[sh_masry]

يا ساتر يا رب ..... ربنا يكون فى عونك , كفايه العكننه و ضياع الوقت و اللعب فى العربيه .......
عموما قدر الله و ما شاء فعل .
و الحمد لله انك مأمن عليها و دى طبعا مصلحه جامده جدا .........
بالنسبه لأصلاح العربيه فى كارتك ...... انا لا انصحك به خالص ......... مش بس لأسباب شخصيه و انما لأسباب ايضا فى الشغل بتاعهم . و هاشرحلك السببين :
الأول : انا بقولك لأسباب شخصيه لأنى متخانق مع المهندسين اللى ماسكين اداره الصيانه عند كارتك لأنهم عديموا الذوق و انا و بايو بطلنا نروح كارتك ده نهائى لكذا سبب .
و الأسباب التانيه هى كالأتى:
كارتك ممكن يرشلك العربيه لون تانى غير اللون الأصلى بتاعك و مهما اقنعوك انهم هايرشولك نفس اللون و نفس الماركه و النوعيه هايرشولك برده حاجه تانيه و اللون هايبقى مفارق جدا ....... و ده عن تجربه فى عده عربيات و منهم عربيات ناس انا معرفهاش كانت واقفه فى داخل المركز من الخلف و كان نوعهم سكودا اوكتافيا ..... و كنت ببص على العربيتين و ناديت للفنى المسؤل عن الرش و قلتله العربيات دى رشه هنا و هنا وهنا و واضح جدا اختلاف اللون ..... فضحك و قالى ما هو طبعا اللون غير بس نعمل ايه ما هو معرفناش نجيب اللون بالضبط و الميتالك بيبقى صعب (و ده طبعا لأنى كنت معروف فى كارتك و الناس واخده عليا و عرفانى فقالى الصراحه) لدرجه انى سألته طب و لما الزبون يشوف الفرق ده ؟ قالى هانقنعه انه اللون ده هو الأصلى و بعد ما الشمس تاكله شويه هايبقى زى القديم بالظبط . و طبعا عمره ما هيبقى زى القديم.
ده بالنسبه للرش ...... بالنسبه عن الصيانه فحدث ولا حرج .........
انا كنت بصين عربيتى عندهم و قلتلهم غيرولى فلتر البنزين , المهم لجل الحظ علشان انا من الزباين الغتته و بحب اقف جنب عربيتى فى ورشه الصيانه كسروا غطاء الفلتر و ده بيبقى منفصل عن الفلتر , و انا بحاسب لقيتهم حاطنلى غطاء الفلتر ده ( اللى كسروه ) فى الفاتوره و ب 170 جنيه , المهم قلتلهم ايه ده ... دا انتم اللى كاسرينه قدامى و انا واقف جنب العربيه و طبعا بعد محاوله التملص شالوه من الفاتوره ............
و مره واقف برده جنب العربيه بعمل الصيانه لاقيت الأستاذ الفنى بيفتح غطاء قربه المياه و بيزود مياه من الحنفيه طبعا زعقتله و قولتله يا اخى ده انت شايف الميه فى القربه زرقاء و انا واقف جنبك طب اسألنى و انا اديلك جركن ميه زرقاء من شنطه العربيه عندى او يا اخى هات جركن و حطلى تمنه على الفاتوره هو انا جاى مركز صيانه و للا واقف فى الحاره عند سيد شكمان ؟؟؟؟؟؟ طبعا اعتذر و كان عايز يفك خرطوم الرادياتير و ينزل الميه كلها بس طبعا قلتله ما تجيش جنب العربيه .
و حاجات كتير حصلت معايا انا و بايو فى المركز ده ....... بس كل ده و انا بكن للمهندس شريف عبد الخالق و المهندس بهاء معزه خاصه جدا جدا .....بس للأسف اللى حواليهم هايضيعوهم و عموما انا و بايو بطلنا نروح هناك خــــــــــــــــــــــال ـــــــــــــــــص.


هانيجى لموضوعك و هاتقوللى طب اروح فين ارش العربيه ...... اقولك اسأل بايو لأنه بيشكر فى مركز اسمه الأقصى بس انا ماروحتوش قبل كده و بالنسبه ليا انا مش هاروح مراكز بعد كده و هاعمل كل حاجه عند الناس اللى فاهمه بجد و عندها ورش خاصه بيها و ذات تكنيك عالى و تخصص لكل ورشه .