[aaet1]

بصراحة بعد قراءة التقرير وقفت شوية مع نفسى .... فكرت أقول لحضرتك إيه ... مش عارف ..... حضرتك متأكد من انك كتبت التقرير ده عن تجربة !!!!
اللى قلته معاكس للحقيقة المعترف بيها من جانب محبى السيراتو ومن جانب المهاجمين ليها إلا فى نقطة أو نقطتين

مثلا اتكلمت عن (أقول غباء المصمم) سواء فى الشكل الخارجى اللى مافيش اتنين اختلفوا على جاذبيته - ده حتى الكارهين للسيراتو بيقولوا شكلها روعة - أو سواء فى التصميم الداخلى ..... أرد على حضرتك فى دى ان اللى صمم السيارة هو المصمم الرئيسى لشركة أودى وبالتالى ماهواش بالعبط اللى يخليه يصمم سيارة مستوحاه من أفلام الكارتون زى ما حضرتك قلت

المحرك: اتفق معاك ان الأربع سرعات الاتوماتيك نظام قديم بس برضه هقول حاجة .... عربيات كتيرة أوروبى وأسيوى نازلة بالأربع سرعات اوتوماتيك وممكن اعدهلم لو تحب

علبة التروس مش ستيب ترونيك .... أمال إيه .... سؤال هل تعتبر علبة التروس الموجودة فى الكورولا مثلا ستيب ترونيك؟؟؟؟

جودة الخامات الداخلية: ارجو حضرتك ماتكنش جربت الموديلات lx أو ex لأنها ورغم ان جودة الخامات الداخلية مقبولة جدا إلا أن الخامات الموجودة فى ال sx ممتازة جدا وقارنها وشوف

الوزن: مقبول جدا للسيارات اللى فى الفئة دى وماهواش نقص خبرة ولا حاجة من كيا .... وإلا بقى قول على كتير من العربيات الصينى ان اللى صنعوها فطاحل علشان عرفوا ازاى يخلوها وزن الريشة

صوت المحرك: واللى الكل قال عليه أعلى شوية وخصوصا بعد ال 120 حضرتك قلت عليه هادئ !!!!!

الثبات: معلش بقى جيت فى نقطة أقولك لحضرتك عليها حدث ولا حرج: وزن ثقيل نسبيا، جنط 17، ابعاد نموذجية بين العجل الأمامى والخلفى، عرض سيارة وارتفاع معقول جدا وبعد كده تقول مافيش ثبات، أنا شخصيا أخدت ملفات تقيلة على 120-150 وماحستش حتى ان العربية حدفت منى ولا مالت!!!!

التعليق الخلفى: اتفق معاك فى بداءيته بس بيدى ثبات وعيبه انه بيسبب خشونة فى العفشة

عجلة القيادة الصغيرة نقطة سيئة: ازاى يعنى .... اى عربية رياضية الميزة فيها العجلة الصغيرة .... ده معناه تحكم أكبر مش أقل معذرة!!!!

صوت احتكاك الاطارات و الهواء على السرعات المرتفعة يكاد لا يسمع بالداخل: يااااااخبرررررر ..... حضرتك متأكد من انك كنت راكب سيراتو ) .... ده صوت العجل واحتكاكه على الأسفلت من الحاجات الواضحة جدا يا بيه

التسارع من 0-100 فى 10.5-11.5 ثانية مع عربية اتوماتيك رقم أكثر من رائع .... ماتخفش هتوصل فى ميعادك بس معذرة يمكن تبقى تعبان شوية من العفشة


نقطة أخيرة .... ما أخدتش بالك ان انتشار السيراتو مع سعرها اللى حضرتك بتقول عليه مرتفع ولا يتناسب مع مواصفاتها معناه ان الموضوع محتاج اعادة نظر من ناحيتك

أخيرا .... أهلا بحضرتك وماتزعلش من ردى أنا بس مستفز من تقرير سعادتك