[allam87]

المشاركة الأصلية كتبت بواسطة سيف الدين سعيد أخى العزيز : مع كل احترامى واطيب تمنياتى ليك بالتوفيق انشاء الله . حاقوللك عن تجربه خاصه مع A113 كانت عندى وكنت جايبها زيرو من أبو الفتوح . وحاقوللك مميزاتها وعيوبها بمنتها الصراحه . العربيه حلوه جدا . موتورها قوى ماشاءالله وانا كنت باجيب على الصحراوى 140 مرتاحه . وكمان العربيه قعدتها مرتاحه وصالونها معقول جدا . اتزانها وثباتها على الطريق رائع حتى مع السرعات العاليه . وبتشيل وقت الحاجه اليها . وتعتبر فى رأيى الخاص انها احسن من باقى الماركات فى فئتها . أما عيوب السياره فهى كالآتى : عفشتها جامده شويه فى الطبات . يعنى مش ناعمه .. وكمان عيب تانى ودا انا عالجته مع التوكيل فى الصيانات . وهو ان فراملها الخلفيه دائما بتكون اضعف من الأماميه . وكان الحل انى طلبت منهم انهم يزودوا رجلاش المصاطر الخلفيه سنه . وفعلا من ساعتها اصبحت الأربع عجلات بيمسكوا جامد على الطريق . وعلى فكره زى مانت بتقول : الوحش الصينى قادم قادم لا محاله . وحايكتسح كل الماركات الأخرى من طريقه . خلاصة كلامى وآسف للإطاله ان الإسبيرانزا عربيه حلوه وتستحمل كويس . ورخيصه وعلى أد ايدك . وربنا يوفقك ويستر طريقك انشاء الله .

كلام جميل ومخالف لراي اغلب اعضاء مصر موتورز اللي ردوا علي موضوعي ولا تقريبا كلهم نصحوني بالابتعاد عن الصيني ولهم وجهة نظر مقنعة
وانا زي ما قلت ان لن استبعد ابدا العربيات الصيني عند الاختيار لكن اخد برده نصائح الاخوة الاعضاء ورائهم عن العربيات الصيني في الحسبان ويمكن يكون في اخيارات افضل تظهر من خلال الردود
ان شاء الله هاشتري العربية في بداية شهر 12 يعني امامي حوالي شهر ونصف حتي اتخذ القرار النهائي عن العربية اللي هاشتريها وطبعا قراري هايأخذ بالحسبان كل الردود والآراء المختلفة وزي ما قلت انا عاوز عربية تستترني خمس او ست سنين بمبلغ لا يتعدي خمسين الف جنية بعد الخمس او ست سنين اما هابيعها اما هاسيبها لاخويا الصغير وهو بئا يتعامل معاها
اهم شئ خلال خمس سنين تسترني يعني تكون اعطالها قليلة ومش كل شوية اروح اصلحها وتقرفني وتعملي صداع وتتحمل السفر 100 كلم يوميا