ده الاسطى جمال ده مبيعملش فيا المقلب الا ويطلع من نافوخى
خد دى
مرة جايين من طريق اسيوط الغربى وكان ساعتها لسه بيرصفوه ويادوب وصل لحد مصنع اسمنت اسيوط وكان معاه عربية داتسون قديمة جدا جدة عربيتى (نيسان )
المهم
اقترحت عليه نمشى من الطريق الغربى فاضى ومحدش يعرفه وهنفتح فيه السرعة يعنى عربيتك موديل 60 دى ممكن تفتح على الاخر هتجيب سرعة70 فضحك ووافق ومشينا الغربى وكانت الساعة 8 بالليل ولا حس ولاخبر والدنيا ضلمة كحل (ضمة على الكاف ) ومحدش ماشى فى الطريق غيرنا وكل شوية يفرمل فى ايه ياعم جمال يقول متهيألى فى حاجة بتعدى الشارع انا /حاجة مين ياعم جمال هو فى حد غيرنا انت فاكر لاقدر الله لو عطلت العربيه حد هينجدنا ؟ قال / ربنا موجود قلت له ونعم بالله بس غالبا الديـابة (جمع ذئب) هتاكلنا وانا قلتها بهزار لكنه اتاريه خاف منها وعششت فى نافوخه وبعد شوية قال /لا ياعم انا هطلع على الزراعى يابنى خليك هنا قال /ابدا فقلت / خلاص انت حر وشوية قريت يافطة مكتوب الطريق الزراعى 300 متر طب انت ياعم جمال بتجرى بسرعة تقريبا 90 نقول 70 حتى يبقى ال300 متر هتاخدهم فى كام ثانية ثم المفروض عديت المدخل تقف وترجع وتدخل انما تحود فجأة؟
وصاحبنا بقول له المدخل اهو راح مفرمل فرملة جامدة وصوتها عالى ولف فجأة وفوجىء بأيه ؟؟؟؟؟؟
بعربية مدرعة واقفة فى الصحرا راح مفرمل تانى فجأة ووقف بينه وبينها سنتيمترات ولقيت العساكرقامو من فوق المدرعة مخضوضين اتااريهم كانو نايمين عليها ومش فى دماغهم وصحيو فجأة على صوت الفرامل وانا فاهم ان عندهم أوامر بالضرب فى المليان ولقيته بيقول لى اعمل ايه فصرخت فيه بصوت عااااااااااالى جدا وقلت له اطلع من العربية وارفع ايديك فقال حاضر وانا رميت نفسى تحت الكرسى لان دقنى كانت كبيرة وقتها والصراع على ودنه بين الشرطة والجماعات وهما عندهم اسفكسيا الدقون وفعلا كانو جايين علينا بالمدافع الرشاشة راح خارج وهو بيترعش وكان معاه فوطة بيضا راح رافعها ومشوح بيها دليل على الاستسلام فقالوله عايز ايه قال لهم الطريق الزراعى قالوله من هنا وشاورو له
مش يمشى ويسيبهم ويبعد عنهم ؟؟؟؟ لا واقف بيستفهم من هنا ازاى؟؟ وهمشى كتير؟ وفى علامة معينة ؟؟؟وانا طبعا مرمى تحت الكنبة وعمال اقول الله يسامحك ياجمال هتخليهم يفتشو العربية ويلاقونى مستخبى دماغهم تسخن ويضربونا بالنار ويصفونا هنا فى الصحرا وعمال اهرى وانكت (ضمه على الكاف) وهو نازل اسئلة
المهم مشينا من وشهم وهو من الخضة نسينى وماشى بالعربية وولع سيجارة ولا كأنى معاه بعد شوية ناديت من تحت الكنبة ياجمال لسه م بعدناش عنهم؟؟؟ قال اطلع معلش نسيتك واحنا ماشيين قال انا خرمان طيب ياعم م انت بتدخن اهو قال لا عايز اشرب شاى قلت له اول قهوة نقعد عليها فقال ماشى وفوجئت بيه وقف ادام خص (ضمة على الخاء) على ترعة او مصرف ودخل جوه وقال ياحاج خالد تعالى عندهم شاى و دخلت لقيت غرزة واول م دخلت طبعا لابس البدلة وشكلى باين ان فى حاجة ولقيت الكل وقف على حيله ورفعو ايديهم فقلت لهم اقعدو وقلت للقهوجى او صاحب الغرزة هاتلنا شاى فجاب شاى فى كوز الومنيوم قذر جدابقول له مش تغسله فقال انا بقى لى ساعة بغسله بسلك المواعين اومال انا اتأخرت عليكو فى الشاى ليه فقلت له بتعجب رهيييييييييييب / ده مغسول؟ فقال بسلك المواعين والتراب ياباشا انا (ف سرى) /بالتراب؟ اخص الله يسامحك المهم كان ليا مزاج للشاى وشربت من الكوز وجيت بشرب لقيت تراب وزلط وعفش وحاجات غريبة كده فبسأله / انت جبت الميه بتاعة الشاى دى منين فقال من المصرف اللى ماشى ادامنا ده وهنا بطنى وجعتنى فقلت خلاص كام حساب كوزين الشاى دول فقال / 50 قرش فاستغربت لان كده رخيص اوى فقلت بصوت عالى / 50 قرش!!!!!!!!! فقال خلاص ياباشا ربع جنيه فاديته جنيه ومشيت كل ده وجمال انا حاسس انه ف غيبوبة شرب الشاى كله وحجر معسل وهينام فقلت له هتنام هنا فقال لا يالا نمشى ووصلنا الزراعى بقول له / ايه رأيك فى الشاى قال ممتاااااااااااااااز ده انا اتكيفت جدا منه
تصدقو بالله لو بعرف اسوق ساعتها كنت رميته فى ترعة الابراهيمية (فرع من النيل ماشى جنب الزراعى بتاع الصعيد) ومشيت انا بالعربية واول م اوصل مصر هرميها هيا كمان فى النيل
الله يمسيك بالخير ياجمال مشفتوش من 9 سنين