[حسام البورسعيدى]

يا جماعة الموضوع بسيط جدا ..

الراجل صاحب الموضوع عاوز يركب عربية جودتها عالية وهو شايف انه انسب حاجة ليه هى الاوبل ..

كويس اوى .. والاوبل او الالمانى عموما عربيات محترمة جدا والفيكترا عربية ممتازة ..

بس اى عربية مستعملة تقديرها على حسب الحالة .. وخصوصا لما تكون معقدة وحاجتها غالية زى الالمانى ..

لكن احنا متفقين ان الاوبل عربية ممتازة ولا غبار عليها ..

وكمان الراجل عاوز العربية علشان يركبها وياخد خيرها ومش بيفكر فى البيع السريع ...

فالموضوع بسيط جدا ..

والله يا باشا عندك استعداد تتحمل اسعار قطع الغيار وتحمل مسئولية صيانتها الصعبة .. يبقى تنزل من بكره تدور على واحدة تكون فبريكة ...

لكن لو ممكن يجى عليك يوم العربية تحتاج حاجة ومتعرفش تجيبها .. يبقى حرام هتعذب نفسك قبل ما تضر العربية .. لان العربيات الالمانى (متربية ع الغالى) ومينفعش معاها التلصيم ..

وفى الاخر القرار قرارك واكيد انتا عندك فكرة ولو بسيطة عن صيانتها واسعار قطع غيارها اكتر مننا لانها كانت معاك قبل كده ..

لو مش هتجيب اوبل او المانى عموما انصحك باليابانى هو انسب حاجة و هيخليك (تقسم البلد نصفين) .. يعنى هترتاح من صعوبة الصيانة وقلة قطع الغيار وغلو اسعارها .. وفى نفس الوقت هتلاقى الامان والجودة والاعتمادية ..

بس يا باشا .. ومتتعبش نفسك كتير ..


وربنا باذن الله هيوفقك فى العربية اللى تريحك وتعجبك ...