[Injection]

المشاركة الأصلية كتبت بواسطة SMSM RACE متشكر جدا لرد حضرتك بس ليا سؤال ليه ماتنصحنيش بالشكمان الكامل مع ان الى انا اعرفه انا العربيه طالما ركبلها فيلتر اسبور هتاخد هواء اكتر من الاول فالازم يكون مواسير الشكمان اكبر عشان تطلع نفس الهواء الكتير الى داخل.

معلش ياباشا, أتأخرت فى الرد على حضرتك, العتب على النظر مشفتش التعليق ده

نظام الشكمان الكامل غالى أوى على التغيير, لأنه هيدى زيادة بسيطة فى القوة وخاصة مع الفلتر, وطبعا نظام كامل هيدى صوت جبار, بس نظام كويس مش هيقل عن 800 جنيه, وخلى بالك أن مش مهم القطر أوى قد مامهم الأنحنائات اللى فى النظام عاملة أزاى, ودى بتقلل من تدفق الهواء وبتزود الضغط فى النظام, علشان كده يفضل فى التغيير أن النظام يكون نوعه نضيف ورياضى, علشان المصرى والصينى مابيهتموش طبعا بالموضوع ده, والأنظمة الرياضية بتبقى محسوبة علشان تقلل مقاومة مرور الهواء فيها لأقصى درجة بغض النظر عن القطر.

وعموما, نظام العادم بيتغير عامة كضرورة فى حالتين, تربو أو سوبر تشارجر, علشان العادم تقريبا هيزيد الضعف, أو فى حالة توسيع السلندرات بتاعة الموتور وتركيب بساتم أكبر, علشان الزيادة الكبيرة فى العادم برضه, وطبعا فى حالة تسقيط موتور أكبر.

بس الزيادة فى دخول الهواء علشان الفلتر متتطلبش تغيير نظام العادم كله, ممكن علبة ديفل نضيفة ورياضية بعيد عن المصرى والصينى تدى زيادة ملحوظة فى الصوت والقوة بحوالى 400 |أو 350 جنيه.

وخد بالك أن مهما غيرنا وعملنا, فكمبيوتر العربية هو هو, وفلتر الهواء وظيفته زيادة دخول الهواء للحصول على أفضل عملية أحتراق, أنما كمبيوتر العربية مهما عملنا فهو شغال بخرايط مخزنة فيه, وحتى لو ركبنا تربو على العربية, الكمبيوتر بتاعها مش هيدخل بنزين زيادة علشان الهواء الزيادة اللى داخل, وبالتالى ولا له أى فايدة.

فالديفل والفلتر غرضهم تحسين ماهو موجود أصلا, يعنى فى عربية عادية مهما عملت صعب جدا تحصل على زيادة 30 حصان حتى لو لعبت فى دواخل الموتور طالما الكمبيوتر متغيرش, والتعديلات دى غرضها تحسين مرور الهواء عن القطع الأصلية بتاعة المصنع, وبالتالى بتطلع قطرات زيادة من قوة الموتور.

و الله العظيم فنان

ربنا يخليك يا موتور هيد, ولا أقول جير هيد.