات الخارجه من السماعه ) وطبعا من جوه السماع في مغناطيس كبير بتلاقيه في اسفل السماعه ،، الرايش ده بقا دخل بين الرق والعامود الصغير اللي خارج من وسط السماعه فبقت السماعه مع اهتزازات البيز تعمل صوت ايييييييه ؟؟؟ انت تخيل بقا ، طبعا السماعات بعدها نزلت عند البواب !!!
صحيح نسيت اقولك فتحت السماعه اللي في الخشبه حط الفيبره الاصليه بالعكس على وشها وخد مقاسهم بالقلم وقصهم في الورشة بالمره قبل ما تيجي تركبها ،،، وبعد ما تخلص خالص وقبل التنجيد وثبت الخشبه في مكانها بالظبط ادخل جوه الشنطه حتلاقي في اخرام صغيره كتيره خدلك اتنين منهم على مسافه قريبه من السماع بشويه ، ودخل بنطة الشنيور منها واخرم في الخشبه ، وتعالى على الخشبة بقا من جوه جيب مسمار بصاموله صغيره 8 ملي تكفي ومعاها وردة حديد وورده اللي ناحية الصاج تكون كاوتش وده مهم ، والمسمار يكون مسطح مالوش اي بروز ، بعد ما تنجد وتخلص خالص حتثبت الخشبة ، وضهر المسمار لو مضايقك ممكن تداريه بألف طريقة منها انك تديه نقطة كوله وتنحت وش حتة موكيته فاضلة تاخد فروها تلزقه على ضهر المسمار ، وسلملي على احلى دقة بيز من غير وش ولا زن يا معلم
اطول رد كتبته في حياتي على موضوع ، وابقى قولي رايك يا معلم