اولا البقاء لله في والدتك يا محمد
ثانيا مافيش مشكله انك تغلط و بعدين تتعلم
انا قعدت لوحدي حوالي اربع سنين في الامارات
من اول شهر كنت بقلي بطاطس و همبورجر و بعمل مكرونه لحد ما معدتش نشفت!!!!
و بعدين قبل نهايه السته شهور الاول في غربتي كنت بدأت اطبخ و بدات استطعم الاكل اللي بعمله
علي نهايه السنه الاولي كنت الحمد لله اتعلمت كل الطبيخ و اشتريت فرن لاني حبيت اطبخ بمزاج
و بدأت اعمل مكرونه بالبشاميل و رز معمر و طواجن بصل و باميه لدرجه اني بدأت في الحلويات و بقيت بعمل جلي و رز بلبن.
و بقي عندي القدر اني ممكن اعزم 7 زمايلي معايا و اعمل اكل يقضي 10 كمان و انا لوحدي من غير مساعده حد!!!!
كل حاجه بتيجي واحده واحده
بالنسبه للبطاطس لو عاوز تقليها صح ولع علي الزيت لمده ثلاثه او اربع دقائق علي نار عاليه
و اوعي تطلع البطاطس من الفريزر قبل ما تطها بفتره علشان لو طلعتها الثلج حيفك و حيبقي عليها ميه و دي تعمل طرطشه.
اول ما الزيت يقدح و دا بتعرفه من انك بصابعك كده تحطه تحت الحنفيه و بعدين من بعيد ترش نقطه ميه علي الزيت لو لقيته بيطلع صوت يبقي كده الزيت قدح
تقوم مطلع البطاطس و حاططها كده بالكبشه في ايدك من بعيد ما تقربش للزيت
و بعدين تحط كميه مناسبه و توطي النار علي البطاطس علشان تستري من بره و من جوه كمان لان لو الزيت فضل علي حراره عاليه حتستوي من بره و من جوه حتفضل زي ما هي.
و بعدين اربع دقائق او خمسه مع التقليب كل نص دقيقه حتلاقيه البطاطس لونها بدأ يتغير اصبر عليها نص دقيقه و بعدين طلعها و انت بتطلعها لازم تصفيها من الزيت كويس و تحطها علي مناديل علشان تشرب الزيت و بالهنا و الشفا
