رد: افكار لتظبيط (تجديد) AX
يا 1000 اهلا وسهلا بيك دايما يا استاذ/ محمد
غريبة جدا!!!!!! بس صح جدا.......
غريب انك متحمس فجأه للعربية (يا ترى اشتريت ولا لسه؟؟؟ احنا خلاص بقينا اخر الاسبوع)
بالتوفيق ان شاء الله
بس الحماس ده كويس جدا جدا جدا لانك متحمس لشىء يستاهل
وصح جدا كل حرف قولته وعلى فكره انا قبل ما افكر فى موضوع شراء عربية بصفة عامة فضلت حوالى 3 شهور اعرف يعنى ايه عربية(مش غباوه منى ههههههههه) لكن عشان اكون على علم بالشىء اللى هتعامل معاه وابتديت افكر من اول السيات 133 لغايه ماوصلت لقمة الاختيار فى حدود الـ 20 الف والحمد لله ربنا وفقنى
وعندى صديق بالصدفة شار عليا بالعربية دى واقتنعت بيها جدا على الرغم من معظم الاراء السلبيىة اللى عرفتها ووالله مع مرور الوقت وبمجرد التفكير (صح) اكتشفت انى بفهم معنى كلمة(اشترى عربية ) اكتر من الصنايعى والسواق (ودى لها قصص كتير بعدين نحكيها)
المهم واللى عاوز اقولهولك انك ابتديت صح فى ترتيب الخطوات عشان يكون معاك عربية صح
الخطوات دى هي التظبيط من جوه لبره لان العربية اساس ماتمشيش من غير السليم اللى جوه واهم اساس تبتدى عليه هى حاله الشاسية وطبعا لازم لازم لازم يكون سليم (دلاله على ان العربية -ولله الحمد- ماخدتش خبطة مؤثرة او عامله حادثة) وده بيتعرف بصفة عامة بالنظر كده للون دهان الدواخل بعد كده تبص ع الموتور وتشوف حالته ( ايه ده انا باين عليا بشرحلك ازاى تشترى عربية-معلش خرجت عن الموضوع والكلام خدنى)
بإختصار وبالترتيب
شاسيه+ميكانيكا+عفشة +كهرباء+صاج =اساسيات
فرش+تابلوه(بمكوناته)+فوان يس بكل الاضاءات +تكييف+سنتر+زجاج كهرباء+زجاج امامى وخلفى وابواب+دهان+كاوتش+جنوط= كماليات
طبعا الاساسيات لها الاولوية
انا اشتريت عربيتى واول حاجه ابتديت بها كانت
الكاوتش
طرمبة بنزين
كربراتير
رادياتير
طقم سرفيس(سيردينامو+سيركاتينة +فلاتر هواء وزيت وبنزين)
سلك سرعة
شكمان
عفشة
مجموعة الفرامل بالكامل (ودى دخلت لها فى 1000 على غفلة ومضطر) لانى ماكنتش قادر احكم على حاله الفرامل كانت بتمسك وخلاص لكن مش بحالتها السليمة ولفيت ع العفشجى والميكانيكى للغاية ما لقيت الطنابير ضايعة والاولسيهات ضاربة والتيل زعلان وطبعا ضطريت افور كله واجدده هى دى الاوليه وقيس على كده باقى النظام
اى حاجه من بره وبعيد عن الاساسيات شكل او تعديل له الف حل وصرفة وسهل يتعمل
القسم بصفة عامة نشاطة مش بطال (ماتنساش ان راكبى الستروين قليلين) وبالنسبة للموضوع ده مابيدخلوش غير المهتمين بالـ AXفقط زيك وزيى لان اهتمامنا واحد
ومبروك مقدما وتحت امرك فى اى كلام او اى حاجه
|