[sad-bird]

المشاركة الأصلية كتبت بواسطة Injection الجواز فى مصر يمكن تصويره على أنه عملية شراء من العتبة, بتسأل التاجر عن السعر يقوم قايل سعر عالى, تفاصل معاه فى السعر شوية على حسب "السلعة" وياتتفقوا على سعر أو متتفقوش والبيعة تتفركش وتدور على واحد تانى يكون عنده سلعة أحسن وبسعر أرخص. ودى مشكلة الجواز الرئيسية فى مصر, أهل العروسة بيطالبوا العريس بمطالب خيالية بالنسبة لشاب حديث التخرج أو لسه بيشتغل, والعريس اللى مايقدرش يدفع يتكل وييجى اللى بعده. والحاجة اللى مضايقانى بجد أن علشان العريس يتجوز لازم أبوه يكون جايب له شقة تمليك ومجهزها وهكذا, طب أيه اللى يضمن أن العريس ده راجل وهيقدر يعتمد على نفسه ويتحمل مسئولية شخص تانى وهو غالبا مش قادر يشيل مسئوليته الخاصة, كلمة أحنا بنشترى راجل أختفت خلاص وبقت أحنا بتشترى عفش وشقة وشبكة. وكلمة عنوسة أو عانس دى كلمة حقيرة جدا, وأنا عمرى ما أكره حاجة أكثر من الكلام على الأنسان من وراء ظهره, أيه المشكلة لو واحدة مش عايزة تتجوز أو مش لاقية العريس المناسب, طب الناس مالها أصلا وبتتدخل فى مواضيع متخصهاش ليه, مابره سن الجواز بيبقى مرتفع جدا بالنسبة لعندنا, وبيتجوزوا فى التلاتينات ومحدش بيتكلم. وأنا كنت متابع للمدونة ومراحل تحولها الى كتاب ثم مسلسل, بس مش متابع المسلسل قوى بس ليا تعقيب, هما ليه مصورين العروسة على أنها ملاك وأن كل الجوازات المحتملة بتنتهى بسبب العريس, مالعروسة بيقى فيها صفات كتير بتخلى العريس يهرب, ممكن تبقى متطلبة, "صايعة" وليها أصحاب ولاد كتير, مبتحترمش العريس وبتنفضله, الغروووووووووور وحب الذات (النرجسية), التسلط, وهكذا. والخطوبة غالبا بتنتهى بسبب أن أحد الطرفيين مش قادر يتقبل عيوب الطرف الأخر وأرائه, وبيدور على الفارس على الحصان الأبيض أو الأميرة ذات الشعر الأصفر والعيون الخضراء. ومن موقعى هذا أطالب بعمل كتاب ومسلسل "عايز أتجوز" لأعادة حق الشباب المهدور وفضح الصورة الملائكية للعروسة, ههههههههههههههههههههه. الجوازة الصح هى الجوازة عن حب وأعجاب متبادل بين الشخصين, وأتفاق بينهم على أنهم يحبوا بعض فى السراء والضراء, والأهل يبقوا متقبلين العريس وفاهمين حالته وعارفين أنه قد المسئولية وهيقدر يخلى بنتهم تعيش مبسوطة معاه مهما كانت حالته الأجتماعية, وبعد الجواز يعيش العريس والعروسة أيام الكفاح ويقدروا يكافحوا مع بعض, فشقة تمليك فعربية فأثنين فشقة تانية ويعيشوا فى تبات ونبات ويخلفوا صبيان وبنات. والواحد يتجوز ليه أصلا, مايشترى عربية ولا بلاى ستيشن 3 ويقضى حياته فى سعادة مع نفسه من غير مسئولية ولا حاجة ويعيش, وسلام كبير لأحمد ممدوح كبير عازبى المنتدى, ماتسيبناش يا أبو حميد. وفين الأعضاء المتزوجين يحكولنا عن تجاربهم لعلنا نتعظ ونستفيد. وشكرا لمدام نورا على طرح الموضوع الشيق.

اهلا يا انجكشن
اتفضل الشاي بتاعك لو اني زعلان منك لكن امري لله احنا ضيوف هنا خلينا نتفاهم بره

اولا ANAA 7TGA NAA7TG

على كلمة
الجواز فى مصر يمكن تصويره على أنه عملية شراء من العتبة

انت كده اطلقت تعميم على كل مصر وده غلط زي ما في وحش فيه حلو اي نعم مبقناش عارفين نشوف الحلو ده علشان الوحش بقى كتير لكن ده ميمنعش ان فيه ناس وبنات كويسين والموضوع مش بيع وشرا وبعدين مهو زمان كانو بيشتروا رجاله اشمعنى دي مكنش فيها العتبه والا هو الافترا كده على طول

ثانيا بقى ظروف الجواز الاقتصادية مش هيا السبب الرئيسي والاول في المشكلة فيه اسباب اخري لكن الظاهر دايما اللي بيحصل الظروف الاقتصادية وبعدين ده مش ذنب اهل البنت ولا ذنب الولد
ثالثا انا معاك في رفض كلمة عنوسة لكن مش معاك في المقارنه بينا وبين الغرب لان عندهم اوضاع كتير غلط بتساعدهم على تأخر سن الزواج عندهم وده مش موضوعنا
رابعا انا معاك في موضوع ان الاب بيجهز ابنه وشقة ابنه وان الولد مش بيكون متحمل مسئوليه نفسه علشان يتحمل مسئولية حد غيره معاه (لو اني من ضمن الناس دي )
خامسا موضوع البنات المتحررة زياده عن اللزوم ( وبلاش الكلمة بتاعتك نقي الكلاام ) معتقدش ان فيه حد رايح بيت ومش عارف هو رايح فين اللي رايح بيت ملتزم عارف هو رايح لمين واللي رايح بيت متحرر عارف هو رايح لمين
سادسا مفيش حد كاااااااااامل الكمال لله وحده سبحانه وتعالي ، ومحدش يقول الرجاله كلهم مميزات ومفيش عيوب والبنات كلهم مميزات مفيش فيهم عيوب
سابعا
ايه الكومنت الطويل الرخم ده الناس زهقت مني انا عارف لكن امركم لله بقى اتحملوا اصلي ما صدقت احكي
سابعا محدش محتاج يعيش لوحده يمكن النهاردة انت قادر تعيش لوحدك اصحابك وعربيتك وخروج وفسح وبترج البيت بتلاقي الاكل معمول والهدوم نضيفة ومكوية وتقعد على بلاي ستيشن 3 وتهزر وتضحك وبدون مسئولية وهم ولا وجع دماغ وهو نفس الكلام اللي قلته لمدام نورا في الكومنت اللي فات هيجي وقت هتلاقي نفسك لوحدك مش معاك حد هتعمل ايه وقتها
ثامنا انا معاك ان العلاقة بين الطرفين لازم يكون اساها المودةو الرحمة والحب ولازم كلا الطرفين يقدم تنازل للطرف التاني ولا ينفع الزوج بس ولا الزوجة بس لغايه لما امورهم تستقر وييشوفوا حياتهم وبتكون اجمل اللحظات بعد كده لما يكبروا لما بيفتكروا الايام الاولي في حياتهم والتعب اللي تعبوه فيها
( اللي بيرتاح بعد شقي بيحس بطعم الراحة غير اللي بيرتاح وهو مرتاح على طول مبيعرفش يعني ايه راحة لانه متحرمش منها )

واخيراااااااااااااااااااا اااااااااااااااااااا
انا اكبر عازبي المنتدي مش احمد ممدوح انا اكبر منه ب6 سنين ان لم يكن هناك اكبر مني
وعلى فكرة انا كنت سمعت ان فيه كتاب تاني اسمه انا عاوز اتجوز يعني فكرتك قديمة روح بقى الحق دور على الكتاب قبل ما يخلص


اخيرا خلص الكومنت ايه ده مش هلحق اشرب الشاي كده