بس مؤخراً العكس بالظبط حصل معايا وده أنا مستغرب له جداً ..
العربية تدور كويس بدون دبرياش ، ولو دست دبرياش وحاولت أدور ألاقي المارش يعتل وتدور بصعوبة.
الموضوع ده ليه حوالى من شهر إلى شهرين .. مع ملاحظة إنى العربية كانت ضاربة جوان وش السلندر ولم أكتشفه غير لما العربية بقت مدربكة فى المشى وبقت تبطل منى وبقت الميه أول ما أحظها فى الرادياتير تتشفط ، فالميكانيكى لما شاف مقاس الزيت لقاه طحينة ، فقال لى ده جوان وحل وش السلندر وحط شوية لحامات علشان كان فيه بارومة فى وش السلندر وعمل جوان جديد.
بس الحكاية دى مازالت مستمرة.
فمش عارف هل فيه علاقة ، ولو مافيش ، ايه اللى يخللى العربية تعتل وتعاكس فى الدوارة مع دوسة الدبرياش مع ان المفروض العكس هو اللى يحصل؟
|
لقيتلك السبب بفضل الله
تطحين الزيت بسبب تلف وش السلندر
أثر للأسف على سبايك عمود الكرنك
وزادت نسبة الخلوص بين بطن السبايك ومناطق التحميل على الكرنك
بوش يعنى الكرنك على سبايك التحميل
وطالما بوش بسبب زيادة نسبة الخلوص
يبقى مش حينفع تدور تانى وأنت فاصل دبرياج
ليه أنا بأقولك هذا الكلام ...............؟
1- لما بتفصل دبرياج ومع زيادة الخلوص ....الفلام بعمود الكرنك بيلعب وبيعمل زاويه خفيفه
مع دخول ترس البندكس الخاص بالمارش عليه
ومن هنا
لايحدث تقابل جيد بين أسنان ترس البندكس وأسنان ترس أدارة حدافة المحرك ( أى
أسنان ترس الفلام )
وبناء عليه
لازم يحصل التعتيل من المارش وعدم أستطاعتك للدواره وأنت فاصل دبرياج
2- ليه بأه بدور بصوره معقوله وأنت سايب الدواسه ( الدبرياج معشق )
كون الدبرياج معشق
يعنى مفيش حركه زاويه ممكن تحصل بصوره كبيره للفلام بالكرنك أثناء دخول
ترس المارش عليه من أجل محاولة الدواره
لأن الفلام فى هذا الوضع محكوم إلى حد ما من الجهتين
جهة عمود الكرنك الطبيعيه
وجهة أخرى تمسك الفلام بسبب وجود عناصر أخرى ( مثبته الفلام بالكرنك )
ألا وهى مكونات الفتيس العلويه بالليله إللى عليها