السلام عليكم جميعا
زي ما وعدتكم انا و صديقي محمد كمال جايبين لكم النهارده تغطية لاحدث سيارات نزلت السوق الكويتي
لذا يرجي ربط الاحزمه و يستحسن الكل يعلي الصوت عنده
بسم الله
كالعاده تم الاتفاق بيني و بين محمد باشا و حددنا التوكيلات اللي هنروحها و طبعا زي ما اتعلمنا قررنا نبتدي من الاقل فالاعلي
لذا كان اول مكان نروحه هو توكيل الميتسوبيشي عشان نشوف جديد ميتسوبيشي ال ASX
اكتر ما يميز العربيه هي حجمها المدمج و اللي يناسب مصر جدا
و علي الرغم من ذلك حجم المقصوره هايل و المساحات فيه جيده جدا
للاسف مقدرناش نفتح الشنطة لكن من الكتالوج بتسع 384 لتر
العربية مبنيه علي شاسيه اللانسر ال EX مع زياده الخلوص طبعا
و العربية مجهزة بمحرك 2000 سي سي MIVIC زي اللي في اللانسر EX GT و يولد 150 حصان و العربيه بتنزل بفئتن واحده ذات دفع رباعي كامل و التانيه دفع امامي فقط و ده طبعا فارق في السعر
من ناحيه الكماليات فحدث و لا حرج
العربية مجهزه بكافه الكماليات الحديثه و من ابرزها
فتحة سقف بانوراما مع لمبات LED علي الجوانب في حركه شيك جدا و جديده ، باركنج سينسور، زينون، نظام سمعي روكفورد مع الصب طبعا، بلوتوث بتحكم من الدركسيون الملتي فنكشن طبعا، جنوط 17 انش، نطام الدخول بدون مفتاح و التشغيل بزرار، كروز كنترول، شاشه معلومات ملونه بين العدادات، وصله AUX، 7 ايرياج
اما من حيث الانطمه التكنولوجيه فالعربيه بتتوفر ب
نظام الثبات الالكتروني Active Stability Cotrol (ASC)
Traction Control
Hill Start Assist نطام المساعده في المطالع
بشكل عام العربية ظريفه جدا و ترضي فئات عمرية كتير و من الجنسين
اسيبكم مع الصور
و دول صورتين لوحش الميتسوبيشي الايفو 10 كده عالماشي
بعد كده توجها الي الصانع الالماني الاول فولكس عشان نتفرج علي الطوارق الجديده
طبعا العربية لا غبار عليها لكن المشكله اننا مش قادرين منقارنهاش بالكايين خصوصا و انهم في الاصل اخوات
و بالفعل من ناحيه التصميم تحس ان العربيه فقدت الهيبه بتاعت الموديل الاقدم لكن في نفس الوقت ازدادت رشاقه و خفه و تدي الايحاء انها صغرت علي الرغم من ان الارقام و التجربه بتبرهن انها علي العكس كبرت و وسعت
العربية مجهزم بمتور 6 سلندر 3600 سي سي بيولد 290 حصان
من الداخل العربية تغيرت كليا
ممكن تقولوا ان فولكس قررت تقلل من الزراير علي قد ما تقدر و استبدلتهم بالشاشه التاتش
و من حيث الكماليات فكله موجود و من اهم الجديد الكاميرات اللي بتوفر صوره بانوراميه لكل ما هو حول السياره مما يلغي الحاجة الي الالتفات و الواحد بيركن
و ادي الصور
بعد كده توجهنا الي توكيل بورش لالقاء نظره سريعة و لتقييم ارائنا في المقارنه بين الكايين و الطوراق
و اذ بنا نفاجئ بوحش من وحوش بورش ال 911 GT3 RS ذات ال 450 حصان و الي تم تجريدها من معظم مكونات الفخامه لتقليل الوزن
بصينا عليها بسرعه عشان متنعقدش و اتجهنا الي الكايين و الوحيده اللي كانت واقفه كانت تيربو و بلون بترولي جديد و مميز و بنفتح الباب لنفاجئ باغرب لون انتريور نشوفه و علي الرغم من غرابته الا انه هايل و عشان اوفر مجهودي لازم تشوفوه
حاجة تعقيد مش كده
عموما احنا استكفينا بكده و خرجنا
الهدف التالي كان توكيل المرسيدس للاطلاع علي جوهرتها الجيده ال CL
اول ما دخلنا لاقيناها واقفه قدامنا و مش اي فئه بقي كانت CL 63 AMG و جنبها حته SLS بلون بني كافيه خراااااااااااااااافه و الاتنين خلونا نتحول
و احنا بنلف شفنا E Class ليموزين في قسم التسليم و اتجهنا اليها نشوفها و نحاول نعرف ايه الهدف منها و احنا في طريقنا اليها لاقينا ال Cl اللي كانت واقفه جنبها بتنور و بتفتح و لاقينا صديقنا في التوكيل الاستاذ احمد جايب المفتاح عشان يفرجنا عليها
طبعا احنا كنا هنطير من الفرحه
ثم حدث ما لا يحمد عقباه ------- دور العربية
و ياااااااااااااااال الهول 607 حصان فرقعوا في وشنا
و من غير رغي كله يعلي الصوت و يشغل الفيديو ده
و دي صور العربية هي و ال SLS ذات اللون العجيب
طبعا لحد كده احنا كنا انهرنا و قررنا نروح قبل ما يحصل لنا حاجه
لكن علي ميييييين
هو اليوم هيخلص كده بالساهل
و احنا في الطريق نلاقي حته 911 GT3 RS زي اللي شفناها من شوية و صاحبها كان سخنان و عمال يحرق و احنا نسمع احلي معزوفه من متورها لحد ما اختفي في الافق
و بكده يتسحق اليوم ده عنوان و يا له من صوت
و اتمني الموضوع يعجبكم
و اسف مقدما علي التعقيد
و ترقبوا مداخله محمد باشا
تم تصغير الصور و رفعها مره تانيه لسهوله التحميل و المشاهده