[solom_vip]

سلامو عليكم
اولا كل سنه وانتم طيبين ورمضان كريم على احلى منتدى سيارات
والله انا عضو فى منتديات كتير وده اول موضوع ليا ومحتاج مساعدتكم فى موضوع كده وربنا يجازيكم خير عنى وعن كل الناس اللى انتو بتساعدوهم
انا ربنا كرمنى وجبت اوبل كورسا 2005 سيدان
الاول كان معايا بعيد عنكم شاهين اول ما جبتها جاى بركن الفرامل قطعت دخلت فى اتوبيس نقل عام صرفت عليها 8000 لحلوح مصرى ومفيش فايده برده العربيه تعبانه جدا ومبطبطلش مصاريف بعتها وجبت لانوس 1 بس كانت حالتها وحشه عفشه تعبانه ودخنه من الشكمان وحوارات بس بالرغم من كده كان فيها ميزه كنت لما ابقى رايح مشوار كانت بتفرقع اخر المشوار
وانا للاسف فى الشراء بليد اوى وبثق فى الناس ومعنديش حد كويس يشوفلى العربيه اللى هشتريها المهم بعتها برده وقعدت ادور على لانوس حالتها حلوه لحد ما لقيت واحده عند تاجر معرفه الكلام ده كان قبل رمضان قالى تعالى شوفها وبتاع والعربيه كويسه وكده بس انا اتاخرت عليه فروحتله قالى اتباعت والحمد لله انها اتباعت عشان يجى نصيبى فى الاوبلايه العثل اللى معايا دلوقتى
المهم التاجر قالى زود شويتين واركب عربيه هتشرفك فرحت شوفتها عجبتنى زودت شويه ومكنش قدامى حد كويس يشوفلى حالتها العربيه قولت بقى انا هسال اللى فوق الدنيا كلها ربنا وفعلا عملت استخاره وربنا سهلهالى ورحت خدت العربيه من غير ما اجيب حد يبص عليها
سوقت العربيه اتوهمت بجد العربيه عامله 94 الف كيلو العفشه ما شاء الله كويسه جدا الماتور تمام الحمد لله والعربيه عاجبانى جدا بس قلقان من موضوع قطع الغيار ده اخر قلق وموضوع برده ان مش اى ميكانيكى يشتغل او يفهم فيها
المهم اول يوم بعد مشتريتها خدتها وروح اجربها وانا فرحان فرحه لبس العيد بطلت عشان اشترى حاجه اشربها وجاى بدور العربيه مش راضيه تدور وفاصله كهربا كان يوم صعب اوى كانت الساعه 2 باليل واقرب كهربائى بينى وبينه 2 كيلو روحتلو قالى خد المفكين دول فكلى البطاريه وهاتها وان شاء الله خير وانا اصلا معرفش البطاريه فين لانى اول مره افتح الكبود ثم انا معنديش تليفون
وديتهاله حطها ع الشحان وقعد يشحنها ل 3 وربع الفجر وانا عمال ادعى ربنا واروح بالعربيه سليمه واتسحر فى بيتنا المهم رجعت ركبت البطاريه دور يا عم دارت الحمد لله البطاريه كانت اسى ديلكو 55 امبير او 50 مش فاكر وكانت منفخه من كل الجوانب وديت العربيه تانى يوم للكهربائى قالى البطاريه تعيش انت المهم انا عارف انى طولت اوى عليكم بس قولت احكيلكم الحكايه وادينا بندردش ورانا ايه ورانا ايه على راى شركه النوبيل
الاسئله بقى
1 رايكم فى الزعبريه مميزاتها وعيوبها واستهلاك البنزين والثبات
2 اجيب البطاريه نفس النوع ولا فى نوع احسن واجيبها كام امبير مع العلم ان العربيه ما شاء الله مليانه اوبشنز وانا على طول تكييف مع الكاسيت مع الام بى ثرى مع السماعات يعنى اجيب امبير اكبر ولا غلط ع الدينامو وتنصحونى بايه
3 اسعار قطع الغيار لو حد يعرفها بكتبهالى ونظام العربيه دى ايه مع الميكانيكيه وكده
4 العربيه بدات تنتش ع السرعات البطيئه بس السلانسيه يعنى فقولت للكهربائى قالى انت بتبقى مشغل الكاسيت والام بى ثرى والكلاكس والنور العالى وكده قولتله اه قالى ده من البطاريه عشان البطاريه ميته والدينامو عندك بيحاول يقومها بس مع الضغط العربيه بتنتش فهل الكلام ده صح ولا لا مع العلم انى فولتها بنزين 90
5 الفرامل بتاعت العربيه كان ع الشعره ف الحاج الله يباركله فتح الكبود وقعد يتعرف عليه ففتح علبه زيت الباكم وقفلها تانى فلقيت الفرامل خفت اوى فمش عارف هل ده عشان الفرامل خدت هوا
اللى يعرف الحل يتصل على **** ويبقى يقابلنى لو حد رد عليه
واخيرا مش عارف اشكركم ازاى وانا اسف ان طولت عليكم وكل سنه وانتم طيبين