المشاركة الأصلية كتبت بواسطة corsair
انا هقولك علي حاجه يا عم محمد اولا اللي بيعمل الكلام ده ناس تقيله في البلد ربنا يجازيها كل خير وهما بيحاولو كل واحد فيهم انه يعمل منظر جمالي للمسجد علي زوقه وده طبعا يحسبله لانه بدل ما يضيع فلوسه في الكلام الفاضي والقصور والعربيات الفارهه اهو بيبني مسجد بشكل جمالي يحببك في الذهاب اليه وتشوف الجمال المعماري
انتا لو جيت عندي في اكتوبر هتشوف العجب الناس هناك بتتنافس علي اكبر مسجد واحلي طراز معمالي لدرجة ان كل مفيش 100 متر مسجد بسم الله ما شاء الله عملاق
انا اودام البيت عندي هناك مسجد يشبه القدس الي حد كبير في القبة بتاعته والشغل اللي فيه من جوه
انا تقريبا حوالين البيت عندي في يجي 6 مساجد كل مسجد فيهم بسم الله ما شاء الله قد ملعب كرة القدم
|
يا سيدي ربنا يزيد ويبارك
انا كلامي كان عن الاسراف مش عن البناء وفرق كبير بين الاتنين خصوصا ان فيه مساجد اخري محتاجة رعاية
هقولك مثال بسيط يوضحلك الموضوع
واحد عاوز يجيب كولدير
الكولدير ده هيشرب منه كام واحد ( لأنه في شارع فرعي مفيش فيه مرور كتير مكنش هيستفيد منه غير عدد قليل )
في اليوم قول 100 واحد
لأ مش هيوصلوا 100 لكن ايهما اولى ال 100 واحد والا 1000 واحد
لأ طبعا 1000
طيب فيه حوالي 10 كولديرات واقفين على حاجات بسيطة وكلهم في اماكن حيوية ايه رأيك نصلحهم والا نجيب عليهم كمان واحد
انا عاوز اخد ثواب
انت كده كده هتاخد ثواب بالعكس كمان انت هتعيد ثواب كان لواحد والثواب انقطع لان الوسيلة توقفت
ازاي
لان الشخص اللي عمل الكولدير عمله علشان ثواب يروي الناس في الحر والعطش والكولدير باظ لان مفيش صيانة ولا حاجة فدلوقتي مفيش حد بيستفيد منه فوقف الثواب
وروحنا على كل كولدير نشوف اعطالهم ايه وهل المبلغ هيكفي والا لأ
وكانت المهزلة فعلا
واحد واقف علشان حنفياته اتكسرت ومفيش حاجة تمنع المياة فقفلوه علشان مغرق الدنيا
واحد واقف علشان الحلة اللي فيها المياة الباردة فيها خرم صغير عاوز يتلحم لحام نحاس يجي بس اي سمكري ويلحمه
واحد واقف علشان ماتور
واحد واقف عاوز شحن فريون
واحد واقف عاوز تغيير شبكة التبريد علشان مخرومة
واحد واقف علشان الترموستات بايظ
واحد واقف علشان الناس مبتشربش منه لان طعم المياة في المنطقة مش مقبول
وهكذا
والغريب في الامر ان كل كولدير كان فيه حد دايبه وحطه قدام محل او جنب حد علشان الكهرباء متفضلش 24 ساعه وعلشان الصيانة ولا واحد كان بيفكر يصلحه رغم انه عارف العطل ايه وعارف انه مش هيتكلف حاجة وكلهم كانو بيفكروا نفس التفكير لما ربنا ييسر نجيب واحد تاني بداله وخلاص
ايهما اولى
اصرف على مسجد القيمة الضخمة دي والا اشوف 10 مساجد صغيرة اطورها وانظفها والناس اولا وواخيرا محتاجه المسجد علشان يصلوا فيه مش داخلينه علشان ينامو ويدخلوا يتأملو وبتفرجوا على الابداعات الفنية والرسومات اللي فيه
انا مع اي حد يقول ان التكييف النهاردة ضروري لاي مسجد خصوصا لو فيه عدد كبير مع الحر الشديد
لكن لو الجو معتدل يبقى ايه لازمة التكييف كفاية المراوح او حتى على الاقل استغل الميزة اللي موجوده في المسجد ده تحديدا وهيا الارتفاع الكبير اللي يضمن تهوية جيده وانه على واجهتين بحري وغربي يعني الهواء داخله داخله ومنهم واجهة فاضي قدامة حوالي 50 متر ووراهم كام بيت وبعد كده اراضي زراعية
وفيه حاجة كمان
انت في اكتوبر صحراااااء
عاوز تعمل عوامل جذب للناس
عاوز تساعد الناس وتيسر ليهم فتعمل مساجد على مسافات قريبة علشان المشقة على الناس للأنتقال للمسجد
لكن في اماكن زي عندنا او حتى في وسط القاهرة لو لقيت متر في متر يبقى انت بطل ده غير ان عندنا صعب تلاقي اراضي ولو لقيت هتلاقيها زراعية وتراخيص وقرف ولازم الاوقات تدخل فيه علشان المسجد يخلص بسرعة وطبعا لو دخلت الاوقاف فيه ولا هيخلص في عشر سنين
القصد ان مفيش مساجات كافية فقدامك التوسع الرأسي يعني تبني دور واتنين وتلاته
وممكن دور منهم يستغل في اي نشاط تاني زي دار حضانه او عيادات ويجهز له فرش اضافي وقت الحاجة اليه يتفرش ويتصلي فيه ويبقى مكان طاهر معد لصلاة وقت الازمات
مع العلم ان فيه اكثر من مسجد قريبين منه وقائمين على جهود بسيطة كل واحد فيهم 10 الاف او 20 الف ممكن يفرقوا فيهم جامد خصوصا ان مساحاتهم صغيرة
اما عن الاسراف في الانارة فلها شقين
الأول
ان النور الشديد بيوضح التفاصيل اكتر وبالتالي بيساعد على التشدد اكتر وذكرت وقلت زمان كنا بنستني الصلاة تقام والنور الضعيف الخافت يكون من ورا المصلين وغالبا بيكون ضوء اخضر وبيكون الجو باعث على الطمانينة والسكون والهدوء والخشوع
لكن نور شديد مع رسومات والوان = تشتت وعدم خشوع
خصوصا مع الثلاث اشخاص المسئولين عن المسجد كل واحد منهم برأي وكل واحد عاوز المسجد على مزاجه
الثاني
الحسبة الصغيرة اللي عملتها واكيد فيه رقم اكبر من كده لكن خلينا في ده لو عندي 100 مسجد بالكيفيه دي وكل مسجد بيهلك يوميا من 100 ل 150 كيلو وات يعني من 10 ل 15 ميجا وات يوميا واحنا داخلين في ازمة كهرباء
وبعدين انا ذكرت ان فيه حاجات تانية المسجد كان محتاجها اولى من حاجات ثانية ورغم انها بسيطة لكن مفيش حد بيعملها
زي حصير للصالة في الخارج وقت الزحام
فلتر للمياة لان طعمها وحش فعلا
اما عن المسجد فهو والحمد لله نظيف وهناك اخ فاضل عمل فكرة استاذ احمد فاروق لتعطير سجاد المسجد