الحمد لله يا جماعة اخيرا خلصت من الصوت بعد اكتر من شهر مش عارف العيب اية
انا توكلت علي الله واتفقت مع الميكانيكي انة يفتح الجمعة مخصوص عشان اجازتي من المكتب و ان انا مكنتش فاضي الفترة اللي فاتت اني اروح اصلحها عندة
وفعلا صليت الجمعة وروحت علية علي طول وبدأ يفك العجل الامامي وخلاص كنت مستني البلي القديم علشان اشوف نوعة اية واحاول اجيب حاجة احسن منة
وهو بيفك العجلة اليمين قال ان البلية دي سليمة و راح يفك الشمال لقاها برضو سليمة
انا سألتة انت متاكد قالي لأ بس هتأكد دلوقتي حالا
ركب تاني الجنوط بالكاوتشات وفصل عمدان الكبالن الاتنين و راح جاب الموتوسيكل بتاع الترصيص و العربية مرفوعة وشغل الموتوسيكل علي العجلة اليمين وسابها ولقاها مطلعتش اي صوت ونة ونفس الحكاية مع الشمال
انا بدأت اقلق تاني بعد ما كنت اطمنت ان الصوت من بلي العجل وخلاص
وفعلا قالي كدة لازم ننزل الفتيس حتي بالمرة نغير البلية بتاعة الدبرياج
واخد حوالي ساعة يفك في الفتيس لغاية ما نزل
بعد فحص الفتيس اتضح ان بلية الدبرياج ضايعة خالص وكان لازم تتغير من زمان و الفورش كمان عاوز يتغير و فية تأكل في تروس كبيرة كدة و علي عامود واحد جنب تروس صغيرة وجنب حاجة شبة الكورة و انا مش عارف دي بتاعة اية ولا دي بتاعة اية
انا طبعا زهلت من الموقف وحسيت ان الدنيا بقت بمبي وهروح اشتري فتيس استيراد وامري لله
بس الحمد لله كان عندة واحد بايظ وفية العامود دة سليم وانا اشتريتة منة وركبة وروحت اشتريت البلية والفورش و ركبهم و بعد التجربة لقيت الصوت الحمد لله اختفي بس الدبرياج بقي عالي عن الاول وقالي هينزل مع الوقت وروح زود زيت فتيس علي طول
وفعلا يا باش مهندس سمير كان هيحصل اللي حذرتني منة ان بعد تغير البلي ممكن يطلع الصوت لسة موجود بسبب ان العيب من الفتيس بس الحمد لله اني كنت واخد بالي ومركز في كلام حضرتك
ودي اسعار الحاجات اللي اشتريتها :-
70 جنية ...... بلية دبرياج
35 جنية ......فورش
15 جنية ..... زود بيهم زيت فتيس
المصنعية بالتروس اللي خلعها من الفتيس اللي عندة 200 جنية ودة كمان عشان بيقولي ان انا يعني رجعت عملت الشغل عندة يعني زبونة
الاجمالي 320 جنية بس الحمد لله ان الصوت راح واني مشتريتش فتيس تاني
1000 شكر ليكو يا جماعة و للباشمهندس سمير علي وقوفة جنب الناس ونصائحة الغالية اللي لولاه كان زماني مغير البلي علي الفاضي ..... تحياتي
