السلام عليكم ورحمة الله وبركاته ،،،ffice
ffice" />
أحبائى الكرام ....
إكمالا لما عانيته من أحداث غريبة بدءا من حجز السيارة ......
الى تأخر وصول ورق السيارة لمدة 12 يوم كاملين ...
الى طرحى بكل تفاؤل لموضوع قطع الغيار والاكسسوارات مساء أمس فقط ....
الحكايه من الأول وإكتشـــــــــــــــاف الأمر :-
إتصل بى صباح اليوم مندوب شركة كونتاكت كارز من أجل الذهاب للمرور لترخيص السيارة وبالفعل حضر على عنوان منزلى وإنتظرنى أسفل العمارة أمام جراج سيارتى المغطاه .... وأكرر المغطاه ....
- يالا بينا على المرور يا أستاذ محمد ؟..
- يالا بينا على المرور يا أستاذ سيد ... انتوا أخرتونى أوى فى موضوع ورق العربية ده ....
بكشف غطا العربية عشان أسخن ونتوكل على الله ....
ألاقى الزجاج الخلفى مسرطن بصورة بشعه وغريبة ....
- ياساتر يا رب إيه ده يا أستاذ محمد ؟ !!!
- مش عارف والله يا أستاذ سيد ... يا ساتر يا رب إيه ده ؟؟!!
- دى لازم طوبه أو خبطه جامدة فى الازاز يا أستاذ محمد .....
- طوبه ؟ إيه اللى هيجيب طوبه جوا الجراج .... وإيه اللى هيخبطها وهى جوا الجراج .... دا الجراج بتاعى لوحدى ومحدش بيركن معايا أصلا لأنه جراج صغير ..... ولسه إمبارح بليل إتحركت بيها شويه داخل مربع سكنى وكانت زى الفل ومفيش الكلام ده ....
- أمال إيه بس ... طيب الشمس يمكن ؟
- شمس إيه والعربية متغطية وجوا الجراج ...
الإحتمـــــــــــــــــــ ـــــالات :-
قلت مفيش غير إحتمالين إتنين ...
أولا : إمبارح بليل كان معايا فى العربية بناتى الثلاثة ... المبيرة فيهم مى ( 8 سنوات ) كانت قاعدة قدام وإتكت على زراير التابلوه وتسألنى بتاع إيه ده يا بابا .... ومن ضمن الزراير .. زرار تسخين الزجاج الخلفى .... يمكن تكون إتكت عليه وأنا ماخدتش بالى وسيبت العربية وقفلتها ومشيت وده فضل شغال لغاية مافرقع الازاز ؟!!!
بس إزاى ؟؟؟؟!! هو زرار تسخين الزجاج الخلفى بيشتغل ....ويفضل شغال .... بعد ما تقفل الكونتاكت والعربية وتمشى ؟؟!!!
ما أظنش والله أعلم ...
الإحتمال الثانى .... وهو الأوقع .... تكون العربية أخدت اللى فيه النصيب من الحسد إعمالا لقوله تعالى " ومن شر حاسد إذا حسد " خصوصا زى مانتوا عارفين العربية شكلها عامل إزاى .... وخصوصا كمان إنى كنت راكب قبل كده فيات 127 على قدى ....
المهم إتصلت بأخويا صلاح حكيم أحكيله وأقوله أستفسر منه ... قالى ده شىء غريب جدا وأول مره تحصل ..... إنت مأمن على العربية ؟ قلتله لاء .... قالى عليك وعلى التوكيل ... لازم هيغيروهولك ...
باظ موضوع المرور بعد إنتظار 12 يوم راكن العربية عمال أتفرج عليها من بعيد لبعيد ومش قادر أتحرك بيها ....
موقــــــــــف التوكيــــــــــــــــــل :-
رحت التوكيل فى إسكندرية عشان أشوف إيه الحكايه دى وأنا قلبى واكلنى ومرعوب من ثمن الازاز خصوصا وإنتوا سيد العارفين ثمن قطع غيار الساجا عاملة إزاى ... أنا قلت مش أقل من الف أو ألف ونص ....
دخلت لمدير المركز المهندس / محمود رشدى وحكيتله اللى حصل .... وهو بدوره إتصل بالمهندس أخونا أمر الكوافى بالقاهرة يقولوه على اللى حصل ...
وكان الرد إن الزجاج خارج الضمان وإن دى أول مره تجيلنا شكوى بالطريقه دى .... كل اللى هنقدر نعمله لحضرتك إننا نعملك تخفيض على ثمن الزجاج ... الزجاج ثمنه 650 جم يا أستاذ محمد لكن موجود بالمركز الرئيسى بالقاهرة ومش هقدر أبعت أجيبه إسكندرية قبل يوم الاثنين الماضى ...
الحق يقال .....
لاقيت معامله من المهندس مدير المركز ماكنتش متوقعها على الاطلاق .... أدب وأخلاق وهدوء وسرع وتعاون ...
أمر الفنيين بالمركز إنهم يدخلوا العربية جوا بدون إنتظار .... وقالهم بالبلاور تشيلوا كل فتفوته إزاز بره وجوه العربية وتركبوله مشمع مكان الازاز لغاية مايركب الازاز .... وإدانى رقم موبايله وقالى تتصل بيا يوم الاثنين أأكد عليك وصول الزجاج ....
أخدت بعضى ومشيت وروحت البيت .....
وركنت العربية فى الجراج مكان ماهى واقفة ......
وزى ماكانت وقفه .....
زى الاول ..... للفرجه فقط .....
لغاية يوم الثلاثاء القادم .....
وبعدين نبتدى من الاول تانى ...
معلش أنا طولت عليكم ... لكن كان لابد إنى أأقولكم الموضوع الغريب ده .....
وأأقولكوا كمان إن أخويا صلاح حكيم لما عرف فضل معايا على الموبايل خطوه بخطوه .... ساعة بساعه .....
بجد .... مش هقدر أوفيه حقه من شكر وإمتنان لوقوفه جنبى وإهتمامه بالطريقه دى مع إننا لا نعرف بعض أساس ولا شفنا بعض قبل كده ومجرد تعرف من خلال الساجا والمنتدى...
أسيبكم فى رعايه الله وأمنه وهبقى أقولكم إيه اللى حصل بعد كده أما أركب الزجاج يوم الثلاثاء القادم بإذن الله تعالى ...
أرجو منكم ألا تنسونى فى الدعاء ...
ولله الأمر من قبل ومن بعد وقدر الله ماشاء فعل...
أخيكم
محمد عبد المجيد
الاسكندرية
0116007025
ساجا ( 50 كم ) - أبيض - أوتوماتيك